ଗଞ୍ଜାମ: ଗଞ୍ଜାମ ବ୍ଲକରେ ଲଘୁଚାପ ଜନିତ ଦୁଇଦିନ ଧରି ଲଗାଣ ବର୍ଷା ଫଳରେ ଲୋକମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହୋଇଛନ୍ତି। ବର୍ଷା ଯୋଗୁଁ ଧାନ ଚାଷ ଜମିଗୁଡିକ ଜଳମଗ୍ନ ରହିଥିବା ଦେଖିବାକୁ ମିଳିଛି । ବର୍ଷା ପାଣି ଠିକ ଭାବେ ନିଷ୍କାସନ ନହେବା ଫଳରେ ସୂର୍ୟ୍ୟନାରାୟଣପୁର ଓ ଗୋଖରକୁଦା ଓଡ଼ିଆରପି କଲୋନୀ ଏବଂ ଗୋଖରକୁଦା ରେଡକ୍ରସ ସାହି ପ୍ରଭୃତି ସମ୍ପୂର୍ଣ୍ଣ ଜଳବନ୍ଦୀ ଅବସ୍ଥାରେ ଥିବା ଦେଖିବାକୁ ମିଳିଛି । ଫଳରେ ସେଠାରେ ଲୋକମାନେ ଘୋର ଅସୁବିଧା ସମ୍ମୁଖୀନ ହେଉଛନ୍ତି । ଘରୁ ବାହାରିବା କଷ୍ଟକର ବ୍ୟପାର ହୋଇଛି।
ଅନ୍ୟପଟେ ଅଧିକ ବର୍ଷା ଯୋଗୁଁ ପୁଇଁତୋଳା, ଝାଡ଼କୁଦା, ଲକ୍ଷ୍ମୀପୁର, ହୁମା ପାଳିବନ୍ଧ, ଖଟୁଆକୁଦା, ମୟୁରପଦା, ନୀଳାଦ୍ରିପୁର, କାଇଁଚପୁର, କଲ୍ୟାଣପୁର ଆଦି ବିଭିନ୍ନ ଗ୍ରାମର ଚାଷ ଜମିରେ ପାଣି ଜମି ରହିବା ଦ୍ଵାରା ତାହା ପ୍ରଭାବିତ ହୋଇଛି । ସେହି ଅଞ୍ଚଳର ବର୍ତମାନ ଚାଷୀମାନେ ନିଜ ଜମିରୁ ପାଚିଲା ଧାନ ବାହାର କରୁଥିବା ଜଣାପଡିଛି । ସେହିପରି ଗଞ୍ଜାମ ବ୍ଲକ ଓ ଏନଏସି ଅଞ୍ଚଳର ଚାଷୀ ଚିନ୍ତାରେ ପଡିଯାଇଛନ୍ତି । ଅନ୍ୟପଟେ ଗଞ୍ଜାମ ଏନଏସିର ବିଭିନ୍ନ ୱାର୍ଡ ମଧ୍ୟ ଜଳବନ୍ଦୀ ହୋଇ ରହିଛି । ଯାହାକୁ ନେଇ ଲୋକଙ୍କ ମଧ୍ୟରେ ଘୋର ଅସନ୍ତୋଷ ଦେଖାଦେଇଥିଲା । ଫଳରେ କିଛି ସ୍ଥାନୀୟ ଅଂଚଳର ସ୍ବେଛାସେବୀ ସୁଧୀର କୁମାର ପାଢ଼ୀ, ମନୋଜ ପ୍ରଧାନ, ମଦନ ପାଢ଼ୀ, ଗଣେଶ ମହାରଣା, ଆଦିତ୍ୟ ମହାପାତ୍ର, ବାଳକୃଷ୍ଣ ପଣ୍ଡା ଓ ଅନ୍ୟମାନଙ୍କ ସହଯୋଗରେ ଅଟକି ରହିଥିବା ବର୍ଷା ଜଳ ନିଷ୍କାସନ କରିଛନ୍ତି। ତେଣୁ ପ୍ରଶାସନ ଏଥିପ୍ରତି ଦୃଷ୍ଟି ଦେଇ କ୍ଷତିପୂରଣ ଦେବାକୁ ଦାବୀ ହୋଇଛି।
