ରାଷ୍ଟ୍ର ଗଠନରେ ଯୁବପ୍ରସ୍ତୁତି ପ୍ରଶିକ୍ଷଣ ଶିବିର

ସମ୍ବଲପୁର : ସମ୍ବଲପୁରର ଜିଲା ସାର୍ବଜନୀନ ପାଠାଗାର ଠାରେ ରାଷ୍ଟ୍ର ଗଠନରେ ଯୁବ ପ୍ରସ୍ତୁତି ଧାରାବାହିକ ପ୍ରଶିକ୍ଷଣ ଶିବିରର ତ୍ରୟୋବିଂଶ ସପ୍ତାହ କାର୍ଯ୍ୟକ୍ରମ ରବିବାର ଆୟୋଜିତ ହୋଇଯାଇଛି। ମାଁ ବାଗଦେବୀ ପୂଜା ଓ ବିଶ୍ୱଶାନ୍ତି ପ୍ରାର୍ଥନା ପରେ ମରକ୍କୋ ଠାରେ ଭୂକମ୍ପରେ ପ୍ରାଣ ହରାଇଥିବା ଲୋକଙ୍କ ପାଇଁ ୨ ମିନିଟର ନୀରବ ପ୍ରାର୍ଥନା କରାଯାଇଥିଲା। ପ୍ରଥମ ଅଧିବେଶନରେ ବରିଷ୍ଠ ଶିକ୍ଷକ ହରି ନାରାୟଣ ପଣ୍ଡା ସାହସ ଓ ଦୁଃସାହସର ବିଭିନ୍ନ ଦିଗ ଉପରେ ତାଙ୍କର ଶିକ୍ଷାଦାନ କରି ପିଲାଙ୍କୁ ସାହାସୀ ହେବାକୁ ଆହ୍ୱାନ ଦେଇଥିଲେ । ସେହିଭଳି ଦ୍ୱିତୀୟ ଅଧିବେଶନରେ ଚକ୍ଷୁ ବିଶେଷଜ୍ଞ ଡା. ସୁରେଶ ଚନ୍ଦ୍ର ଦାନୀ ମଣିଷର ଅଙ୍ଗ ମାନଙ୍କର ମଧ୍ୟ ଚକ୍ଷୁର ଗୁରୁତ୍ୱ ଓ ଏହାର ଯତ୍ନ ଉପରେ ବିଭିନ୍ନ ଉଦାହରଣ ସହ ବୁଝାଇବା ସହିତ ପିଲାଙ୍କୁ ଏହି ଦିଗରେ ଯତ୍ନବାନ ହେବାକୁ ପରାମର୍ଶ ଦେଇଥିଲେ। କାର୍ଯ୍ୟକ୍ରମର ସଂଯୋଜକ ରାଜେନ୍ଦ୍ର କୁମାର ପଣ୍ଡା, ସମଗ୍ର ବ୍ୟବସ୍ଥାକୁ ପରିଚାଳନା କରିଥିବା ବେଳେ ପିଲା ମାନଙ୍କୁ ଉତ୍ସାହିତ କରିବା ପାଇଁ ପ୍ର. ଆଦିତ୍ୟ ପ୍ରସାଦ ପାଢ଼ୀ, ରଘୁନାଥ ମିଶ୍ର, ପ୍ର. ରବି ନାରାୟଣ ପଣ୍ଡା, ଅର୍ଜୁନ ରଞ୍ଜନ ପଣ୍ଡା, ଡ. ଗିରିଧାରୀ ହୋତା, ଡ. ଜୟଦେବ ମେହେର, ବିଭୁତି ନାରାୟଣ ମାଝୀ, ଗୋଲକ ବିହାରୀ ମିଶ୍ର, ଶିବ ଶଙ୍କର ଷଡଙ୍ଗୀ, ଗୋପୀନାଥ ମିଶ୍ର, ଉଦିତ ଚନ୍ଦ୍ର ପାଟ୍ଟଯୋଶୀ ପ୍ରମୁଖ ଉପସ୍ଥିତ ରହିଥିଲେ।  ବିଜୟ କୁମାର ସାହୁ ଓ ସୁନନ୍ଦ ପ୍ରଧାନ ବୈଷୟିକ ସାହାଯ୍ୟ ପ୍ରଦାନ କରିଥିବା ବେଳେ ଆଜିର ପ୍ରଶିକ୍ଷଣ ଶିବିରରେ ୧୨ଟି ହାଇସ୍କୁଲର ୨୫ ଜଣ ଛାତ୍ରଛାତ୍ରୀ ଯୋଗ ଦେଇଥିଲେ। ଶେଷରେ ଧନ୍ୟବାଦ ଅର୍ପଣ ସହିତ ଜାତୀୟ ସଙ୍ଗୀତ ଗାନ ପରେ କାର୍ଯ୍ୟକ୍ରମ ଶେଷ ହୋଇଥିଲା।