ସମାଜ ଡିଜିଟାଲ ଡେସ୍କ: ସନାତନ ଧର୍ମରେ ଓସ୍ତ ଗଛକୁ ବହୁତ ପବିତ୍ର ବିବେଚନା କରାଯାଏ । ବିଶ୍ୱାସ କରାଯାଏ ଯେ ସମସ୍ତ ଦେବୀ-ଦେବତା ମାନେ ବାସ କରନ୍ତି । ଏହି ଗଛକୁ ପୂଜା କରିବା ଦ୍ୱାରା ଅନେକ ଲାଭ ମିଳିଥାଏ । ଶନି ଦୋଷଠାରୁ ଆରମ୍ଭ କରି ସବୁ ସମସ୍ୟା ଦୂର ହୋଇଥାଏ । ଧର୍ମ ଅନୁସାରେ ଓସ୍ତ ଗଛକୁ ଅମାବାସ୍ୟା ଦିନ ହେଉ କି ପୂର୍ଣ୍ଣିମା ଦିନ ପୂଜା କରିଲେ ସ୍ୱତନ୍ତ୍ର ଲାଭ ମିଳିଥାଏ । କୁହାଯାଏ ଭଗବାନ ବିଷ୍ଣୁ ଏବଂ ମା ଲକ୍ଷ୍ମୀ ଏହି ଗଛରେ ବାସ କରୁଥିବାରୁ ଏହାକୁ ପୂଜା କରିବା ଦ୍ୱାରା ଅନେକ ଲାଭ ମିଳିବା ସହ ଆଶୀର୍ବାଦ ମିଳିଥାଏ । ବୈଜ୍ଞାନିକ ଆଧାରରେ ମଧ୍ୟ ଏହି ଗଛକୁ ଅନେକ ଗୁଣ ରହିଛି । ଏହି ଗଛରୁ ଦିନକୁ ୨୪ଘଣ୍ଟା ଅମ୍ଳଜାନ ନିର୍ଗତ ହୋଇଥାଏ, ଯାହାକି ମାନବ ସମାଜ ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ । ଅନେକ ସାଧୁ ସନ୍ଥମାନେ ଏହି ଗଛ ମୂଳରେ ତପସ୍ୟା କରିବା ସହ ଜ୍ଞାନ ଆହରଣ କରିଥାନ୍ତି ।
ଶ୍ୱାସକ୍ରିୟା ନେବାରେ ଓସ୍ତ ଗଛ ଆପଣଙ୍କ ପାଇଁ ଅତ୍ୟନ୍ତ ଲାଭଦାୟକ ହୋଇପାରେ । ଏଥିପାଇଁ ଓସ୍ତ ଗଛର ଛାଲକୁ ଚିରି ଭିତର ଅଂଶକୁ ବାହାର କରାଯାଇ ସୁଖାଇ ରଖାଯାଏ । ଏହାକୁ ଗୁଣ୍ଡ କରି ଖାଇବା ଦ୍ୱାରା ନିଶ୍ୱାସ-ପ୍ରଶ୍ୱାସ ନେବାରେ ଦେଖାଯାଉଥିବା ସମସ୍ୟା ଦୂର ହୋଇଥାଏ । ଏହି ଗୁଣ୍ଡକୁ କ୍ଷୀରରେ ମିଶାଇ ପିଇବା ଦ୍ୱାରା ଶ୍ୱାସ ରୋଗ ପାଇଁ ଲାଭଦାୟକ ସାବ୍ୟସ୍ତ ହୋଇଥାଏ । ଏହାସହିତ ଓସ୍ତ ଗଛରୁ ଆପଣ ଦାନ୍ତକାଠି ବ୍ୟବହାର କରିପାରିବେ । ଏହା ଦ୍ୱାରା ଦାନ୍ତ ରୋଗରୁ ଉପଷମ ମିଳିଥାଏ । ଯଦି ଆପଣଙ୍କୁ କିଛି ବିଷାକ୍ତ ପୋକ କିମ୍ବା ଜନ୍ତୁ କାମୁଡି ଦେଇଛି ତେବେ ଡାକ୍ତରୀ ଚିକିତ୍ସାରେ ବିଳମ୍ବ ହେଉଥିଲେ ଆପଣ ଓସ୍ତ ଗଛର ପତ୍ରରୁ ରସ ବାହାର କରି କ୍ଷତ ସ୍ଥାନରେ ଲଗାଇବା ଦ୍ୱାରା ଲାଭଦାୟକ ହୋଇଥାଏ ।
Comments are closed.