ସମାଜ ଡିଜିଟାଲ ଡେସ୍କ: ଆମେରିକା ମାଟିରେ ଭାରତର ସ୍ବାର୍ଥ ବିରୋଧରେ କାର୍ଯ୍ୟ କରୁଥିବା ଖଲିସ୍ତାନୀଙ୍କୁ ଦମନ କରିବାକୁ ଦାବି କରିଛି ଭାରତ। ଆମେରିକାର ଗୁଇନ୍ଦା ମୁଖ୍ୟ ତୁଳସୀ ଗବ୍ବାର୍ଡ ଭାରତ ଗସ୍ତରେ ଆସିଥିବାବେଳେ ସୋମବାର ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହଙ୍କୁ ଭେଟିଥିଲେ। ଉଭୟଙ୍କ ମଧ୍ୟରେ ଆଲୋଚନା ସମୟରେ ରାଜନାଥ ଖଲିସ୍ତାନୀ ପ୍ରସଙ୍ଗ ଉଠାଇଥିଲେ। ଶିଖ୍ ଫର ଜଷ୍ଟିସ (ଏସଜେଏଫ) ସଂଗଠନ କାନାଡ଼ା ସମେତ ଆମେରିକାରେ ଭାରତ ବିରୋଧୀ କାର୍ଯ୍ୟରେ ଲିପ୍ତ ରହିଛି। ଏହି ସଂଗଠନକୁ ଭାରତରେ ନିଷିଦ୍ଧ ଘୋଷଣା କରାଯାଇଛି। ତେଣୁ ଆମେରିକା ମାଟିରେ ଭାରତ ବିରୋଧରେ କାର୍ଯ୍ୟ କରୁଥିବା ଏହି ସଂଗଠନ ଏବଂ ଏହାର ସଦସ୍ୟଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ଲାଗି ରାଜନାଥ ତୁଳସୀଙ୍କ ନିକଟରେ ଦାବି କରିଛନ୍ତି।
ଉଭୟଙ୍କ ମଧ୍ୟରେ ଦୁଇ ଦେଶ ମଧ୍ୟରେ ପ୍ରତିରକ୍ଷା ଏବଂ ନିରାପତ୍ତା ସମ୍ବନ୍ଧକୁ ମଜଭୁତ କରିବା ଲାଗି ଦ୍ବିପାକ୍ଷିକ ଆଲୋଚନା ହୋଇଥିଲା। ତୁଳସୀ ଅଢ଼େଇ ଦିନିଆ ଭାରତ ଗସ୍ତରେ ଆସିଛନ୍ତି। ଗତ ରବିବାର ଜାତୀୟ ନିରାପତ୍ତା ଉପଦେଷ୍ଟା (ଏନଏସଏ) ଅଜିତ ଡୋଭାଲ ତୁଳସୀଙ୍କୁ ଭେଟି ଗୁଇନ୍ଦା ତଥ୍ୟ ବିନିମୟ ସମେତ ଅନ୍ୟାନ୍ୟ ନିରାପତ୍ତା ଦିଗ ଉପରେ ଆଲୋଚନା କରିଥିଲେ।
