ଗୋପାଳପୁର : କଇଁଛଙ୍କ ଅଣ୍ଡାଦାନ ପର୍ବ ଆରମ୍ଭ ହୋଇଥିବାରୁ ଗତ କିଛି ଦିନ ହେଲା କଇଁଛ ଗୋପାଳପୁର ବେଳାଭୂମି ସମେତ ଆଖପାଖ ବେଳାଭୂମିକୁ ଆସି ଅଣ୍ଡା ଦେଇ ଚାଲି ଯାଉଥିବା ଦେଖିବାକୁ ମିଳିଛି। ଏହା ସହ କେତକ କଇଁଛଙ୍କ ମୃତଦେହ ମଧ୍ୟ ବେଳାଭୂମିରେ ପଡୁଥିବା ଦେଖିବାକୁ ମିଳିଛି। ଚଳିତ ମାସ ୨୨ ତାରିଖରେ ଦୁଇଟି ଅଲିଭ୍ ରିଡଲେ କଇଁଛ ଗୋପାଳପୁର ବେଳାଭୂମିର କୂଳକୁ ଆସି ଅଣ୍ଡା ଦେଇଥିଲେ । ଗୋଟିଏ ୧୩୦ ଟି ଅଣ୍ଡା ଓ ଅନ୍ୟଟି ୧୦୧ ଅଣ୍ଡା ଦେଇ ଚାଲି ଯାଇଥିଲେ । ଏହି ଅଣ୍ଡା ଗୁଡ଼ିକୁ ବନବିଭାଗ କର୍ମଚାରୀ ସଂଗ୍ରହ କରି ସୁରକ୍ଷିତ ଜାଗାକୁ ନେଇ ଯାଇଥିଲେ । ଆଜି ସକାଳେ ଏକ ଅଲିଭ୍ ରିଡଲେ କଇଁଛର ମୃତଦେହ ବେଳାଭୂମିରେ ପଡ଼ିଥିବାବେଳେ ଅନ୍ୟ ଏକ ଅଲିଭ୍ ରିଡଲେ କଇଁଛର ମୃତଦେହ ଅପରାହ୍ନରେ ପଡ଼ିଥିବା ଦେଖିବାକୁ ମିଳିଛି । ଖବର ଜଣା ପଡିବା ପରେ ଦୁଇଟି ଅଲିଭ୍ ରିଡଲେ ମୃତଦେହକୁ ବନବିଭାଗ କର୍ମଚାରୀ ବାଲିରେ ପୋତି ଦେଇଥିଲେ । ତେବେ କେଉଁ କାରଣ ଯୋଗୁଁ କଇଁଛଙ୍କ ମୃତ୍ୟୁ ହୋଇଛି ତାହା ସ୍ପଷ୍ଟ ହୋଇନାହିଁ ।
