ଗଡ଼ମଧୁପୁର: ଆଷାଢ ଯାଇ ଶ୍ରାବଣ ପଶିଲାଣି। ହେଲେ କ୍ଷେତରେ ପାଣି ନାହିଁ। ଠୋ ଠୋ ଶୁଖିଲା ପଡିଛି ବିଲ ବାଡି। ଯେଉଁ ସମୟରେ ଚଷାପୁଅ ଚାଷ କ୍ଷେତରେ ହଳଲଙ୍ଗଳ ଧରି କାଦୁଅ ସରସର ହୋଇ ଚାଷ କାମରେ ମାତିବା କଥା ଏବେ ସେଇଠି ମୁଣ୍ଡରେ ହାତ ଦେଇ ବସିଛି। ବଛା ବେଉଷଣ ହୋଇ ନ ପାରିବାରୁ ବିଲରେ ଏବେ ଗୋରୁ ଚରୁଲେଣି। ଯାଜପୁର ଜିଲ୍ଲା ଧର୍ମଶାଳା ତହସିଲ ଅଧିନ ତଳଗଡ ରାଜସ୍ୱ ଅନ୍ତର୍ଗତ ଭୁବନପୁର ଓ ମହୁଲଟିକର, ଶୁମାଶିର ଗହିର, କୁଲାବେଙ୍ଗିପାଟ ଆଦି ମୌଜାର ଶହ ଶହ ଏକର ଜମିରେ ଏବେ ଗୋରୁ ଚରୁଛନ୍ତି। ଚାଷି ଏ ବର୍ଷ ଘଣ୍ଟାକୁ ଟ୍ରାକ୍ଟର ଭଡା ୬୦୦ରୁ ୮୦୦ଶହ ପର୍ଯ୍ୟନ୍ତ ଦେଇ ବାହାରୁ ବିହନ ଉଚା ଦରରେ କିଣି ବିଲରେ ବୁଣିଥିଲେ। ୬୦ ଦିନରେ ଅମଳ ହେବାର ଏହି ଧାନଚାଷ ପାଇଁ ଠିକ ସମୟରେ ପାଣିର ଅଭାବ କାରଣରୁ ଲୋକେ ବିଲ ଉଠିଆ କରିପାରିଲେ ନାହିଁ। ଗୋରୁ ଗାଇ ଛାଡି ଫସଲ ଉଜାଡିବାକୁ ବାଧ୍ୟ ହେଲେ। ଲଗାତର ଦୁଇ ବର୍ଷ ଧରି ଏହି ମୌଜାରେ ସ୍ୱଳ୍ପବୃଷ୍ଟି ହେବାରୁ ବିଲ ପଡିଆ ପଡିଛି। ଏ ପରିକି ବିହନ ବୁଡୁ ଗଲାଣି। ଗତ ବର୍ଷ ବିହନ ବୁଡିଯାଇଥିବାରୁ ଏ ବର୍ଷ ଏଠୁ ସେଠୁ ଚଢା ଦରରେ ବିହନ କିଣି ବିଲ ଉଠିଆ କରାଯାଇଥିଲା। କିନ୍ତୁ ଦଇବ ଦାଉକୁ ଏବର୍ଷ ମଧ୍ୟ ବିଲରେ ପାଣି ଅଭାବ କାରଣରୁ ଫସଲ ଉଜୁଡିଲା। ଧାର କରଜ ସାଙ୍ଗକୁ ସବୁ ପରିଶ୍ରମ ଏବେ ପାଣିରେ ପଡିଲା। କୁଲା ମୁଣ୍ଡେଇ ଘରକୁ ଫେରିଲା। କେମିତି ଧାର କରଜ ସୁଝାଯିବା ସହିତ କରିଥିବା ଋଣ ପରିଷୋଧ କରାଯିବ ସେହି ଚିନ୍ତାରେ ଏବେ ଚାଷିକୂଳ। କୃଷି ବିଭାଗ ତୁରନ୍ତ ଏହାର ତଦନ୍ତ କରି ଚାଷି ମାନଙ୍କୁ ସହାୟତା ଯୋଗାଇ ଦେବାକୁ ସ୍ଥାନୀୟ ଲୋକେ ଦାବି କରିଛନ୍ତି।
Popular Categories
Previous article
Next article