ନୂଆଦିଲ୍ଲୀ: ଚଳିତବର୍ଷ ଅଗଷ୍ଟରେ ଦେଶରେ ଯାତ୍ରୀବାହୀ ଯାନ ବିକ୍ରିରେ ମୋଟାମୋଟି ଭାବେ ୭% ହ୍ରାସ ଘଟିଛି। କରୋନା ମହାମାରୀ ପ୍ରଭାବରେ ସମ୍ପ୍ରତି ଦେଶରେ ଅଟୋମୋବାଇଲ କ୍ଷେତ୍ରରେ ବିକ୍ରି ବିଶେଷ ଭାବେ ପ୍ରଭାବିତ ହୋଇଛି। ଗତବର୍ଷ ସମାନ ମାସ ତୁଳନାରେ ଚଳିତବର୍ଷ ଅଗଷ୍ଟରେ ଯାତ୍ରୀବାହୀ ଯାନ ବିକ୍ରିରେ ୭.୧୨% ହ୍ରାସ ଘଟି ୧,୭୮,୫୧୩ ୟୁନିଟ୍ରେ ପହଞ୍ଚିଛି। ଫେଡେରେଶନ ଅଫ୍ ଅଟୋମୋବାଇଲ ଡିଲର୍ସ ଆସୋସିଏସନ୍ (ଫାଡା)ର କହିବାନୁଯାୟୀ, ଦେଶରେ ରହିଥିବା ୧୪୫୦ ଆଞ୍ଚଳିକ ପରିବହନ କାର୍ୟ୍ୟାଳୟ ମଧ୍ୟରୁ ୧୨୪୨ଟି କାର୍ୟ୍ୟାଳୟ ନିକଟରୁ ମିଳିଥିବା ତଥ୍ୟାନୁଯାୟୀ, ୨୦୧୯ ଅଗଷ୍ଟରେ ଯାତ୍ରୀବାହୀ ଯାନ ବିକ୍ରି ୧,୯୨,୧୮୯ ୟୁନିଟ୍ ରହିଥିଲା। ଚଳିତବର୍ଷ ଅଗଷ୍ଟରେ ଦୁଇଚକିଆ ଯାନ ବିକ୍ରିରେ ୨୮.୭୧% ହ୍ରାସ ଘଟି ୮,୯୮,୭୭୫ ୟୁନିଟ୍ ରହିଥିଲା। ଗତବର୍ଷ ଏହି ସମୟରେ ୧୨,୬୦,୭୨୨ ୟୁନିଟ୍ ଦୁଇଚକିଆ ଯାନ ବିକ୍ରି ହୋଇଥିଲା । ତେବେ ଅଗଷ୍ଟରେ ବାଣିଜ୍ୟିକ ଯାନ ବିକ୍ରିରେ ସର୍ବାଧିକ ହ୍ରାସ ପରିଲକ୍ଷିତ ହୋଇଥିବା ଜଣାଯାଇଛି। ଚଳିତବର୍ଷ ଅଗଷ୍ଟରେ ବାଣିଜ୍ୟିକ ଯାନ ବିକ୍ରିରେ ୫୭.୩୯% ହ୍ରାସ ହୋଇ ୨୬,୫୩୬ ୟୁନିଟ୍ ରହିଥିବାବେଳେ ଗତ ବର୍ଷ ଏହି ସମୟରେ ଏହା ୬୨,୨୭୦ ୟୁନିଟ୍ ରହିଥିଲା। ଅନ୍ୟପକ୍ଷରେ ତିନି ଚକିଆ ଯାନ ବିକ୍ରି ମଧ୍ୟ ଏଥିରୁ ବାଦ୍ ପଡିନାହିାଁ ଅଗଷ୍ଟରେ ତିନି ଚକିଆ ଯାନ ବିକ୍ରିରେ ମଧ୍ୟ ୬୯.୫୧% ହ୍ରାସ ଘଟି ୧୬,୮୫୭ ୟୁନିଟ୍ ରହିଥିଲା। ୨୦୧୯ ଅଗଷ୍ଟରେ ୫୫,୨୯୩ ୟୁନିଟ୍ ତିନି ଚକିଆ ଯାନ ବିକ୍ରି ହୋଇଥିଲା।
Comments are closed.