ସମାଜ ଡିଜିଟାଲ ଡେସ୍କ: କାନାଡ଼ାର ନୂଆ ପ୍ରଧାନମନ୍ତ୍ରୀ ହେବାକୁ ଯାଉଛନ୍ତି ମାର୍କ କାର୍ନି। ସେ ଦେଶର କେନ୍ଦ୍ରୀୟ ବ୍ୟାଙ୍କର ପୂର୍ବତନ ଗଭର୍ଣ୍ଣର ବି ରହିଆସିଛନ୍ତି। ଗତ ମଙ୍ଗଳବାର ତାଙ୍କୁ ଶାସକ ଲିବେରାଲ ପାର୍ଟିର ନେତା ଭାବେ ଚୟନ କରାଯାଇଛି। ଏଥିପାଇଁ ହୋଇଥିବା ନିର୍ବାଚନରେ ତାଙ୍କୁ ୮୬ ପ୍ରତିଶତ ଭୋଟ ମିଳିଛି। ଜଷ୍ଟିନ ଟ୍ରୁଡୋଙ୍କ ଯୋଗୁ ଭାରତ-କାନାଡ଼ା ସମ୍ପର୍କ ସମ୍ପୂର୍ଣ୍ଣ ରୂପେ ବିଗିଡ଼ି ଯାଇଛି। ତେବେ ନୂଆ ପ୍ରଧାନମନ୍ତ୍ରୀ ଭାବେ ଦାୟିତ୍ଵ ସମ୍ଭାଳୁଥିବା କାର୍ନି ଭାରତ ପ୍ରତି କି ପ୍ରକାର ଚିନ୍ତାଧାର ରଖୁଛନ୍ତି ତାହା ଉପରେ ଏବେ ସମସ୍ତଙ୍କ ନଜର ରହିଛି। ନିର୍ବାଚନରେ ବିଜୟୀ ପରେ ସେ ଭାରତକୁ ନେଇ ମନ୍ତବ୍ୟ ମଧ୍ୟ ଦେଇଛନ୍ତି, ଯେଉଁଥିରେ ତାଙ୍କ ମନୋଭାବ ସକାରାତ୍ମକ ରହିଥିବା ଜଣାପଡ଼ୁଛି।
କାର୍ନି ଟ୍ରୁଡୋଙ୍କ ବିରୋଧରେ ମନ୍ତବ୍ୟ ଦେଇ କହିଛନ୍ତି, ସେ ଦାୟିତ୍ଵ ନେବା ପରେ ଭାରତ ସହିତ ସମ୍ପର୍କ ସୁଧାରିବା ଦିଗରେ କାର୍ଯ୍ୟ କରିବେ। ଯଦି ସୁଯୋଗ ମିଳେ, ତେବେ ସେ ଦୁଇ ଦେଶର ସମ୍ପର୍କକୁ ସୁଧାରି ଉଚିତ ମାର୍ଗକୁ ଆଣିବେ। କାନାଡ଼ା ପରି ବିଚାରଧାରା ରଖୁଥିବା ଦେଶଗୁଡ଼ିକ ସହିତ ସେ ବାଣିଜ୍ୟିକ ସମ୍ପର୍କ ସୁଦୃଢ଼ କରିବେ। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ବାଣିଜ୍ୟିକ ଯୁଦ୍ଧର ଚାପ ସମ୍ପର୍କରେ କାର୍ନି କହିଛନ୍ତି, ଭାରତ ସହିତ ସମ୍ପର୍କକୁ ପୁନର୍ବାର ସୁଦୃଢ଼ କରିବାର ଅବସର ମିଳିଛି। ସେ ଯଦି ପୂର୍ବରୁ ପ୍ରଧାନମନ୍ତ୍ରୀ ହୋଇଥାଆନ୍ତେ, ତେବେ ଏହି ସୁଯୋଗ ହରାଇ ନ ଥାଆନ୍ତେ।
