ବୌଦ୍ଧ: ପଶ୍ଚିମ ଓଡ଼ିଶା ବିକାଶ ପରଷଦର ଅଧ୍ୟକ୍ଷ ଅସିତ ତ୍ରିପାଠୀ ଦିନିକିଆ ବୌଦ୍ଧଜିଲା ଗସ୍ତରେ ଆସି ପରିଷଦ ପାଣ୍ଠିରେ ଚାଲିଥିବା ବିଭିନ୍ନ ଉନ୍ନୟନ କାର୍ଯ୍ୟର ସମୀକ୍ଷା କରିଛନ୍ତି। ଶ୍ରୀ ତ୍ରିପାଠୀ ହେଲିକେପଟର ଯୋଗେ ଆସି ବୌଦ୍ଧ କଚେରୀ ଖେଳପଡିଆଠାରେ ଅବତରଣ କରିବାପରେ ଜିଲାପାଳ ସତ୍ୟରଂଜନ ସାହୁଙ୍କ ସମେତ ସମସ୍ତ ଜିଲାସ୍ତରୀୟ ଅଧିକାରୀ ତାଙ୍କୁ ସ୍ୱାଗତ କରିଥିଲେ। ଶ୍ରୀତ୍ରିପାଠୀ ବୌଦ୍ଧ ସର୍କିଟହାଉସଠାରେ ପହଞ୍ଚି ଜିଲାପାଳଙ୍କ ସହିତ କିଛି ସମୟ ଆଲୋଚନା କରିବାପରେ ଆଦର୍ଶ କୃଷକ ବଜାର ପରିଦର୍ଶନ କରି ସେଠାରେ ମିଶନ ଶକ୍ତି କାଫେ ଓ ମିଲେଟ ଶକ୍ତି କାଫେ ପରିଚାଳନା କରୁଥିବା ସ୍ୱୟଂସହାୟକ ଗୋଷ୍ଠୀର ମହିଳାମାନଙ୍କ ସହିତ ଆଲୋଚନା କରିଥିଲେ।
ମହିଳାମାନଙ୍କ ଉଦ୍ୟମକୁ ଶ୍ରୀ ତ୍ରିପାଠୀ ପ୍ରଶଂସା କରିବା ସହିତ ମିଳିତ ଭାବରେ ମହିଳା ଗୋଷ୍ଠୀଙ୍କ ବ୍ୟବସାୟ ଓ ସଫଳତାକୁ ନେଇ ଖୁସିବ୍ୟକ୍ତ କରିଥିଲେ। ପରେ ପରେ ଶହେ କୋଟି ଟଙ୍କା ବ୍ୟୟରେ ନିର୍ମାଣାଧିନ ତିନିଶହ ଶଯ୍ୟା ବିଶିଷ୍ଟ ଆଧୁନିକ ଚିକିତ୍ସାଳୟ କାର୍ଯ୍ୟ ପରିଦର୍ଶନ କରି ଅଗ୍ରଗତି ସଂପର୍କରେ ସମୀକ୍ଷା କରିଥିଲେ। ନିର୍ମାଣ କାର୍ଯ୍ୟରେ ବିଳମ୍ବ ହେଉଥିବାରୁ ଠିକା ସଂସ୍ଥାର କାର୍ଯ୍ୟକର୍ତ୍ତାଙ୍କୁ ତାଗିଦ କରିବା ସହିତ ଯାହା ବି ସମସ୍ୟା ଅଛି ଜିଲାପ୍ରଶାସନ ସହିତ ଆଲୋଚନା ମାଧ୍ୟରେ ତାହାର ସମାଧାନ କରି ଧାର୍ଯ୍ୟ ସମୟ ୨୦୨୩ ଶେଷ ସୁଦ୍ଧା ପ୍ରକଳ୍ପ ସଂପୁର୍ଣ୍ଣ କରିବାକୁ ପରାମର୍ଶ ଦେଇଥିଲେ।
ବୌଦ୍ଧ ପୁରୁଣା ଜେଲ କୋଠା ମଧ୍ୟରେ ୨୦ ଶଯ୍ୟା ବିଶିଷ୍ଟ ନୂତନ ପ୍ରସ୍ତାବିତ କ୍ରିଟିକାଲ କିଡନୀ ଡାୟୋଲେସିସ କେନ୍ଦ୍ର ସ୍ଥାପନ ପାଇଁ ପଶ୍ଚିମ ଓଡ଼ିଶା ବିକାଶ ପରିଷଦ ପକ୍ଷରୁ ୧ କୋଟି ଟଙ୍କାର ଅନୁଦାନ ଯୋଗାଇ ଦିଆଯାଇଥିବାବେଳେ ଏହାର ଅଗ୍ରଗତି ସମ୍ପର୍କରେ ସମୀକ୍ଷା କରି ନୂତନ ପରିକଳ୍ପନା ପାଇଁ ଜିଲା ପ୍ରଶାସନର ପ୍ରଶଂସା କରିବା ସହିତ ମାସକ ମଧ୍ୟରେ ଏହା କାର୍ଯ୍ୟକ୍ଷମ କରିବାକୁ ନିର୍ଦ୍ଦେଶ ଦେଇଥିଲେ। ଏହାପରେ ମହାନଦୀ ବ୍ରିଜଛକ ନିକଟରେ ୫ କୋଟି ୫୦ ଲକ୍ଷ ଅନୁଦାନରେ ୭୫୦ ଆସନ ବିଶିଷ୍ଟ ନିର୍ମାଣାଧିନ ପଶ୍ଚିମା ଭବନ କାର୍ଯ୍ୟ ପରିଦର୍ଶନ କରି ସନ୍ତୋଷ ବ୍ୟକ୍ତି କରିବା ସହିତ ନିୟମିତ ଭାବରେ ଏନଏସି ନିର୍ବାହୀ ଅଧିକାରୀ ଓ କନିଷ୍ଠ ଯନ୍ତ୍ରୀ କାର୍ଯ୍ୟ ତଦାରଖ କରିବାକୁ ପରାମର୍ଶ ଦେଇଥିଲେ।
ଜିଲା ସଂଗ୍ରହାଳୟ ପାଇଁ ୧ କୋଟି ଟଙ୍କା ଅନୁଦାନ ଖର୍ଚ୍ଚ ହୋଇଥିବାବେଳେ ତାହାର ସମୀକ୍ଷା କରିଥିଲେ। ସେହିପରି ପଶ୍ଚିମ ଓଡ଼ିଶା ବିକାଶ ପରିଷଦ ପରିବେଶ ପାର୍କ, ବୀରନରସିଂହପୁର ପାଇଁ ୪ କୋଟି ଟଙ୍କାର ଅନୁଦାନ ଖର୍ଚ୍ଚର ସମୀକ୍ଷା କରିଥିଲେ। ଚାରିଛକଠାରେ ୧କୋଟି ୩୭ ଲକ୍ଷ ଅନୁଦାନରେ ୫ କିଲୋ ଲିଟର ର ପ୍ରସ୍ତାବିତ ଦୁଗ୍ଦ ଶିତଳୀକରଣ କେନ୍ଦ୍ରର ଅଗ୍ରଗତି ସଂପର୍କରେ ସମୀକ୍ଷା କରିଥିଲେ। କ୍ଷେତ୍ର ପରିଦର୍ଶନ ସାରି ଜିଲ୍ଲାପାଳଙ୍କ କାର୍ଯ୍ୟାଳୟସ୍ଥିତ ସଦଭାବନା ଗୃହଠାରେ ଆୟୋଜିତ ସମୀକ୍ଷା ବୈଠକରେ ଯୋଗଦେଇ ଜିଲ୍ଲାରେ ଅର୍ଥନୈତିକ ଓ ସାମାଜିକ ସ୍ଥିତି ନେଇ ଜିଲ୍ଲାସ୍ତରୀୟ ଅଧିକାରୀମାନଙ୍କ ସହ ସମୀକ୍ଷା କରିଥିଲେ। ବୈଠକରେ କୃଷି,ଉଦ୍ୟାନ,ମତ୍ସ୍ୟ,ପଶୁପାଳନ,ଗୋଷ୍ଠୀ ଉନ୍ନୟନ,ପାନୀୟଜଳ ଯୋଗାଣ,ଜଳସେଚନ,ସ୍ୱାସ୍ଥ୍ୟ ବିଭାଗ,ଗ୍ରାମ୍ୟ ଉନ୍ନୟନ, ଟାଟା ପାୱାର, ଆତ୍ମ ନିଯୁକ୍ତି,ଆରସେଟି,ଆରଏମସି ଓ ମିଶନ ଶକ୍ତି ବିଭାଗର କାର୍ଯ୍ୟକ୍ରମ ନେଇ ସମୀକ୍ଷା କରିଥିଲେ। ପଶ୍ଚିମ ଓଡ଼ିଶା ବିକାଶ ପରିଷଦ ପକ୍ଷରୁ ବିଭିନ୍ନ ପ୍ରକାର ଉନ୍ନୟନ ପ୍ରକଳ୍ପ କାର୍ଯ୍ୟ ହାତକୁ ନିଆଯାଇଛି।
କେବଳ ଧାନ ଚାଷ ନୁହେଁ ଉଦ୍ୟାନ କୃଷି, ଦୁଗ୍ଧ ଉତ୍ପାଦନ ଓ ମତ୍ସ୍ୟଚାଷ ଉପରେ ଗୁରୁତ୍ୱ ଦେବା ସହିତ ବ୍ୟବସାୟୀକ ଭିତିରେ କାର୍ଯ୍ୟକ୍ରମ ହାତକୁ ନେବାକୁ ଶ୍ରୀ ତ୍ରିପାଠୀ ପରାମର୍ଶ ଦେଇଥିଲେ। ସମୀକ୍ଷା ବୈଠକ ପରେ ଶ୍ରୀ ତ୍ରୀପାଠୀ ଜିଲାପାଳଙ୍କ କାର୍ଯ୍ୟାଳୟ ମଧ୍ୟରେ କର୍ମଚାରୀମାନେ ଶାରିରୀକ ଭାବରେ ସୁସ୍ଥ ରହିବା ପାଇଁ ନୂତନ ଭାବରେ ମିଶନ ଶକ୍ତିର ମହିଳା ଗୋଷ୍ଠୀଙ୍କ ଦ୍ୱାରା ପରିଚାଳିତ ଫିଟନେସ ସେଣ୍ଟରକୁ ଦେଖି ଖୁସି ବ୍ୟକ୍ତି କରିବା ସହିତ ରାଜ୍ୟରେ ଏହା ଏକ ନୂଆ ପରିକଳ୍ପନା ବୋଲି ଜିଲା ପ୍ରଶାସନର ପ୍ରଶଂସା କରିଥିଲେ। ଆୟୋଜିତ ସମୀକ୍ଷା ବୈଠକରେ ଜିଲ୍ଲାପାଳ ସତ୍ୟରଂଜନ ସାହୁ ସ୍ୱାଗତ ଭାଷଣ ପ୍ରଦାନ କରିଥିବାବେଳେ ଜିଲାପରିଷଦ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଅଶ୍ୱିନୀ କୁମାର ମେହେର ଧନ୍ୟବାଦ ପ୍ରଦାନ କରିଥିଲେ। ବୈଠକରେ ଅନ୍ୟମାନଙ୍କ ମଧ୍ୟରେ ପଶ୍ଚିମ ଓଡ଼ିଶା ବିକାଶ ପରିଷଦର ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଡା. ଅଜିତ କୁମାର ମିଶ୍ର, ବୈଷୟିକ ପରାମର୍ଶଦାତା ସୁନୀଲ କୁମାର ନାୟକ, ସଦସ୍ୟ ସୁବୋଧ କୁମାର ପ୍ରଧାନ,ଅତିରିକ୍ତ ଜିଲାପାଳ ଦାରିଦ୍ର୍ୟଭଞ୍ଜନ ମଦନ ମୋହନ ପାତ୍ର, ଉପଜିଲାପାଳ ରବୀନ୍ଦ୍ରନାଥ କହଁର, ଜିଲା ମୁଖ୍ୟଚିକିତ୍ସା ଅଧିକାରୀ ଡା. ଜୟକୃଷ୍ଣ ମିଶ୍ର, ଉପନିର୍ଦ୍ଦେଶକ ଜିଲା ଯୋଜନା ଓ ସମନ୍ୱୟ ବିଭାଗ ଇଂ. ଇମାନୁଏଲ ସୋରେନଙ୍କ ସମେତ ସମସ୍ତ ଜିଲାସ୍ତରୀୟ ଅଧିକାରୀମାନେ ଯୋଗଦେଇଥିଲେ।
Comments are closed.