ପାଣାଜୀ: ଗୋଆ ମହାରାଷ୍ଟ୍ରବାଦୀ ଗୋମନ୍ତକ ପାର୍ଟି (ଏମଜିପି) ର ଦୁଇ ବିଧାୟକ ବୁଧବାର ବିଜେପିରେ ଯୋଗ ଦେଇଛନ୍ତି। ଗୋଆର ବିଜେପି ନେତୃତ୍ବ ମେଣ୍ଟ ସରକାରରେ ଏମଜିପି ସହଯୋଗୀ ଦଳ ରହିଛି। ଏହା ସତ୍ତ୍ବେ ଏମଜିପିର ଦୁଇ ବିଧାୟକ ନିଜ ଦଳ ଛାଡି ବିଜେପିରେ ଯୋଗ ଦେଇଛନ୍ତି। ବିଜେପିରେ ଯୋଗ ଦେଇଥିବା ଦୁଇ ବିଧାୟକ ହେଲେ ମନୋହର ଅଜଗାଓଁକର ଓ ଦୀପକ ପାୱାଶକର। ବୁଧବାର ଏହି ଦୁଇ ବିଧାୟକ କାର୍ଯ୍ୟକାରୀ ବାଚସ୍ପତି ମିଚେଲ ଲୋବୋଙ୍କୁ ଏମଜିପି ବିଧାୟକ ଦଳକୁ ବିଜେପିରେ ମିଶ୍ରଣ ଲାଗି ପତ୍ର ଦେଇଥିଲେ। ଗୋଆ ବିଧାନସଭାରେ ଏମଜିପିର ୩ଜଣ ବିଧାୟକ ଥିବାବେଳେ ଦୁଇଜଣ ବିଜେପିରେ ମିଶିଛନ୍ତି। ଏମଜିପିର ଅନ୍ୟତମ ବରିଷ୍ଠ ବିଧାୟକ ସୁଦିନ ଧାବଲିକର ବିଜେପିରେ ଯୋଗ ଦେବାକୁ ମନା କରିଛନ୍ତି। ଧାବଲିକର ଗୋଆ ସରକାରରେ ଉପମୁଖ୍ୟମନ୍ତ୍ରୀ ଅଛନ୍ତି। ଦଳର ଦୁଇ ବିଧାୟକ ବିଜେପିରେ ଯୋଗଦେବାର କିଛି ଘଣ୍ଟା ପରେ ଧାବଲିକରଙ୍କୁ ଉପମୁଖ୍ୟମନ୍ତ୍ରୀ ପଦରୁ ହଟାଇ ଦିଆଯାଇଛି। ସରକାର ବିରୋଧୀ କାର୍ଯ୍ୟ ଅଭିଯୋଗରେ ଧାବଲିକରଙ୍କୁ ମନ୍ତ୍ରୀ ପଦରୁ ହଟାଯାଇଥିବା ମୁଖ୍ୟମନ୍ତ୍ରୀ ପ୍ରମୋଦ ସାୱନ୍ତ କହିଛନ୍ତି। ଧାବଲିକରଙ୍କୁ ମନ୍ତ୍ରିମଣ୍ଡଳରୁ ହଟାଇବା ଲାଗି ମୁଖ୍ୟମନ୍ତ୍ରୀ କରିଥିବା ସୁପାରିସକୁ ରାଜ୍ୟପାଳ ମୃଦୁଲା ସିହ୍ନା ଅନୁମୋଦନ କରିଛନ୍ତି। ଅନ୍ୟପକ୍ଷେ ଦୀପକ ପାୱାଶକର ନୂଆ ମନ୍ତ୍ରୀ ଭାବେ ସରକାରରେ ସାମିଲ ହୋଇଛନ୍ତି। ଏପ୍ରିଲ ୨୩ରେ ଗୋଆ ବିଧାନସଭାର ସିରୋଦା ଆସନ ପାଇଁ ଉପନିର୍ବାଚନ ହେଉଥିବାବେଳେ ବିଜେପି ଓ ଏମଜିପି ମେଣ୍ଟ କରିବାକୁ ନିଷ୍ପତ୍ତି ନେଇଛନ୍ତି। ତେବେ ସୁଦିନ ତାଙ୍କ ଭାଇ ଦୀପକଙ୍କୁ ଏଠାରେ ଅଲଗା ପ୍ରାର୍ଥୀ କରିଛନ୍ତି। ମେଣ୍ଟ ସତ୍ତ୍ବେ ପ୍ରାର୍ଥୀ ପ୍ରତ୍ୟାହାର କରିବାକୁ ସୁଦିନଙ୍କ ଭାଇ ମନା କରିଥିଲେ। ଏମଜିପିର ଦୁଇ ବିଧାୟକ ବିଜେପିରେ ମିଶିବା ପରେ ବିଧାନସଭାରେ ଦଳର ସଂଖ୍ୟା ୧୪ ହୋଇଛି। ୪୦ ଆସନ ବିଶିଷ୍ଟ ଗୋଆ ବିଧାନସଭାରେ ଏବେ ୩୬ ସଦସ୍ୟ ଅଛନ୍ତି। ଏଥିରେ କଂଗ୍ରେସ ଓ ବିଜେପିର ସଂଖ୍ୟା ୧୪ ଲେଖାଏଁ ହୋଇଥିବାବେଳେ ଜିଏଫପିର ୩, ସ୍ବାଧୀନ ୩, ଏନସିପି ୧ ଓ ଏମଜିପି ୧।
Popular Categories
Previous article
Next article