ଭୁବନେଶ୍ୱର : ଭିଜିଲାନ୍ସ ଜାଲରେ ଫସିବା ପରେ ଶନିବାର କେନ୍ଦ୍ରାପଡାର ଅତିରିକ୍ତ ଯୋଗାଣ ଅଧିକାରୀ ପ୍ରଦୀପ ମହାପାତ୍ର ଗିରଫ ହୋଇଛନ୍ତି । ଆୟ ବର୍ହିଭୂତ ସମ୍ପତ୍ତି ଠୁଳ ଅଭିଯୋଗରେ ଭିଜିଲାନ୍ସ ତାଙ୍କୁ ଗିରଫ କରିଛି ।
ଶୁକ୍ରବାର ଯୋଗାଣ ଅଧିକାରୀଙ୍କ ଘର ସମେତ କଟକ, ଭୁବନେଶ୍ୱର, କେନ୍ଦ୍ରାପଡା ସହ ଏକକାଳୀନ ୫ଟି ସ୍ଥାନରେ ଚଢାଉ କରାଯାଇଥିଲା। ଚଢାଉ ସମୟରେ ଯୋଗାଣ ଅଧିକାରୀଙ୍କ ସମ୍ପତ୍ତି ଦେଖି ଭିଜିଲାନ୍ସ କାବା ହୋଇଯାଇଥିଲା ।
ପ୍ରଦୀପଙ୍କର ଭୁବନେଶ୍ୱର ଲିଙ୍ଗିପୁରରେ ଏକ ଦୁଇ ମହଲା କୋଠା, କଟକ ମଧୁପାଟଣାରେ ଗୋଟିଏ କୋଠା, ଭୁବନେଶ୍ୱର ଓ କଟକରେ ୨ଟି ପ୍ଲଟ୍ ଠାବ କରାଯାଇଥିଲା । ଘରୁ ପ୍ରାୟ ୮୫୦ ଗ୍ରାମ ସୁନା ,୪ଟି ସୁନା ଇଟା, ହୀରା ହାର ଜବତ କରାଯାଇଥିଲା । ୨ କୋଟି ୮୬ ଲକ୍ଷ ୯ ହଜାର ୫୬୯ ଜମା ଟଙ୍କା ରହିଥିଲା । ଏହାସହ ନଗଦ ଟଙ୍କା, ଚାରି ଚକିଆ ଗାଡି ଆଦି ଜବତ କରାଯାଇଥିଲା ।
ଏହି ଚଢାଉରେ ୪ଜଣ ଡିଏସପି, ଜଣେ ଆସିଷ୍ଟାଣ୍ଟ କମାଣ୍ଡାଣ୍ଟ ଓ ୫ଜଣ ଇନ୍ସପେକ୍ଟର ସାମିଲ ହୋଇଥିଲେ। କଟକ ଭିଜିଲାନ୍ସ କୋର୍ଟଙ୍କ ଅନୁମତି ପରେ ଏହି ଚଢାଉ ହୋଇଥିଲା। କଟକର କଲ୍ୟାଣନଗର ସ୍ଥିତ ଘର, ଭୁବନେଶ୍ୱର ଲିଙ୍ଗିପୁର ସ୍ଥିତ ଦୁଇ ମହଲା କୋଠା, କେନ୍ଦ୍ରାପଡା ସ୍ଥିତ କାର୍ଯ୍ୟାଳୟ ଓ କଟକ ନୂଆପଡା ସ୍ଥିତ ପୈତୃକ ଘର ଏବଂ ସମ୍ପର୍କୀୟଙ୍କ ଘରେ ଭୋର ୪ଟା ସମୟରୁ ଚଢାଉ ଜାରି ରଖିଥିଲା ଭିଜିଲାନ୍ସ।
