ନୂଆଦିଲ୍ଳୀ: ପାନ୍ କାର୍ଡରେ ପିତାଙ୍କ ନାମ ଉଲ୍ଳେଖ କରିବା ଆଉ ବାଧ୍ୟତାମୂଳକ ହେବ ନାହିଁ। ଏଥିଲାଗି ଉଦ୍ଦିଷ୍ଟ ଆୟକର ନିୟମ ୧୯୬୨ର ୧୪୪ ଧାରାରେ ଖୁବ୍ ଶୀଘ୍ର ସଂଶୋଧନ ଅଣାଯିବ। ସ୍ୱାମୀ ପରିତ୍ୟକ୍ତା, ଛାଡ଼ପତ୍ର ନେଇ ଏକାକିନୀ ରହୁଥିବା ମହିଳା, ବିଧବା ମାନଙ୍କ ସନ୍ତାନଙ୍କ ହିତକୁ ଦୃଷ୍ଟିରେ ରଖି ଉପରୋକ୍ତ ନିଷ୍ପତ୍ତି ନିଆଯାଇଥିବା ଜଣାପଡ଼ିଛି।
ପ୍ରଚଳିତ ନିୟମ ଅନୁଯାୟୀ, ପାନ୍ ପାଇଁ ଫର୍ମ ୪୯ ଏ ଓ ୪୯ ଏଏରେ ଆବେଦନ କରିବାକୁ ପଡ଼ୁଛି। ସେଥିରେ ନିଜ ନାମ, ଜନ୍ମତାରିଖ ସହିତ ପିତାଙ୍କ ନାମ ଉଲ୍ଲେଖ କରିବା ବାଧ୍ୟତାମୂଳକ ରହିଛି। କିନ୍ତୁ ଯେଉଁମାନଙ୍କ କ୍ଷେତ୍ରରେ କେବଳ ମାତା ହିଁ ଅଭିଭାବକ ଭାବେ ସ୍ୱୀକୃତ ସେମାନେ ଫର୍ମ ପୂରଣ କରିବା ବେଳେ ଅସୁବିଧାର ସମ୍ମୁଖୀନ ହେଉଛନ୍ତି। ଏ ସମ୍ପର୍କରେ ଆୟକର ବିଭାଗ ପାଖରେ ବହୁ ଅଭିଯୋଗ ଆସିବା ପରେ ଆଇନ୍ରେ ସଂଶୋଧନ କରିବା ପାଇଁ ଚିନ୍ତା କରାଯାଉଛି।
