ବିଶ୍ୱ ଏବେ ଭାରତର ସାମର୍ଥ୍ୟକୁ ହୃଦବୋଧ କରିଛି- ପ୍ରଧାନମନ୍ତ୍ରୀ ମୋଦି

ନୂଆଦିଲ୍ଲୀ: କୋଭିଡ ମୁକାବିଲା କ୍ଷେତ୍ରରେ ଭାରତ ନିଜର ନିରଳସ ଓ ନିରବଚ୍ଛିନ୍ନ ପ୍ରୟାସ ଜାରି ରଖି ୧୦୦ କୋଟି ପାନ ଟିକାକରଣର ସଫଳତା ହାସଲ କରିବାପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁକ୍ରବାର ଦେଶବାସୀଙ୍କୁ ଉଦବୋଧନ ଦେଇ ଏହି ଅଭିଯାନ ଉତ୍କଣ୍ଠାରୁ ଆଶ୍ୱାସନା ପର୍ଯ୍ୟନ୍ତ ଏକ ଯାତ୍ରା ବୋଲି କହିଛନ୍ତି । ପ୍ରଧାନମନ୍ତ୍ରୀ କହିଥିଲେ ଯେ ଏହି ସଫଳତା ହାସଲ ପରେ ସମୁଦାୟ ବିଶ୍ୱ ସଂପ୍ରତି ଭାରତର ସାମର୍ଥ୍ୟକୁ ହୃଦବୋଧ କରିଛି ।
ଭାରତର ସାମର୍ଥ୍ୟକୁ ନେଇ ଅନେକ ସମାଲୋଚକ ସନ୍ଦେହ ବ୍ୟକ୍ତ କରିଥିବାବେଳେ ମାତ୍ର ୯ ମାସ ମଧ୍ୟରେ ୧୦୦ କୋଟି ପାନ ଟିକାକରଣ କରାଯାଇପାରିଛି । ତେବେ ଏହାଦ୍ୱାରା କରୋନା ଭୟ ଦୂର ହୋଇନାହିଁ । ଘରୁ ବାହାରକୁ ବାହାରିଲେ ଆମେ ଯେଉଁଭଳି ଭାବରେ ପାଦରେ ଜୋତା କିମ୍ବା ଚପଲ ପିନ୍ଧି ବାହାରୁଛୁ, ଠିକ ସେହିଭଳି ଘରୁ ବାହାରିଲେ ମୁହଁରେ ମାସ୍କ ନିତାନ୍ତ ଜରୁରୀ ଏବଂ ଏହାକୁ ଏକ ଅଭ୍ୟାସରେ ପରିଣତ କରିବାକୁ ପ୍ରଧାନମନ୍ତ୍ରୀ କହିଛନ୍ତି । ଦେଶର ୧୩୦ କୋଟି ଜନସାଧାରଣଙ୍କ ଉଦ୍ୟମ ଯୋଗୁଁ ଏହି ସଫଳତା ମିଳିପାରିଛି । ୧୦୦ କୋଟି କେବଳ ଏକ ସଂଖ୍ୟା ନୁହେଁ, ଏହା ଆମର ପାରିବାରପଣିଆକୁ ପ୍ରତିଫଳିତ କରୁଛି । ପ୍ରଧାନମନ୍ତ୍ରୀ ଏହି ଅବସରରେ କହିଥିଲେ ଯେ ଏହା ନୂଆ ଭାରତର ଚିତ୍ର । ଏକ ଜଟିଳ ଲକ୍ଷ୍ୟ ସ୍ଥାପନ କରି ତାହା କିଭଳି ହାସଲ କରାଯାଏ ତାହା ଆମେ ଜାଣିଛୁ । ଅନେକ ଲୋକ ଆମର ଟିକାକରଣ ଅଭିଯାନକୁ ଅନ୍ୟ ରାଷ୍ଟ୍ରଗୁଡିକ ସହିତ ତୁଳନା କରୁଛନ୍ତି । ଭାରତର ଟିକାକରଣ କାର୍ଯ୍ୟକ୍ରମ ବିଜ୍ଞାନ ଦ୍ୱାରା ସୃଷ୍ଟି, ବିଜ୍ଞାନ ଦ୍ୱାରା ପରିଚାଳିତ ଏବଂ ବିଜ୍ଞାନ ଆଧାରିତ, ଯାହା ଆମମାନଙ୍କ ପାଇଁ ଗର୍ବର ବିଷୟ ହୋଇଛି । ଭାରତ ଆରମ୍ଭ କରିଥିବା କୋୱିନ ପ୍ଲାଟଫର୍ମ ସଂପ୍ରତି ସାରା ବିଶ୍ୱର ଦୃଷ୍ଟି ଆକର୍ଷଣ କରୁଛି । ସେ କହିଥିଲେ ଯେ ମାଗଣା ଟିକାକରଣ ଅଭିଯାନ ଯୋଗୁଁ ବ୍ୟାପକ ପ୍ରଭାବ ପରିଲକ୍ଷିତ ହୋଇଛି । ଟିକାକରଣରେ କାହା ପ୍ରତି ଭେଦ ଭାବ କରାଯାଇନାହିଁ ।