ଗୁରୁଗ୍ରାମ: ହରିୟାଣାରେ ପ୍ରସାରିତ ହିନ୍ଦୀ ନ୍ୟୁଜ୍ ଚ୍ୟାନେଲ ‘ସୁଦର୍ଶନ ନ୍ୟୁଜ୍’ର ଆବାସିକ ସମ୍ପାଦକ ମୁକେଶ କୁମାରଙ୍କୁ ନୂହ୍ ସାମ୍ପ୍ରଦାୟିକ ହିଂସାକୁ ଉସୁକାଇଲା ଭଳି ମିଛ ଓ ବିଭ୍ରାନ୍ତିକର ଖବର ପ୍ରସାରଣ ଓ ସାମାଜିକ ଗଣମାଧ୍ୟମରେ ଉତ୍ତେଜନା ସୃଷ୍ଟିକାରୀ ମନ୍ତବ୍ୟ ପ୍ରସାର ଅଭିଯୋଗରେ ଗିରଫ କରାଯାଇଛି। ଶନିବାର ମୁକେଶଙ୍କୁ ସେକ୍ଟର-୧୭ ଅଞ୍ଚଳରୁ ଗିରଫ ପରେ ଚ୍ୟାନେଲ ପକ୍ଷରୁ ତାଙ୍କୁ ଗୁଣ୍ଡାମାନେ ଅପହରଣ କରିନେଇଥିବା ପ୍ରସାରଣ କରାଯାଇଥିଲା। ପୁଲିସ ଏହାର ସ୍ପଷ୍ଟୀକରଣ ଦେଇ ଅପହରଣ ନୁହେଁ; ଗିରଫ କରାଯାଇଥିବା କହିଥିଲା। କାତାରରୁ ପ୍ରସାରିତ ‘ଅଲ୍ ଜଜିରା’ ନ୍ୟୁଜ୍ ଚାନେଲ ଦ୍ବାରା ପ୍ରଭାବିତ ହୋଇ ମୁକେଶ ଗୁରୁଗ୍ରାମରେ ପୁଲିସ ହିନ୍ଦୁ ସେଚ୍ଛାସେବୀଙ୍କ ବିରୋଧରେ କାର୍ଯ୍ୟାନୁଷ୍ଠାନ କରୁଥିବା ଖବର ପ୍ରସାର କରିଥିଲେ। ଅଲ୍ ଜଜିରା କର୍ତ୍ତୃପକ୍ଷ ଗୁରୁଗ୍ରାମ ପୁଲିସ କମିସନର କାଲା ରାମଚନ୍ଦ୍ରନ୍ଙ୍କୁ ଫୋନ୍ କରି ହିନ୍ଦୁଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଚାପ ପକାଇଥିବା ମୁକେଶ ବର୍ଣ୍ଣନା କରିଥିଲେ। ପୁଲିସ ଏହି ଖବରକୁ ଅମୂଳକ ବୋଲି କହିବା ସହ ମୁକେଶଙ୍କ ବିରୋଧରେ ସାଇବର ଆଇନାନୁଯାୟୀ ମାମଲା ରୁଜୁ କରିଥିଲା। ଚ୍ୟାନେଳ ପକ୍ଷରୁ ପୁଲିସ କାର୍ଯ୍ୟାନୁଷ୍ଠାନକୁ ବେଆଇନ ବୋଲି ଦର୍ଶାଯାଇଛି। ମୁକେଶ ଖବର ସଂଗ୍ରହ ପାଇଁ ମେୱାତ୍ ଯାଇଥିଲାବେଳେ ପୁଲିସ ଗିରଫ କରିଥିବା କହିଛନ୍ତି ମୁଖ୍ୟ ସମ୍ପାଦକ ସୁରେଶ ଚାଭାଙ୍କେ। ଗଣମାଧ୍ୟମର କଣ୍ଠରୋଧ ପାଇଁ ପୁଲିସ ଉଦ୍ୟମ କରୁଥିବା ସେ କହିଛନ୍ତି। ପରେ ମୁକେଶଙ୍କୁ ମୁକ୍ତ କରାଯାଇଥିବା ସୂଚନା ମିଳିଛି।
Comments are closed.