କଲ୍ୟାଣସିଂହପୁର: ରାୟଗଡ଼ା ଜିଲ୍ଲା କଲ୍ୟାଣସିଂହପୁର ବ୍ଲକ କରପା ପଞ୍ଚାୟତରେ ଥିବା ସରକାରୀ ପ୍ରାଥମିକ ସେବାଶ୍ରମରେ ଶିକ୍ଷକ ମରୁଡ଼ି ଦେଖାଦେଇଛି। ଏହି ସେବାଶ୍ରମ ୧.୧.୧୯୫୮ ମସିହାରେ ସ୍ଥାପିତ ହୋଇଥିବାବେଳେ ଅନୁସୂଚିତ ଜାତି ଓ ଜନଜାତି ଉନ୍ନୟନ ବିଭାଗ ଦ୍ବାରା ପରିଚାଳିତ ହେଉଛି। ପ୍ରଥମଠାରୁ ପଞ୍ଚମ ଶ୍ରେଣୀ ମୋଟ ୧୪୬ଜଣ ଛାତ୍ରଛାତ୍ରୀଙ୍କୁ ଜଣେ ମାତ୍ର ଶିକ୍ଷକ ଗୋପୀନାଥ ଗମାଙ୍ଗ ରହିଛନ୍ତି। ଛାତ୍ରାବାସରେ ୯୯ଜଣ ଛାତ୍ରଛାତ୍ରୀ ରହୁଥିବାବେଳେ ଡେ’ ସ୍କଲାର ଛାତ୍ରଛାତ୍ରୀ ୩୮ଜଣ ରହିଛନ୍ତି। ପୂର୍ବରୁ କରପା ସେବାଶ୍ରମରେ ତିନିଜଣ ଶିକ୍ଷକ ରହିଥିଲେ। ମାଝୀଗୁଡା ପଞ୍ଚାୟତର ବଡନାୟକ ସେବାଶ୍ରମରେ ୩୫୦ଜଣ ଛାତ୍ରଛାତ୍ରୀଙ୍କୁ ଜଣେ ଶିକ୍ଷକ ରହିଥିବା ଖବର ବିଭିନ୍ନ ଗଣମାଧ୍ୟମରେ ପ୍ରକାଶ ପାଇବା ପରେ କରପା ପ୍ରାଥମିକ ସେବାଶ୍ରମର ଶିକ୍ଷକ ଦାସ ହୁଈକାକୁ ୨୦୨୪ମସିହା ସେପ୍ଟେମ୍ବର ମାସରେ (ଡେପୁଟେସନ) ତତ୍କାଳୀନ ଦାୟିତ୍ବ ଦିଆଯାଇଛି। ନଭେମ୍ବର ମାସରେ କରପା ସେବାଶ୍ରମର ଛାତ୍ରୀଙ୍କ ମୃତ୍ୟୁ ହୋଇଥିବା ଘଟଣାରେ ପ୍ରଧାନଶିକ୍ଷୟିତ୍ରୀ ବୈଜୟନ୍ତୀ ପଟ୍ଟନାୟକଙ୍କୁ ବହିଷ୍କୃତ କରି ଉପ ଜିଲ୍ଲାପାଳ କାର୍ଯ୍ୟାଳୟକୁ ନେଇ ଯାଇଛନ୍ତି। ବର୍ତ୍ତମାନ କରପା ସେବାଶ୍ରମ ଜଣେ ଶିକ୍ଷକଙ୍କ ଦ୍ୱାରା ହିଁ ଚାଲିଛି। ସେ ଛାତ୍ରଛାତ୍ରୀଙ୍କୁ କିଭଳି ଶିକ୍ଷା ଦାନ କରୁଥିବେ ତାହା ଆଶ୍ଚର୍ଯ୍ୟଜନକ। ସେ ପିଲାଙ୍କୁ ପାଠ ପଢ଼ାଇବେ ନା ଅଫିସ କାର୍ଯ୍ୟ କରିବେ କେବଳ ପିଲାମାନଙ୍କୁ ଜଗି ରହିଛନ୍ତି। ବର୍ତ୍ତମାନ ପରୀକ୍ଷା ଚାଲିଛି ପିଲାଙ୍କ ଭବିଷ୍ୟତ କଣ ହେବ। ଯଦି ସେବାଶ୍ରମରେ କୌଣସି ଅଘଟଣ ଘଟିଲେ ସରକାର ଦାୟୀ ରହିବେ ବୋଲି ଆଲୋଚନା ହେଉଥିବା ଶୁଣିବାକୁ ମିଳୁଛି। ଏ ସମ୍ପର୍କରେ ମଙ୍ଗଳ ସମ୍ପ୍ରସାରଣ ଅଧିକାରୀ ଚନ୍ଦନ ଦାସ ବାଙ୍ଗାରୀଙ୍କୁ ପଚାରିବାରୁ ସେ କହିଲେ ବର୍ତ୍ତମାନ ବିଦ୍ୟାଳୟର ସମସ୍ୟା ବିଷୟରେ ଅବଗତ କରାଯାଇଛି। ମାସେ କି ଦୁଇ ମାସ ମଧ୍ୟରେ ଶିକ୍ଷକ ସମସ୍ୟା ଦୂର ହେବ ବୋଲି କହିଛନ୍ତି।
Comments are closed.