ଆଠଗଡ : ବ୍ରହ୍ମପୁର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ଅଧିନ ମେଘା ସେକ୍ଟରର ଗାଁ କଲ୍ୟାଣ ସମିତି ସମୂହ ଆନୁକୁଲ୍ୟରେ ଯୋରନ୍ଦା ସ୍ୱାସ୍ଥ୍ୟ ଆରୋଗ୍ୟ କେନ୍ଦ୍ରଠାରେ ବିଶ୍ୱ ଆୟୋଡିନ ଅଭାବଜନିତ ଦିବସ ପାଳନ ଅବସରରେ ଜନସାଧାରଣଙ୍କୁ ସଚେତନ କରାଯାଇଥିଲା। ବରିଷ୍ଠ ବହୁମୁଖୀ ସ୍ୱାସ୍ଥ୍ୟ ପରିଦର୍ଶକ ମହମ୍ମଦ ଅସଲମ ଆମ ଶରୀର ପାଇଁ ଆୟୋଡିନ ଯୁକ୍ତ ଲୁଣର ଆବଶ୍ୟକତା ଓ ଉପକାରିତା ସଂପର୍କରେ ଲୋକଙ୍କୁ ବିସ୍ତୃତ ଭାବେ ବୁଝାଇଥିଲେ। ଖାଦ୍ୟରେ ଆୟୋଡିନ ଭାଗ କମିଲେ ପାଚନକ୍ରିୟାରେ ବ୍ୟାଘାତ ଘଟେ ଏବଂ ଏଥିଯୋଗୁଁ ଥାଇରଏଡ ରୋଗ ହୋଇଥାଏ । ସମୁଦ୍ରକୂଳ ଅଞ୍ଚଳରେ ପ୍ରଚୁରମାତ୍ରାରେ ଆୟୋଡିନ ଥାଏ, କିନ୍ତୁ ପଶ୍ଚିମ ଓଡିଶା ଓ ପାର୍ବତ୍ୟ ଅଞ୍ଚଳରେ ଆୟୋଡିନର ଅଭାବ ଯୋଗୁଁ ଥାଇରଏଡ ସମେତ ଅନ୍ୟାନ୍ୟ ରୋଗ ସୃଷ୍ଟି ହୋଇଥାଏ । ତେଣୁ ହସିଲା ସୂର୍ଯ୍ୟ ଚିହ୍ନ ଥିବା ଆୟୋଡିନଯୁକ୍ତ ଲୁଣ ନିୟମିତ ଖାଇବା ଲାଗି ଶ୍ରୀ ଅସଲମ ପରାମର୍ଶ ଦେଇଥିଲେ। ବିଶେଷକରି ଗର୍ଭବତୀ ମାଆମାନେ ଗର୍ଭାବସ୍ଥାରେ ଆୟୋଡିନଯୁକ୍ତ ଲୁଣ ଖାଇଲେ ଜନ୍ମ ହେବାକୁ ଥିବା ଶିଶୁର ମାନସିକ ଓ ଶାରୀରିକ ବିକାଶ ଠିକ୍ ଭାବରେ ହୋଇଥାଏ ବୋଲି ସେ କହିଥିଲେ। ଏହି କାର୍ଯ୍ୟକ୍ରମରେ ବ୍ରହ୍ମପୁର ସିଏଚସି ବ୍ଲକ ଯୋଜନା ସଂଯୋଜିକା ଅପର୍ଣ୍ଣା ମହାପାତ୍ରଙ୍କ ସମେତ ସମସ୍ତ ସ୍ୱାସ୍ଥ୍ୟକର୍ମୀ ଅଙ୍ଗନବାଡି ଓ ଆଶାକର୍ମୀ ଏବଂ ଗାଁ କଲ୍ୟାଣ ସମିତିର ସଭ୍ୟମାନେ ଯୋଗଦେଇ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିବା ସହିତ ଏକ ସଚେତନତା ଶୋଭାଯାତ୍ରାରେ ଗ୍ରାମ ପରିକ୍ରମା କରିଥିଲେ।
Comments are closed.