ଭୁବନେଶ୍ୱର : ସାମୁଦ୍ରିକ ବାତ୍ୟା ‘ତିତଲି’ କ୍ଷୟକ୍ଷତିର ପରିମାଣ ୨୭୬୫ କୋଟି ଟଙ୍କାକୁ ବୃଦ୍ଧି ପାଇଛି । ସ୍ୱତନ୍ତ୍ର ରିଲିଫ କମିଶନର(ଏସଆରସି) ବିଷ୍ଣୁପଦ ସେଠୀ ଗୁରୁବାର ଏକ ସାମ୍ବାଦିକ ସମ୍ମିଳନୀରେ ତିତଲି କ୍ଷୟକ୍ଷତି ଓ ପୁନରୁଦ୍ଧାର ସମ୍ପର୍କୀତ ତଥ୍ୟ ପ୍ରଦାନ କରି ଏହା କହିଛନ୍ତି।
ସେ କହିଛନ୍ତି ସାମୁଦ୍ରିକ ବାତ୍ୟା ତିତଲି, ବର୍ଷା ଓ ପରେ ଆସିଥିବା ବନ୍ୟାରେ ରାଜ୍ୟର ୧୭ଟି ଜିଲ୍ଲାର ୧୨୮ ବ୍ଲକର ୮,୧୨୫ଟି ଗାଁର କ୍ଷତିଗ୍ରସ୍ତ ହୋଇଛି। ଏଥିରେ ମୋଟ ୬୦ ଲକ୍ଷରୁ ଅଧିକ ଲୋକ ପ୍ରଭାବିତ ହୋଇଛନ୍ତି। ୨.୬୩ ଲକ୍ଷ ହେକ୍ଟର ଚାଷ ଜମି କ୍ଷତିଗ୍ରସ୍ତ ହୋଇଛି। ମୋଟ ୫୬ ହଜାର ୯୩୦ ଘର କ୍ଷତିଗ୍ରସ୍ତ ହୋଇଛି। ସେଥିମଧ୍ୟରୁ ୨୦ ହଜାର ୪୨୨ ଘର ସମ୍ପୂର୍ଣ୍ଣ ନଷ୍ଟ ହୋଇଥିବା ବେଳେ ୩୬ ହଜାର ୫୦୮ ଘର ଆଂଶିକ ଭାଙ୍ଗି ଯାଇଛି। ସେହିପରି ବାତ୍ୟା ତିତଲିରେ ୩୪ ହଜାର ୯୫୧ ଗୃହପାଳିତ ପଶୁପକ୍ଷୀଙ୍କ ମୃତ୍ୟୁ ଘଟିଥିବା ଏସଆରସି ପ୍ରକାଶ କରିଛନ୍ତି।
ତେବେ ବାତ୍ୟା ଓ ପରବର୍ତ୍ତୀ ବନ୍ୟାରେ ହୋଇଥିବା କ୍ଷୟକ୍ଷତି ଓ ଅନ୍ୟ କ୍ଷୟକ୍ଷତିର ଚୂଡାନ୍ତ ରିପୋର୍ଟ ଆଜି ସଂଧ୍ୟା ସୁଦ୍ଧା ଆସିବ। ଯେଉଁଥିରେ କ୍ଷତିର ପରିପାଣ ବଢିପାରେ ବୋଲି ଏସଆରସି ଶ୍ରୀ ସେଠୀ କହିଛନ୍ତି। ଆଜି କେନ୍ଦ୍ର ସରକାରଙ୍କୁ ରିପୋର୍ଟ ପ୍ରଦାନ କରାଯିବ ବୋଲି ଶ୍ରୀ ସେଠୀ ସୂଚନା ଦେଇଛନ୍ତି।
ଅନ୍ୟ ପକ୍ଷରେ ବାତ୍ୟା ‘ତିତ୍ଲି’ରେ ୫୭ ଲୋକଙ୍କ ମୃତ୍ୟୁ ଘଟିଥିବା ପ୍ରାଥମିକ ସରକାରୀ ଆକଳନରୁ ଜଣାପଡ଼ିଛି। ମୃତକଙ୍କ ପରିବାରକୁ ୧୦ ଲକ୍ଷ ଟଙ୍କା ଲେଖାଏଁ ସହାୟତା ରାଶି ଦିଆଯିବ ବୋଲି ବୁଧବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବାତ୍ୟାପୀଡ଼ିତ ଗଜପତି ଓ ଗଞ୍ଜାମ ଜିଲା ଗସ୍ତ ଅବସରରେ ଘୋଷଣା କରିଛନ୍ତି।