ରାକ୍ଷୀପୂର୍ଣ୍ଣିମାରେ ଅଘଟଣ; ଭାଇକୁ ରାକ୍ଷୀ ବାନ୍ଧିବାକୁ ଆସି ପୁଅକୁ ହରାଇଲା ଭଉଣୀ

ଦ୍ବାରଶୁଣି: ରାକ୍ଷୀପୂର୍ଣ୍ଣିମାରେ ଭାଇକୁ ରାକ୍ଷୀ ବାନ୍ଧିବାକୁ ଆସିଥିବା ଭଉଣୀ ନିଜର ପୁଅକୁ ହରାଇଛି। ମୟୂରଭଞ୍ଜ ଜିଲା ବାଙ୍ଗିରିପୋଷି ଥାନା ଚାକିଡ଼ି ପଞ୍ଚାୟତର କୁକୁରଭୁକା ଗ୍ରାମରେ ଗୁରୁବାର ଏଭଳି ଦୁଃଖଦ ଘଟଣା ଘଟିଛି। ଗ୍ରାମର ଗୁଲାମ ମୁର୍ମୁଙ୍କୁ ରାକ୍ଷୀ ବାନ୍ଧିବା ଲାଗି ବିଶୋୟୀ ଥାନା ବାଉତିବେଡ଼ା ଗ୍ରାମରୁ ତାଙ୍କ ଭଉଣୀ ଏବଂ ଭିଣୋଇ ୪ବର୍ଷର ପୁଅ ମେଘରାୟ ସହିତ ଆସିଥିଲେ। ଏଠାରେ ମେଘରାୟ ଘର ବାହାରେ ଖେଳୁଥିବାବେଳେ ଅସାବଧାନତା ବଶତଃ ନିକଟରେ ଥିବା କୂଅରେ ପଡ଼ି ଯାଇଥିଲେ। ବହୁ ଖୋଜାଖୋଜି ପରେ କୂଅରୁ ମୁର୍ମୂଷୁ ଅବସ୍ଥାରେ ମେଘରାୟଙ୍କୁ ଉଦ୍ଧାର କରି ପରିବାର ଲୋକେ ବାଙ୍ଗିରିପୋଷି ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ଆଣିଥିଲେ। ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ଏ ନେଇ ଥାନାରେ ଏକ ମାମଲା(୨୫/୧୯) ରୁଜୁ ହୋଇଛି। ଘଟଣା ପରେ ସ୍ଥାନୀୟ ଅଞ୍ଚଳରେ ଶୋକର ଛାୟା ଖେଳିଯାଇଛି।