ସତ୍ୟବାଦୀର ପ୍ରସିଦ୍ଧ ପଞ୍ଚସଖାଙ୍କ ଭିତରୁ ଆଚାର୍ଯ୍ୟ ହରିହର ଥିଲେ ଅନ୍ୟତମ। ଶିକ୍ଷକତା, ସ୍ୱାଧୀନତା ସଂଗ୍ରାମ, ଭୂଦାନ ବାର୍ତ୍ତା ପ୍ରଚାର, ଜନସେବା ଭଳି କ୍ଷେତ୍ରରେ ତାଙ୍କର ନିରବଚ୍ଛିନ୍ନ କାର୍ଯ୍ୟ ତାଙ୍କୁ ସ୍ମରଣୀୟ କରି ରଖିଛି। କୁଷ୍ଠରୋଗୀଙ୍କ ପାଇଁ ତାଙ୍କର ତ୍ୟାଗ ଓ ସମର୍ପଣର ପଟାନ୍ତର ନଥିଲା। ଏହି ଋଷିପ୍ରାଣ ବ୍ୟକ୍ତିତ୍ୱ ଭଗବତ୍ ଗୀତାର ଅନୁବାଦ ସହ ପିଲାଙ୍କ ପାଇଁ ‘ଚାଇଲ୍ଡ୍ସ ଇଜି ଫାଷ୍ଟ ଗ୍ରାମର’ ଆଦି ପୁସ୍ତକ ମଧ୍ୟ ରଚନା କରିଥିଲେ। ସେ ୧୮୭୯ରେ ସାକ୍ଷୀଗୋପାଳ ନିକଟସ୍ଥ ଶ୍ରୀରାମଚନ୍ଦ୍ରପୁରରେ ଜନ୍ମଗ୍ରହଣ କରିଥିଲେ।
ରେଭେନ୍ସା କଲେଜରୁ ଏଫ.ଏ. ପାସ୍ କଲା ପରେ ଆଇନ ଶିକ୍ଷା ପାଇଁ କଲିକତା ଯାଇଥିଲେ। ପୁରୀ ଜିଲା ସ୍କୁଲ, ନୀଳଗିରି ଗଡ଼ଜାତ ସ୍କୁଲ, ପ୍ୟାରୀମୋହନ ଏକାଡେମୀରେ ଶିକ୍ଷକତା କଲା ପରେ ସେ ସତ୍ୟବାଦୀ ବନବିଦ୍ୟାଳୟରେ ଜଣେ ଶିକ୍ଷକ ଭାବେ ଯୋଗ ଦେଇଥିଲେ ଯେଉଁଠି ସେ ‘ଆଚାର୍ଯ୍ୟ’ ରୂପେ ପରିଚିତ ଥିଲେ। ସ୍ୱାଧୀନତା ସଂଗ୍ରାମରେ ଯୋଗ ଦେଇ ସେ ବହୁବାର କାରାବରଣ କରିଛନ୍ତି। ମାନବସେବାକୁ ମାଧବସେବା ରୂପେ ସେ ଗ୍ରହଣ କରିଥିଲେ। ଦୁର୍ଗତ ମଣିଷଙ୍କର ସେବା, ବନ୍ୟା ବାତ୍ୟା ବେଳେ ସାହାଯ୍ୟ, ବହୁ ସଂସ୍କାରମୂଳକ କାର୍ଯ୍ୟ ସହ ଦେଶମାତୃକାର ଉନ୍ନତି ପାଇଁ ସେ ନିଜର ସମଗ୍ର ଜୀବନ ବ୍ୟୟ କରି ଦେଇଥିଲେ। ସେବା ଓ ତ୍ୟାଗର ଏହି ପ୍ରତିମୂର୍ତ୍ତିଙ୍କ ଉଦ୍ଦେଶ୍ୟରେ ଏ ଜାତିର ସଶ୍ରଦ୍ଧ ପ୍ରଣାମ।
