ଲଖନଉ : ଉତ୍ତରପ୍ରଦେଶର ବାରାବଙ୍କି ଜିଲାରେ ଆଜି ଏକ ମର୍ମନ୍ତୁଦ ସଡକ ଦୁର୍ଘଟଣା ଘଟିଛି। ବସକୁ ଆଉ ଏକ ବସ ଧକ୍କା ଦେବା ଫଳରେ ଦୁର୍ଘଟଣାରେ ଆଠ ଜଣ ଯାତ୍ରୀଙ୍କର ମୃତ୍ୟୁ ଘଟିଛି। ଏହାସହ ପ୍ରାୟ ୩୬ ଜଣ ଆହତ ହୋଇଛନ୍ତି। ଖବର ପାଇ ପୁଲିସ ଓ ଉଦ୍ଧାରକାରୀ ଦଳ ଘଟଣା ସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଛନ୍ତି। ଆହତଙ୍କୁ ଉଦ୍ଧାର କରାଯାଇ ହସ୍ପିଟାଲରେ ଭର୍ତ୍ତି କରାଯାଇଛି। ଘଟଣା ସ୍ଥଳରେ ପୁଲିସ ପହଞ୍ଚିବା ପରେ ଜାତୀୟ ରାଜପଥରୁ କ୍ଷତିଗ୍ରସ୍ତ ଗାଡିକୁ ହଟାଇବା ପରେ ଯାତାୟାତ ସ୍ୱଭାବିକ ହୋଇଛି।
ମିଳିଥିବା ସୂଚନାନୁଯାୟୀ, ପୂବାଞ୍ଚଳ ଏକ୍ସପ୍ରେସରେ ସୋମବାର ଭୋର ସମୟରେ ଲୋନୀ କଟରା ଥାନା ଅଞ୍ଚଳରେ ନରେନ୍ଦ୍ରପୁର ମଦରହା ଗାଁ ନିକଟରେ ଠିଆ ହୋଇଥିବା ବସ୍କୁ ପଛପଟୁ ଆସୁଥିବା ଆଉ ଏକ ବସ ଧକ୍କା ଦେଇଥିଲା।
ପୂର୍ବାଞ୍ଚଳ ଏକ୍ସପ୍ରେସରେ ଲୋନୀ କଟରା ଥାନା ଅଞ୍ଚଳରେ ନରେନ୍ଦ୍ରପୁର ମଦରହା ଗାଁ ନିକଟରେ ଏକ୍ସପ୍ରେସ-ୱେ କଡରେ ଏକ ବସ୍ ଠିଆ ହୋଇଥିଲା। ପ୍ରାୟ ୪ଟା ୩୦ରେ ସୀତାମଡୀ ବିହାରରୁ ନୂଆଦିଲ୍ଲୀ ଯାଉଥିବା ଏକ ବସ ପଛପଟୁ ଉକ୍ତ ବସକୁ ଧକ୍କା ଦେଇଥିଲା। ଦୁର୍ଘଟଣା ଘଟାଇଥିବା ବସର ଚାଳକ ଘଟଣା ସ୍ଥଳରୁ ଫେରାର ହୋଇଯାଇଛି।
ଏହି ଦୁର୍ଘଟଣାରେ ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟ ନାଥ ମୃତକଙ୍କ ପ୍ରତି ଗଭୀର ଶୋକ ପ୍ରକାଶ କରିଛନ୍ତି। ଅଧିକାରୀଙ୍କୁ ଘଟଣାର ତଦନ୍ତ କରିବା ସହ ଆହତଙ୍କ ସଠିକ ଚିିକିତ୍ସା ପାଇଁ ନିର୍ଦ୍ଦେଶ ଦେଇଛନ୍ତି।
Comments are closed.