ନୂଆଦିଲ୍ଲୀ: ‘ପଠାନ୍’ରେ ଶାହରୁଖ ଖାନ୍ ଓ ସଲମାନ ଖାନ୍ଙ୍କ ଯୋଡ଼ି ‘ଟାଇଗର୍-୩’ରେ ଦେଖିବାକୁ ମିଳିବ। ପ୍ରଶଂସକମାନେ ଉତ୍ସାହର ସହିତ ଏଥିପାଇଁ ଅପେକ୍ଷା କରିଛନ୍ତି। ଇତି ମଧ୍ୟରେ ଏକ ଭିଡିଓ ସାମ୍ନାକୁ ଆସିଛି, ଯାହା ‘ଟାଇଗର୍-୩’ ସେଟ୍ର ବୋଲି କୁହାଯାଉଛି। ଏଥିରେ ସଲମାନ ଖାନ୍ ଓ ଶାହରୁଖ ଖାନ୍ଙ୍କ ଝଲକ୍ ଦେଖିବାକୁ ମିଳିଛି। ଭିଡିଓ ଦେଖି ପ୍ରଶଂସକମାନେ ଫାୟର୍ ଇମୋଜି ଦେବା ସହ ଫିଲ୍ମ ଦେଖିବାକୁ ଉତ୍କଣ୍ଠାର ସହ ଅପେକ୍ଷା କରିଥିବା ପ୍ରକାଶ କରିଛନ୍ତି।
ଟେଲିଚକ୍କର ଦ୍ବାରା ଶେୟାର କରାଯାଇଥିବା ଭିଡିଓଟି ‘ଟାଇଗର୍-୩’ ସେଟ୍ ଭଳି ଦେଖାଯାଉଛି, ଯେଉଁଥିରେ ସଲମାନ ଖାନ ଏକ ବ୍ରାଉନ ଟି-ସାର୍ଟରେ ଟାଇଗର ଲୁକରେ ନଜର ଆସିଛନ୍ତି। ଅପରପକ୍ଷେ, ଶାହରୁଖ ଖାନ ପଠାନ୍ ଲୁକ୍ରେ କଳା ପୋଷାକରେ ନଜର ଆସିଛନ୍ତି। ତାଙ୍କ ଲମ୍ବା କେଶ ପୁଣି ଥରେ ପ୍ରଶଂସକଙ୍କ ଦୃଷ୍ଟି ଆକର୍ଷଣ କରିଛି।
ଉଲ୍ଲେଖଯୋଗ୍ୟ, ସଲମାନ ଖାନ ଏବଂ କ୍ୟାଟ୍ରିନା କୈଫଙ୍କ ଫିଲ୍ମ ‘ଟାଇଗର୍-୩’ ୧୦ ନଭେମ୍ବର ୨୦୨୩ ରେ ମୁକ୍ତିଲାଭ କରିବ ବୋଲି କୁହାଯାଉଛି। ତେବେ ଏନେଇ ଆନୁଷ୍ଠାନିକ ଭାବେ କୌଣସି ସୂଚନା ଦିଆଯାଇନାହିଁ। ଏଥିରେ ଶାହରୁଖ ପଠାନ୍ ଭୂମିକାରେ କିଛି ସମୟ ପାଇଁ ନଜର ଆସିବେ। ଅନ୍ୟପକ୍ଷରେ, ଶାହରୁଖ ଖାନଙ୍କ ବିଷୟରେ କହିବାକୁ ଗଲେ, ସେ ‘ଯବାନ’ ଏବଂ ‘ଡଙ୍କି’ ଚଳଚ୍ଚିତ୍ରର ଶୁଟିଂରେ ବ୍ୟସ୍ତ ଅଛନ୍ତି।
