ନୂଆଦିଲ୍ଲୀ : ଭାରତୀୟ ସିନିୟର ପୁରୁଷ କ୍ରିକେଟ ଦଳ ୨୦୨୪ରେ ମୋଟ ୫୨ଟି ଅନ୍ତର୍ଜାତୀୟ ମ୍ୟାଚ ଖେଳିବ। ଯେଉଁଥିରେ ୧୦ଟି ଟେଷ୍ଟ, ୨୧ଟି ଦିନିକିଆ ଓ ୨୧ଟି ଟି୨୦ ମ୍ୟାଚ ସାମିଲ ରହିଛି। ଉକ୍ତ ୫୨ ଅନ୍ତର୍ଜାତୀୟ ମ୍ୟାଚ ମଧ୍ୟରେ ଟି୨୦ ବିଶ୍ବକପ ମ୍ୟାଚ ସ୍ଥାନ ପାଇନାହିଁ। ଉକ୍ତ କାର୍ଯ୍ୟସୂଚୀରେ ଇଂଲଣ୍ଡ ଗସ୍ତରେ ଯାଇ ଭାରତ ୩ ମ୍ୟାଚ ବିଶିଷ୍ଟ ଟେଷ୍ଟ ଶୃଙ୍ଖଳା ଖେଳିବାର କାର୍ଯ୍ୟକ୍ରମ ରହିଥିବା ନେଇ ବୁଧବାର ବିସିସିଆଇ ପକ୍ଷରୁ ସୂଚନା ଦିଆଯାଇଛି।
ଭାରତ ୨୦୨୪ରେ ଶ୍ରୀଲଙ୍କା ଗସ୍ତ କରିବ। ଉକ୍ତ ଗସ୍ତରେ ଭାରତ ୩ଟି ଦିନିକିଆ ଓ ୩ଟି ଟି୨୦ ମ୍ୟାଚ ଖେଳିବ। ଉକ୍ତ ଶୃଙ୍ଖଳା ଜୁଲାଇରେ ଖେଳାଯିବ ବୋଲି ଶ୍ରୀଲଙ୍କା କ୍ରିକେଟ ବୋର୍ଡ ପକ୍ଷରୁ ଘୋଷଣା କରାଯାଇଛି। ୨୦୨୪ବର୍ଷ ଲାଗି ଶ୍ରୀଲଙ୍କା କ୍ରିକେଟ ବୋର୍ଡ ପକ୍ଷରୁ କାର୍ଯ୍ୟସୂଚୀ ଘୋଷଣା କରାଯାଇଛି। ଉକ୍ତ କାର୍ଯ୍ୟସୂଚୀରେ ଭାରତୀୟ କ୍ରିକେଟ ଦଳର ଗସ୍ତ ରହିଛି। ଶ୍ରୀଲଙ୍କାର ଭବିଷ୍ୟତ ଯାତ୍ରା କାର୍ଯ୍ୟକ୍ରମରେ ୨୦୨୪ ଜାନୁଆରୀରେ ଜିମ୍ବାୱେ ଦଳ ଶ୍ରୀଲଙ୍କା ଗସ୍ତ କରିବ। ଏହା ପରେ ଆଫଗାନିସ୍ତାନ ଦଳ ଜାନୁଆରୀ ଓ ଫେବୃଆରୀରେ ଶ୍ରୀଲଙ୍କା ଗସ୍ତରେ ଆସିବ। ଫେବୃଆରୀ-ମାର୍ଚ୍ଚରେ ବାଂଲାଦେଶ ଦଳ ଶ୍ରୀଲଙ୍କା ଗସ୍ତରେ ଆସିବ। ଶ୍ରୀଲଙ୍କା, ଆଫଗାନିସ୍ତାନ ଓ ବାଂଲାଦେଶ ସମସ୍ତ ଦଳ ୩ଟି ଯାକ ଫର୍ମାଟର ଶୃଙ୍ଖଳା ଖେଳିବେ। ଜୁନ ଓ ଜୁଲାଇରେ ଟି୨୦ ବିଶ୍ବକପ ଆମେରିକାରେ ଖେଳାଯିବ। ଜୁଲାଇରେ ଭାରତୀୟ ଦଳ ଶ୍ରୀଲଙ୍କା ଗସ୍ତ କରିବ। ଭାରତ ଶ୍ରୀଲଙ୍କା ବିପକ୍ଷରେ ୩ଟି ଦିନିକିଆ ଓ ୩ଟି ଟି୨୦ ମ୍ୟାଚ ଖେଳିବ। ଏହା ପରେ ନ୍ୟୁଜିଲାଣ୍ଡ,ୱେଷ୍ଟଇଣ୍ଡିଜ୍ ଓ ଦକ୍ଷିଣ ଆଫ୍ରିକା ଦଳ ଶ୍ରୀଲଙ୍କା ଗସ୍ତ କରିବେ।
