ଅଭାବନୀୟ: ଥାନା ପରିସରରେ ମା’ ଦେହରେ ପେଟ୍ରୋଲ ଢାଳି ନିଆଁ ଲଗାଇଦେଲା ପୁଅ, ଡାକ୍ତରଖାନାରେ ଆଖି ବୁଝିଲେ ପୀଡ଼ିତା

ସମାଜ ଡିଜିଟାଲ ଡେସ୍କ: ଥାନା ପରିସରରେ ନିଜର ୬୦ ବର୍ଷୀୟା ମା’ ଦେହରେ ପେଟ୍ରୋଲ ଢାଳି ନିଆଁ ଲଗାଇଦେଲା ୨୫ ବର୍ଷୀୟ ପୁଅ। ଏଭଳି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ଉତ୍ତରପ୍ରଦେଶର ଆଲିଗଡ଼ରେ। ନିଆଁରେ ପୋଡ଼ି ହୋଇ ଗୁରୁତର ଆହତ ହୋଇଥିବା ବୃଦ୍ଧା ହେମଲତା ଦେବୀ ହସ୍ପିଟାଲରେ ଆଖି ବୁଜିଛନ୍ତି। ପୁଲିସ ଅଭିଯୁକ୍ତ ଗୌରବ କୁମାରକୁ ଅଟକ ରଖିଛି।

ଏସପି ପଲାଶ ବଂଶଲଙ୍କ ସୂଚନା ଅନୁସାରେ, ହେମଲତାଙ୍କ ସ୍ଵାମୀଙ୍କ ମୃତ୍ୟୁ ପରେ ସେ ନିଜର ୨ ପୁଅଙ୍କ ସହିତ ନଗରିଆ ଗ୍ରାମସ୍ଥିତ ବାପଘରେ ରହୁଥିଲେ। ସେଠାରେ ହେମଲତା ଏବଂ ତାଙ୍କ ଭାଇଙ୍କ ମଧ୍ୟରେ ସମ୍ପତ୍ତିକୁ ନେଇ ବିବାଦ ସୃଷ୍ଟି ହୋଇଥିଲା। ତେଣୁ ଏହାର ସମାଧାନ ଲାଗି ହେମଲତାଙ୍କ ସହିତ ତାଙ୍କ ଭାଇ ଏବଂ ପୁଅ ଗୌରବକୁ ପୁଲିସ ଥାନାକୁ ଡକାଇଥିଲା। ଥାନାରେ ଆଲୋଚନା ଚାଲିଥିବା ସମୟରେ ପୁଲିସ ଉପରେ ଚାପ ପକାଇବା ଉଦ୍ଦେଶ୍ୟରେ ଗୌରବ ନିଜ ମା’ଙ୍କ ଦେହରେ ପେଟ୍ରୋଲ ଢାଳି ନିଆଁ ଲଗାଇ ଦେଇଥିଲେ। ହେମଲତା ଚିତ୍କାର କରି ଜୀବନ ବଞ୍ଚାଇବାକୁ ବାହାରକୁ ଦୌଡ଼ିଥିଲେ। ଥାନାରେ ଉପସ୍ଥିତ ପୁଲିସ କର୍ମଚାରୀ ବି ଭୟଭୀତ ହୋଇପଡ଼ିବା ସହିତ ହଠାତ କିଛି ବୁଝିପାରି ନ ଥିଲେ। କିନ୍ତୁ ତୁରନ୍ତ ହେମଲତାଙ୍କୁ ଉଦ୍ଧାର କରି ହସ୍ପିଟାଲ ନିଆଯାଇଥିଲା। ଶରୀରର ୭୦ ପ୍ରତଶତ ପୋଡ଼ି ଯାଇଥିବାବେଳେ ଡାକ୍ତରଖାନାରେ ତାଙ୍କର ମୃତ୍ୟୁ ଘଟିଥିଲା।