ମୁମ୍ବଇ: ବଲିଉଡ଼ ସୁପରଷ୍ଟାର ସଲମାନ ଖାନଙ୍କ ଅଭିନୀତ ଚଳଚ୍ଚିତ୍ର ‘ଦବଙ୍ଗ୍-୩’ ମୁକ୍ତିଲାଭ କରି ସାରିଛି। ଶୁକ୍ରବାର ପରଦାକୁ ଆସିଥିବା ଏହି ଚଳଚ୍ଚିତ୍ର ପ୍ରଥମ ଦିନରେ ଅତି କମ୍ରେ ୪୦ କୋଟି ଟଙ୍କା ଆୟ କରିବ ବୋଲି ଅନୁମାନ କରାଯାଉଥିଲେ ମଧ୍ୟ ଏହା ଆଶାଠାରୁ ବହୁ ଗୁଣା କମ୍ ଆୟ କରିଛି। ବିଶେଷଜ୍ଞଙ୍କ ଦ୍ୱାରା ଜାରି କରାଯାଇଥିବା ସୂଚନା ଅନୁସାରେ, ‘ଦବଙ୍ଗ୍-୩’ ପ୍ରଥମ ଦିନରେ ୨୩ କୋଟି ଟଙ୍କାର ବ୍ୟବସାୟ କରିଛି। ତେବେ ନାଗରିକତା ସଂଶୋଧନ ଆଇନକୁ ନେଇ ଦେଶ ବ୍ୟାପୀ ଚାଲିଥିବା ବିରୋଧ ପ୍ରଦର୍ଶନ ଚଳଚ୍ଚିତ୍ରର ଆୟକୁ ପ୍ରଭାବିତ କରିଥିବା କୁହାଯାଉଛି।
ବକ୍ସ ଅଫିସ ଇଣ୍ଡିଆର ସୂଚନା ଅନୁସାରେ, ସିଏଏକୁ ନେଇ ଚାଲିଥିବା ବିରୋଧ ପ୍ରଦର୍ଶନ ଯୋଗୁଁ ଚଳଚ୍ଚିତ୍ରକୁ ବହୁ ମାତ୍ରାର କ୍ଷତି ସହିବାକୁ ପଡ଼ିଛି। ଅନେକ ଜନଗହଳି ପୂର୍ଣ୍ଣ ସ୍ଥାନ ରହିଛି, ଯେଉଁଠି ସଲମାନଙ୍କ ଚଳଚ୍ଚିତ୍ରରେ ପ୍ରେକ୍ଷାଳୟ ହାଉସଫୁଲ୍ ହୋଇଥାଏ। କିନ୍ତୁ ପରିବେଶ ଅଶାନ୍ତ ଥିବାରୁ କେଉଁଠି ଲୋକେ ସିନେମା ଦେଖିବାକୁ ପହଞ୍ଚି ପାରୁ ନାହାନ୍ତି ତ ଆଉ କେଉଁଠି ପରଦାରେ ଫିଲ୍ମ ଚାଲି ପାରୁନାହିଁ। ଅନେକ ସ୍ଥାନରେ ଧାରା ୧୪୪ ମଧ୍ୟ ଲାଗୁ କରାଯାଇଛି। ଏସବୁ କାରଣରୁ ଚଳଚ୍ଚିତ୍ରକୁ ପ୍ରାୟ ୧୫ରୁ ୨୦ ପ୍ରତିଶତ କ୍ଷତି ସହିବାକୁ ପଡ଼ିଥିବା କୁହାଯାଉଛି। ତଥାପି ଆଗକୁ ଚଳଚ୍ଚିତ୍ରର ଆୟ ବଢିବ ବୋଲି ଅନୁମାନ କରାଯାଉଛି।
Comments are closed.