ରେଙ୍ଗାଲିକ୍ୟାମ୍ପ : ଅତାବିରା ବ୍ଳକ ଅନ୍ତର୍ଗତ ଜହ୍ନ।ପଡା ଅଞ୍ଚଳରେ ପାନୀୟ ଜଳଯୋଗାଣ ନିମନ୍ତେ ଏଲଏନଟି ପକ୍ଷରୁ କେନାଲ କଡରେ ରହିଥିବା ୩୦୦ ଏମଏମର ୧୧ ଗୋଟି ଲୁହା ପାଇପ ଚୋରି ହୋଇଥିବା ଅତାବିରା ଥାନାରେ କମ୍ପାନୀ କର୍ମଚାରୀ ହିତେଶ୍ୱର କର୍ମୀ ୧୯ ତାରିଖରେ ଅଭିଯୋଗ କରିଥିଲେ। ଏହି ଅଭିଯୋଗକୁ ଭିତ୍ତି କରି ଥାନା ଅଧିକାରୀ ଅନିଲ କୁମାର ପ୍ରଧାନଙ୍କ ତତ୍ତ୍ୱାବଧାନରେ ତଦନ୍ତ କରାଯାଇ ଚୋରି କରିଥିବା ୪ ଜଣକୁ ଗିରଫ କରାଯାଇଛି। ଏହା ସହିତ ଏଥିରେ ବ୍ୟବହୃତ ହୋଇଥିବା ଏକ ଟ୍ରକ, ବଲେରୋ,ବାଇକକୁ ଜବତ କରିବା ସହ ଚୋରି ହୋଇଥିବା ୧୧ ଗୋଟି ଲୁହା ପାଇପକୁ ଉଦ୍ଧାର କରାଯାଇଛି।
ଚୋରି କରିଥିବା ଅଭିଯୁକ୍ତ ମାନେ ହେଲେ ଦେବାହାଲ ଗ୍ରାମର ଦରପୋଡ଼ା ଭୋଇ(୩୪), ହୀରାକୁଦ ଥାନା ଅନ୍ତର୍ଗତ ଲରପଙ୍କ ଗ୍ରାମର ବିକାଶ ଓରାମ(୧୯), ବରଗଡ଼ ସଦର ଥାନା ଅନ୍ତର୍ଗତ ବାଲିଜୋରୀ ଗ୍ରାମର ଶିବା ସୁନା(୨୦), ବଲାଙ୍ଗିର ଜିଲ୍ଲା ପାଟଣାଗଡ଼ ଥାନା ଅନ୍ତର୍ଗତ ପୋଡ଼ଛପର ଗ୍ରାମର ନିବାସ ଧରୁଆ(୨୭) କୁ ଗିରଫ କରି କୋର୍ଟ ଚାଲାଣ କରାଯାଇଛି। ଚୋରି ହୋଇଥିବା ସାମଗ୍ରୀର ଆନୁମାନିକ ମୂଲ୍ୟ ୧ ଲକ୍ଷ ୭୬ ହଜାର ବୋଲି ପୋଲିସ ସୂତ୍ରରୁ ଜଣାପଡ଼ିଛି। ଏନେଇ ଅତାବିରା ଥାନାରେ ଆୟୋଜିତ ସାମ୍ବାଦିକ ସମ୍ମିଳନୀରେ ଏସଡିପିଓ ଅମରିତ କୁମାର ପଣ୍ଡା ସୂଚନା ପ୍ରଦାନ କରିବା ସହ ଅଧିକ ତଦନ୍ତ ଜାରି ରହିଛି ବୋଲି ସୂଚନା ଦେଇଛନ୍ତି ।
