ସ୍ୱାମୀ ମୃତ୍ୟୁର ଦୁଇ ବର୍ଷ ପରେ ବି ମିଳୁନି ବିଧବା ଭତ୍ତା: ୪ ଶିଶୁଙ୍କୁ ନେଇ ଦୁଃଖରେ ବିତୁଛି ସୀତାମେ ମାଝୀଙ୍କ ଦିନ

ଲାଞ୍ଜିଗଡ: ସ୍ବାମୀ ଆରପାରିକୁ ଯିବାର ୨ ବର୍ଷ ବିତିଗଲାଣି କିନ୍ତୁ ବିଧବା ଭତ୍ତା କିମ୍ବା ହରିଷଚନ୍ଦ୍ର ଯୋଜନାରେ ଅର୍ଥର ସହଯୋଗ ମିଳିପାରିଲାନି । ଆଖିର ଲୁହ, ପେଟର ଭୋକ, ହୃଦୟର ଅସହ୍ୟ ବେଦନା ଓ ଦାରିଦ୍ର୍ୟର କଷାଘାତରେ ୪ ଶିଶୁଙ୍କୁ ନେଇ ଚାଲିଛି ଜୀବନ ଯାତ୍ରା । ଆମେ କହୁଛୁ ଲାଞ୍ଜିଗଡ ବ୍ଲକ ମାଳିଯୁବାଙ୍ଗ ପଞ୍ଚାୟତର ସୁନାଖଡିକା ଗାଁର ସ୍ବର୍ଗତ ଡ୍ରିକା ମାଝୀଙ୍କ ବିଧବା ପତ୍ନୀ ସୀତାମେ ମାଝୀଙ୍କ କଥା । ୫୦ ବର୍ଷ ବୟସରେ ସ୍ବାମୀଙ୍କୁ ହରାଇ ପୁରା ଭାଙ୍ଗି ପଡିଥିଲେ ସୀତାମେ । ଏପଟେ ୪ଟି ଶିଶୁଙ୍କ କରୁଣ ମୁହଁ । ସେମାନଙ୍କ ମୁହଁରେ ଆହାର ଦେବାକୁ ଘରେ କିଛି ନାହିଁ । ଦିନ ମଜୁରିଆ ସ୍ବାମୀଙ୍କ ସଞ୍ଚିତ କିମ୍ବା ସ୍ଥାବର ଆସ୍ଥାବର ସମ୍ପତ୍ତି କିଛି ନଥିଲା । ଆହା ସାହା ହେବାକୁ ମଧ୍ୟ କେହି ନାହିଁ । ମାଟି, ଝାଟି ଘରେ ୪ ଶିଶୁଙ୍କୁ ନେଇ ପଡି ରହିଲେ ଅସହାୟ ସୀତାମେ । ପର ପାଖରେ ଯାଇ କାମଦାମ କରି ଯାହା ପାଆନ୍ତି ସେଥିରେ କଷ୍ଟେ ମଷ୍ଟେ ଚଳିଯାଆନ୍ତି । ସମୟ ସମୟରେ ଭୋକରେ ମଧ୍ୟ ରହିବାକୁ ହୁଏ । ତାଙ୍କୁ ବିଧବା ଭତ୍ତା ପାଇଁ ସୀତାମେ ନିଜ ୪ ସନ୍ତାନକୁ ଛାଡି ପଞ୍ଚାୟତକୁ ଏକ ବର୍ଷ ହେଲା ଦୌଡ଼ୁଛନ୍ତି। ଗରିବ ବିଧବା ମହିଳାଙ୍କୁ ତୁମ ଭତ୍ତା ଏହି ମାସରେ ହୋଇଯିବ, ଆରମାସରେ ହୋଇଯିବ ବୋଲି କହି ପଞ୍ଚାୟତ ପିଇଓ ବାରମ୍ବାର କାଗଜପତ୍ର ନେଇ ରଖୁଛନ୍ତି। କିନ୍ତୁ ଆଜି ପର୍ଯ୍ୟନ୍ତ ହୋଇ ପାରୁନାହିଁ। ଦୁର୍ଗମ ଅଞ୍ଚଳ ନିଜ ସୁନାଖଡିକା ଗାଁଠାରୁ ବ୍ଳକ ମହକୁମା ୫୦ କିମି ଦୂରରେ ରହିଥିବା ବେଳେ ନିଜ ୪ ସନ୍ତାନକୁ ଛାଡି ବ୍ଲକ କର୍ତ୍ତୃପକ୍ଷଙ୍କ ଦ୍ବାରସ୍ଥ ହୋଇ ପାରୁନାହାନ୍ତି ସୀତାମେ। ଭାଗ୍ୟକୁ ଆଦରି ଭଙ୍ଗା କୁଡିଆରେ ବିତୁଛି ଏହି ଅସହାୟ ମହିଳାଙ୍କ ଦିନ । ସୀତାମେଙ୍କୁ ତୁରନ୍ତ ସରକାରୀ ସହାୟତା ଯୋଗାଇ ଦେବାପାଇଁ ସୁନାଖଡିକା ଗ୍ରାମ ସମେତ ଅଞ୍ଚଳବାସୀ ଦାବି କରିଛନ୍ତି ।