ଡେସ୍କ: ଓଡିଶା ବିଧାନସଭାରେ ମଙ୍ଗଳବାର ୧୨ ଜଣ କଂଗ୍ରେସ ବିଧାୟକଙ୍କୁ ସେମାନଙ୍କ ବିଶୃଙ୍ଖଳିତ ଆଚରଣ ପାଇଁ ନିଲମ୍ବନ କରାଯାଇଥିବା ବେଳେ ପରିସ୍ଥିତି ବିଗିଡ଼ିବା ନେଇ ଆଶଙ୍କା ପ୍ରକାଶ ପାଇଛି। ପୁଲିସ ପକ୍ଷରୁ ବିଧାନସଭା ବାହାରେ ଧାରା ୧୬୩ ଲାଗୁ କରାଯାଇଥିବା ବେଳେ ୫ ଜଣ ବରିଷ୍ଠ କଂଗ୍ରେସ ନେତା ତଥା ପୂର୍ବତନ ବିଧାୟକ ଓ ମନ୍ତ୍ରୀଙ୍କୁ ପୁଲିସ ଭିତରକୁ ଯିବାକୁ ନ ଦେବା ଫଳରେ କଂଗ୍ରେସ ସମର୍ଥକ ଓ ପୁଲିସ ମଧ୍ୟରେ ଠେଲାପେଲା ଭଳି ପରିସ୍ଥିତି ସୃଷ୍ଟି ହୋଇଛି।
ପୁଲିସ ପକ୍ଷରୁ ବ୍ୟାରିକେଡ଼ କରାଯାଇଥିବା ବେଳେ ବିଧାନସଭା ଭିତରେ କଂଗ୍ରେସର ନିଲମ୍ବିତ ୧୨ ବିଧାୟକ ଓ ତାରା ପ୍ରସାଦ ବାହିନୀପତି ଥିବା ବେଳେ ବାରିକେଡ଼ ବାହାରେ କଂଗ୍ରେସର ୫ ବରିଷ୍ଠ ନେତାଙ୍କ ସମେତ ଶହ ଶହ କର୍ମୀ ଧାରଣାରେ ବସିଛନ୍ତି। କଂଗ୍ରେସର ବରିଷ୍ଠ ନେତା ନରସିଂହ ମିଶ୍ର ଅଭିଯୋଗ କରିଛନ୍ତି ଯେ ବିଜେପି ପୁଲିସ ଜରିଆରେ ବଳ ପ୍ରୟୋଗ କରୁଛି ଓ ବିଧାନସଭା ଭିତରେ ଧାରଣାରତ ୧୨ ନିଲମ୍ବିତ ବିଧାୟକଙ୍କ ମଧ୍ୟରୁ କେତେଜଣ ଆହତ ମଧ୍ୟ ହୋଇଛନ୍ତି। ସେ କହିଛନ୍ତି ଯେ ପୂର୍ବତନ ବିଧାୟକ ମାନେ ବିଧାନସଭା ଭିତରକୁ ଯିବାର ନିୟମ ଥିବା ବେଳେ ପୁଲିସ ସେମାନଙ୍କୁ ଛାଡୁନାହିଁ। ଅନ୍ୟପକ୍ଷରେ ଏ ସମ୍ବନ୍ଧରେ ଜାଣିବା ପାଇଁ ବାଚସ୍ପତି ସୁରମା ପାଢ଼ୀଙ୍କୁ ଫୋନ ମାଧ୍ୟମରେ ଯୋଗାଯୋଗ କରିବାକୁ ନରସିଂହ ମିଶ୍ର ଚେଷ୍ଟା କରିଥିଲେ ମଧ୍ୟ ବାଚସ୍ପତି ଫୋନ ଉଠାଉନଥିବା ସେ କହିଛନ୍ତି। ଇତି ମଧ୍ୟରେ ବିଧାନସଭା ବାହାରେ ଧାରଣାରତ କେତେଜଣ କଂଗ୍ରେସ କର୍ମୀଙ୍କୁ ପୁଲିସ ବଳପୂର୍ବକ ଉଠାଇ ନେଇଥିବା କଂଗ୍ରେସ ଅଭିଯୋଗ କରିଛି। ଅନ୍ୟପକ୍ଷରେ ବିଧାନସଭା ଭିତରେ ଧାରଣାରତ ବିଧାୟକମାନେ ଭୋକ ଉପାସରେ ରହିଥିବା ବେଳେ କିଛି ବିଧାୟକଙ୍କ ସ୍ୱାସ୍ଥ୍ୟବସ୍ଥା ବିଗିଡି ଥିବା କଂଗ୍ରେସ କହିଛି।
Comments are closed.