ଆସନ୍ତା ସେପ୍ଟେମ୍ବର ୧୯ ତାରିଖରୁ ୟୁଏଇରେ ଆରମ୍ଭ ହେବାକୁ ଯାଉଥିବା ଆଇପିଏଲ୍ ମୁଖ୍ୟ ପ୍ରାୟୋଜକ ଦୌଡ଼ରେ ବାବା ରାମଦେବଙ୍କ ପତଞ୍ଜଳିକୁ ପଛରେ ପକାଇଛି ଟାଟା ଏଣ୍ଡ ସନ୍ସ । ଚଳିତ ବର୍ଷ ଆଇପିଏଲ୍ ମୁଖ୍ୟ ପ୍ରାୟୋଜକ ପଦରୁ ଭିଭୋକୁ ବାଦ ଦେବା ପରେ କିଛି କମ୍ପାନୀ ମୁଖ୍ୟ ପ୍ରାୟୋଜକ ହେବା ପାଇଁ ଆଗ୍ରହ ପ୍ରକାଶ କରିଥିଲେ । ବିଦେଶୀ କମ୍ପାନୀ ଆମାଜନ ଓ ବାବା ରାମଦେବଙ୍କ ପତଞ୍ଜଳି ଏଥିପାଇଁ ମୁଖ୍ୟ ଦାବିଦାର ଥିଲେ । କୁହାଯାଉଥିଲା ପତଞ୍ଜଳି ଚଳିତ ବର୍ଷ ଆଇପିଏଲ୍ ପ୍ରାୟୋଜକ ଭାବେ ମନୋନୀତ ହୋଇପାରେ । ମାତ୍ର ଶେଷ ମୂହୂର୍ତ୍ତରେ ଟାଟା ଏଣ୍ଡ ସନ୍ସ ଆଇପିଏଲ୍ ଆୟୋଜନ ନିମନ୍ତେ ଆଗ୍ରହ ପ୍ରକାଶ କରିବା ସହ ଏଥିପାଇଁ ଟେଣ୍ଡର ପକାଇଛି । କୁହାଯାଉଛି ଟାଟା ଏହି ଦୌଡ଼ରେ ସମସ୍ତଙ୍କୁ ପଛରେ ପକାଇ ଦେଇଛି । ଆସନ୍ତା ୧୮ ତାରିଖରେ ଏ ସମ୍ପର୍କରେ ଚୂଡ଼ାନ୍ତ ନିଷ୍ପତ୍ତି ନିଆଯିବ ।
ବିସିସିଆଇର ଏକ ଉଚ୍ଚ ଅଧିକାରୀଙ୍କ ସୂଚନା ଅନୁସାରେ ଟାଟା ଏଣ୍ଡ ସନ୍ସ ପ୍ରାୟୋଜନ ଅଧିକାର ହାସଲ ନିମନ୍ତେ ଟେଣ୍ଡର ପକାଇଛି । ଏକ ବଡ଼ ତଥା ଭାରତର ଲୋକପ୍ରିୟ ବ୍ରାଣ୍ଡ ହୋଇଥିବାରୁ ଏହା ଅନ୍ୟ ୪ ପ୍ରତିଦ୍ବନ୍ଦ୍ବୀଙ୍କଠାରୁ ଆଗରେ ରହିଛି । ବିସିସିଆଇ ଚଳିତ ବର୍ଷ ଆଇପିଏଲ୍ ପ୍ରାୟୋଜକ ଅଧିକାର କୌଣସି ଦେଶୀ କମ୍ପାନୀକୁ ଦେବାକୁ ଚାହୁଁଛି । ଏଥିରେ କିଛି ବୁଝାମଣା କରିବାକୁ ହେଲେ ତାହା କରିବାକୁ ମଧ୍ୟ ବିସିସିଆଇ ପ୍ରସ୍ତୁତ । ପ୍ରାୟୋଜକ ହେବାକୁ ଆଗ୍ରହୀ ଥିବା କମ୍ପାନୀ ମଧ୍ୟରେ ଟାଟା ସନ୍ସ, ଶିକ୍ଷା କ୍ଷେତ୍ରରେ ଜଡ଼ିତ ଅନ୍ ଏକାଡ଼େମୀ, ଜିଓ ଓ ପତଞ୍ଜଳୀ ଥିବାବେଳେ ବିଦେଶୀ (ଚୀନ) କମ୍ପାନୀ ବାଇଜୁ ମଧ୍ୟ ଏଥିପାଇଁ ଆବେଦନ କରିଛି । ଚୀନ କମ୍ପାନୀ ହୋଇଥିବାରୁ ବାଇଜୁକୁ ପ୍ରାୟୋଜକ ଅଧିକାର ନ ମିିଳିବା ସମ୍ଭାବନା ବେଶୀ ।
Comments are closed.