ଭୁବନେଶ୍ୱର : ପୁଣିଥରେ ଦୁଇ ଓଡ଼ିଆ ରାଜ୍ୟ ପାଇଁ ଗୌରବ ଆଣିଛନ୍ତି। ବିଶିଷ୍ଟ ଶିଶୁ ସାହିତ୍ୟିକ ବୀରେନ୍ଦ୍ର ମହାନ୍ତି ଓ ଯୁବ ସ୍ରଷ୍ଟା ଜୟଦ୍ରଥ ସୁନା ପାଇବେ କେନ୍ଦ୍ର ସାହିତ୍ୟ ଅକାଦେମି ପୁରସ୍କାର-୨୦୧୮। ଗୌହାଟୀଠାରେ ଅନୁଷ୍ଠିତ ଅକାଦେମିର ସାଧାରଣ ପରିଷଦ ବୈଠକରେ ଏହି ଘୋଷଣା କରାଯାଇଛି। ଶ୍ରୀ ମହାନ୍ତି ଶିଶୁ କବିତା ସଂକଳନ ‘ରୁମ୍କୁ ଝୁମା’ ପାଇଁ ଓ ଶ୍ରୀ ସୁନା କବିତା ସଂକଳନ ‘ଶୋଷ’ ପାଇଁ ଅକାଦେମି ପୁରସ୍କାର ପାଇବେ।
ପୁରୀରେ ଅବସ୍ଥାପିତ ଶ୍ରୀ ମହାନ୍ତି ଶିଶୁ ସାହିତ୍ୟ କ୍ଷେତ୍ରରେ ଏକ ସ୍ପର୍ଦ୍ଧିତ ଉଚ୍ଚାରଣ। ୨୫ରୁ ଅଧିକ ପୁସ୍ତକର ରଚୟିତା ତଥା ଅନୁବାଦ ପୁସ୍ତକ ପାଇଁ ପ୍ରଶଂସିତ ଶ୍ରୀ ମହାନ୍ତି ଗୁରୁ କେଳୁଚରଣ ମହାପାତ୍ରଙ୍କ ଜୀବନୀ ପୁସ୍ତକକୁ ବଙ୍ଗଳାରେ ରଚନା କରି ପୁରସ୍କୃତ ଓ ପ୍ରଶଂସିତ ହୋଇଛନ୍ତି। ପୂର୍ବରୁ ସେ ଓଡ଼ିଶା ସାହିତ୍ୟ ଏକାଡେମୀ ପୁରସ୍କାର, ଜାତୀୟ ସାକ୍ଷରତା ମିଶନ ପୁରସ୍କାର, ଜାତୀୟ ବାଲ୍ କଲ୍ୟାଣ ପୁରସ୍କାର ପ୍ରଭୃତି ପ୍ରାପ୍ତ ହୋଇଛନ୍ତି। ଜଗତର ନାଥଙ୍କ ଆଶୀର୍ବାଦରୁ ଏହି ସଫଳତା ମିଳିପାରିଥିବା ଶ୍ରୀ ମହାନ୍ତି ପ୍ରତିକ୍ରିୟାରେ କହିଛନ୍ତି।
ସେହିପରି କଳାହାଣ୍ଡିର ଯୁବକବି ଶ୍ରୀ ସୁନା ନିଜସ୍ୱ ସୃଷ୍ଟି ପାଇଁ ପାଠକ ମହଲରେ ବେଶ୍ ପରିଚିତ। ବିଭିନ୍ନ ପତ୍ରପତ୍ରିକାରେ ତାଙ୍କ କବିତା ପ୍ରକାଶିତ ହୋଇ ପାଠକୀୟ ଆଦୃତି ଲାଭ କରିଛି। ‘ଶୋଷ’ ତାଙ୍କର ପ୍ରଥମ କବିତା ସଂକଳନ ହୋଇଥିବାବେଳେ ଏହା କେନ୍ଦ୍ର ସାହିତ୍ୟ ଅକାଦେମି ପୁରସ୍କାର ପାଇଁ ମନୋନୀତ ହେବା ଉଲ୍ଲେଖନୀୟ। ସେ ପ୍ରତିକ୍ରିୟାରେ କହିଛନ୍ତି, ସମାଜର ଶୋଷିତ, ଅବହେଳିତ ବର୍ଗଙ୍କ ପାଇଁ ମୋ କବିତା ସମର୍ପିତ। ଏହି ପୁରସ୍କାର ମୋ ରଚନାକୁ ଆହୁରି ସମୃଦ୍ଧ କରିବ।
ଅକାଦେମି ପକ୍ଷରୁ ଶିଶୁ ସାହିତ୍ୟ ପୁରସ୍କାର ଆଗାମୀ ଶିଶୁ ଦିବସ ଅବସରରେ ଏକ ସ୍ୱତନ୍ତ୍ର ଉତ୍ସବରେ ପ୍ରଦାନ କରାଯିବ। ତେବେ ଯୁବ ସାହିତ୍ୟ ପୁରସ୍କାର କେବେ ପ୍ରଦାନ କରାଯିବ ସେନେଇ ଘୋଷଣା ହୋଇନାହିଁ। ଅକାଦେମିର ସଭାପତି ଡ. ଚନ୍ଦ୍ରଶେଖର କମ୍ବରଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଏହି ନିଷ୍ପତ୍ତି ନିଆଯାଇଛି। ମନୋନୀତ ପ୍ରତିଭାଧରଙ୍କୁ ୫୦ ହଜାର ଟଙ୍କାର ଚେକ୍ ଓ ଉପଢୌକନ ପ୍ରଦାନ କରାଯିବ ବୋଲି ଜଣାପଡ଼ିଛି। ଦୁଇ ପ୍ରତିଭାଧରଙ୍କୁ ଓଡ଼ିଶା ସାହିତ୍ୟ ଏକାଡେମୀ ପକ୍ଷରୁ ସଭାପତି କବି ହରିହର ମିଶ୍ର ଓ ସଚିବ ଡ. ଜୟନ୍ତୀ ରଥ ଶୁଭେଚ୍ଛା ଜଣାଇଛନ୍ତି।
ଦୁଇ ଓଡ଼ିଆଙ୍କୁ କେନ୍ଦ୍ର ସାହିତ୍ୟ ଅକାଦେମୀ ପୁରସ୍କାର
Popular Categories
Previous article
Next article