ଲକ୍ଷ୍ନୌ : ବିନା କାରଣରେ କାଗଜପତ୍ର ଯାଞ୍ଚ ପାଇଁ ଗାଡ଼ି ଚାଳକମାନଙ୍କୁ ନ ଅଟକାଇବା ପାଇଁ ଉତ୍ତର ପ୍ରଦେଶ ପୁଲିସ ମହାନିର୍ଦ୍ଦେଶକ ଓମ୍ ପ୍ରକାଶ ସିଂହ ଶନିବାର ନିର୍ଦ୍ଦେଶ ଦେଇଛନ୍ତି। ସେ କହିଛନ୍ତି, ପୁଲିସକର୍ମୀ କେବଳ ଟ୍ରାଫିକ୍ ନିୟମ ଉଲ୍ଲଂଘନ କରୁଥିବା ଲୋକଙ୍କ ଲାଇସେନ୍ସ ଯାଞ୍ଚ କରନ୍ତୁ। ସଂଶୋଧିତ ମୋଟର ଯାନ ଆଇନ ଲାଗୁ ହେବା ପରେ ଯାଞ୍ଚ ନାଁରେ ପୁଲିସ ଗାଡ଼ି ଚାଳକମାନଙ୍କ ଉପରେ କରୁଥିବା ଅତ୍ୟାଚାର ତଥା ଦୁର୍ବ୍ୟବହାର ଅଭିଯୋଗକୁ ଦୃଷ୍ଟିରେ ରଖି ଡିଜିପି ଏହି ନିର୍ଦ୍ଦେଶ ଦେଇଛନ୍ତି। ରାଜ୍ୟର ସବୁ ଅଞ୍ଚଳର ଏଡିଜି, ଆଇଜି ଓ ଡିଆଇଜିମାନଙ୍କୁ ଏନେଇ ନିର୍ଦ୍ଦେଶ ଦିଆ ହୋଇଛି।
ଡିଜିପି କହିଛନ୍ତି, ଯାଞ୍ଚ ନାଁରେ ଗାଡ଼ି ଚାଳକଙ୍କୁ ପୁଲିସର ଦୁର୍ବ୍ୟବହାର ଓ ଅତ୍ୟାଚାର ଆଦି ଅଭିଯୋଗ ହେବା ପରେ ଏହାକୁ ରୋକିବାକୁ ପୂର୍ବରୁ ମଧ୍ୟ ପୁଲିସକର୍ମୀଙ୍କୁ ନିର୍ଦ୍ଦେଶ ଦିଆଯାଇଛି। ମାତ୍ର ଏବେ ମଧ୍ୟ ଏପରି ଅଭିଯୋଗ ଆସୁଛି। ସେ କହିଛନ୍ତି, ଟ୍ରାଫିକ୍ ନିୟମକୁ ସୁଚାରୁ ରୂପେ ତୁଲାଇ ଏହାକୁ ଉନ୍ନତମାନର କରିବା ପାଇଁ ଜାରି କରାଯାଇଥିବା ଏହି ନିର୍ଦ୍ଦେଶକୁ କଡ଼ାକଡ଼ି ଭାବେ ପାଳନ କରନ୍ତୁ। ସେ ପୁଲିସ ଅଧିକାରୀମାନଙ୍କୁ କହିଛନ୍ତି ଯେ, ବ୍ୟକ୍ତିଗତ ରୁଚି ନେଇ ନିଜ ଅଧୀନସ୍ଥ ଅଧିକାରୀ ତଥା କର୍ମଚାରୀମାନଙ୍କୁ ଏହି ନିର୍ଦ୍ଦେଶ ପାଳନ କରିବାକୁ ନିଶ୍ଚତ ରୂପେ କୁହନ୍ତୁ।
