ହାଇଦରାବାଦ: ତେଲୁଗୁ ସିନେମାର ଲୋକପ୍ରିୟ ଅଭିନେତା ଚନ୍ଦ୍ର ମୋହନଙ୍କର ଶନିବାର ପରଲୋକ ଘଟିଛି। ହାଇଦରାବାଦର ଏକ ଡାକ୍ତରଖାନାରେ ସକାଳ ୬ଟା ୪୫ରେ ସେ ଶେଷ ନିଃଶ୍ବାସ ତ୍ୟାଗ କରିଛନ୍ତି। ୮୨ ବର୍ଷୀୟ ଚନ୍ଦ୍ରମୋହନଙ୍କର ହୃଦଘାତରେ ମୃତ୍ୟୁ ଘଟିଥିବା ଜଣାପଡ଼ିଛି। ହୃଦୟଜନିତ ସମସ୍ୟା କାରଣରୁ ଚନ୍ଦ୍ରମୋହନଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା। ତାଙ୍କ ପରିବାରରେ ପତ୍ନୀ ଜଲନ୍ଧରା ଓ ଦୁଇ ଝିଅ ଅଛନ୍ତି। ସୋମବାର ହାଇଦରାବାଦରେ ତାଙ୍କର ଅନ୍ତିମ ସଂସ୍କାର କରାଯିବ।
ଅପରପକ୍ଷେ, ଚନ୍ଦ୍ରମୋହନଙ୍କ ବିୟୋଗ ଖବର ପ୍ରଚାରିତ ହେବା ପରେ ଦକ୍ଷିଣ ଭାରତୀୟ ଚଳଚ୍ଚିତ୍ର ଶିଳ୍ପରେ ଶୋକର ଛାୟା ଖେଳିଯାଇଛି। ଅନେକ ସାଉଥ ସୁପରଷ୍ଟାର ତାଙ୍କ ବିୟୋଗରେ ଗଭୀର ଶୋକ ପ୍ରକାଶ କରିବା ସହ ଶ୍ରଦ୍ଧାଞ୍ଜଳି ଜ୍ଞାପନ କରିଛନ୍ତି। ଚନ୍ଦ୍ର ମୋହନ ମୁଖ୍ୟତଃ ତେଲୁଗୁ ଚଳଚ୍ଚିତ୍ରରେ ତାଙ୍କ କାମ ପାଇଁ ଜଣାଶୁଣା। ସେ ଏକ ଫିଲ୍ମଫେୟାର ସାଉଥ ଆୱାର୍ଡ ଏବଂ ଦୁଇଟି ନନ୍ଦୀ ଆୱାର୍ଡ ପାଇଛନ୍ତି। ନିଜ କ୍ୟାରିୟରରେ ଦର୍ଶକଙ୍କୁ ସେ ଅନେକ ସୁପରହିଟ୍ ତେଲୁଗୁ ଚଳଚ୍ଚିତ୍ର ଭେଟି ଦେଇଛନ୍ତି।
