ବିହାର: ବିଜେପିରୁ ଶୀଘ୍ର ବାହାରି ଯାଆନ୍ତୁ ନୀତୀଶ କୁମାର । ନଚେତ ବୋମା ପକାଇ ଉଡାଇ ଦେବାକୁ ଧମକ । ନୀତୀଶଙ୍କ ସହ ଥିବା ବିଧାୟକଙ୍କୁ ମଧ୍ୟ ହତ୍ୟା କରିବାକୁ ଧମକ ଦିଆଯାଇଛି । ଏଭଳି ଧମକପୂର୍ଣ୍ଣ କଲ୍ ବିହାର ଡିଜିପି ଆରଏସ ଭଟ୍ଟୀଙ୍କ ଫୋନକୁ ଆସିଥିବା ସୂଚନା ମିଳିଛି । ବିହାରରେ ନୀତୀଶ କୁମାରଙ୍କ ନୂଆ ସରକାର ଗଠନ ହେବା ଦିନ ଠାରୁ ଅସନ୍ତୋଷ ଲାଗି ରହିଛି । ଡିଜିପିଙ୍କ ଫୋନକୁ ମେସେଜ ଏବଂ ଅଡ଼ିଓ କ୍ଲିପ ପଠାଇ ଏହି ଧମକ ଦେଇଛନ୍ତି ଦୁର୍ବୃତ୍ତ । ତେବେ ଏଭଳି ଧମକପୂର୍ଣ୍ଣ କଲ ଆସିବା ପରେ ପୁଲିସ କାର୍ଯ୍ୟାନୁଷ୍ଠାନ ଆରମ୍ଭ କରିଛି ।
ସୂଚନା ଅନୁସାରେ ଏହି ମାମଲାରେ ତଦନ୍ତ କରିବା ପରେ କର୍ଣ୍ଣାଟକରେ ଚଢଉ କରି ଅଭିଯୁକ୍ତକୁ ଗିରଫ କରି ପଚରାଉଚରା କରାଯାଉଛି । ବୁଧବାର ବିଳମ୍ବିତ ରାତିରେ ଅଭିଯୁକ୍ତ ଜଣଙ୍କ ତଦନ୍ତକାରୀ ଦଳ ପାଟନାରେ ପହଂଚିଥିଲେ । ନିକଟରେ ବିହାର ବିଧାନସଭାରେ ବହୁମତର ପ୍ରମାଣ ଦେଇଥିଲେ ନୀତୀଶ କୁମାର । ତାଙ୍କ ସପକ୍ଷରେ ୧୨୯ଖଣ୍ଡ ଭୋଟ ପଡିଥିଲା । ଇଣ୍ଡିଆ ମେଣ୍ଟରୁ ଓହରି ଏନଡିଏ ସହ ମେଣ୍ଟ କରି ନୀତୀଶ କୁମାର ସରକାରକୁ ଆସିବା ପରେ ବିହାରରେ ରାଜନୈତିକ ଅସ୍ଥିରତା ଦେଖାଦେଇଛି ।
