କଲ୍ୟାଣସିଂହପୁର : ରାୟଗଡା ଜିଲ୍ଲା କଲ୍ୟାଣସିଂହପୁର ବ୍ଲକ ସଦର ମହକୁମା ଜଗନ୍ନାଥ ସାହିରେ ଏକ ଭଙ୍ଗା ଘରେ ଦୁଇ ଦିବ୍ୟାଙ୍ଗ ରହିଥିବା ଦେଖିବାକୁ ମିଳିଛି । ସ୍ୱର୍ଗର ସୀତାରାମ ଦାସଙ୍କ ସ୍ତ୍ରୀ ଅନୁସୟା ଦାସ (୭୦)ଓ ପୁଅ ବିନାୟକ ଦାସ (୩୯) ଦୁଇ ଜଣ ଦିବ୍ୟାଙ୍ଗ ହୋଇ ଭଙ୍ଗା ଘରେ ଭାଗ୍ୟକୁ ଆଦରି ପଡିରହିଥିବା ଦେଖିବାକୁ ମିଳିଛି । ସୀତାରାମ ପୂର୍ବରୁ ଚା ବିକ୍ରି କରି ପରିବାର ଚଳାଉଥିଲେ । ଦୁଇ ପୁଅ,ଦୁଇ ଝିଅଙ୍କୁ ବିବାହ ଦେବା ପରେ ସ୍ବର୍ଗତ ସୀତାରାମ ଅସୁସ୍ଥ ହୋଇ ଚିକିତ୍ସିତ ହେଉଥିଲେ । ପ୍ରାୟ ୩ବର୍ଷ ହେବ ସୀତାରାମଙ୍କ ଦେହାନ୍ତ ପରେ ସ୍ତ୍ରୀ ଅନୁସୟା ସମ୍ପୂର୍ଣ୍ଣ ଭାଙ୍ଗି ପଡି ପକ୍ଷାଘାତ ରୋଗରେ ଶଯ୍ୟାରେ ପଡିରହିଛନ୍ତି ।
ସାନ ପୁଅ ବାଇକ ଦୁର୍ଘଟଣାରେ ହାତ ଓ ଶ୍ରବଣ ଶକ୍ତି ହରାଇଛି । ଏହି ଦୁଇ ଜଣଙ୍କୁ ତାଙ୍କ ବଡ଼ ପୁଅ ବୋହୂ ପଚାରୁ ନାହାନ୍ତି । କେବଳ ଦୁଇ ଝିଅ କେତେବେଳେ କେମିତି ଆସି ଦେଖା ଚାହାଁ କରି ଯାଉଛନ୍ତି ବୋଲି ମାଆ ପୁଅ କହିଛନ୍ତି । ପଡୋଶୀ କେତେବେଳେ ଖାଇବାକୁ ଦେଲେ ଖାଉଛନ୍ତି ନଚେତ୍ ଭୋକରେ ଶୋଉଛନ୍ତି । ଘରର କାନ୍ଥ ଫାଟି ଆଁ କରିଛି ,ବାଡ଼ି କୋଠରୀରୁ ମାଟି ଝଡି ପଡିଛି । ଏହି ପରିବାରକୁ ସରକାର ପକ୍ଷରୁ ପିଡ଼ିଏଫ ଚାଉଳ ୧୦କିଲୋ ସହ ବିଧବା ଭତ୍ତା ଓ ପୁଅକୁ ବିକଳାଙ୍ଗ ଭତ୍ତା ଭାବରେ ୧ ହଜାର ଟଙ୍କା ଲେଖାଏଁ ସହାୟତା ମିଳୁଛି ।ଏହି ଦୁଇ ହଜାର ଟଙ୍କାରେ ସେମାନେ ଔଷଧ କିଣିବେ ନା ଖାଇବେ ନା ଘର ସଜାଡ଼ିବେ ବୋଲି କହିଛନ୍ତି । ତେଣୁ ସରକାରଙ୍କ ତରଫରୁ ଆବାସ ଯୋଜନାରେ ଘର ଖଣ୍ଡିଏ ଓ ଭତ୍ତା ବୃଦ୍ଧି କରିବା ପାଇଁ ନିବେଦନ କରିଛନ୍ତି ।
Comments are closed.