ମାଥିଆସଙ୍କୁ ବିବାହ କରିବା ପ୍ରଶ୍ନରେ ରାଗି ଗଲେ ତାପସୀ ପନ୍ନୁ

ନୂଆଦିଲ୍ଲୀ: ବଲିଉଡ ଓ ସାଉଥ୍‍ ଫିଲ୍ମ ଇଣ୍ଡଷ୍ଟ୍ରୀରେ ଅନେକ ଚଳଚ୍ଚିତ୍ରରେ ତାପସୀ ପାନ୍ନୁ ଜୀବନ୍ତ ଅଭିନୟ କରି ଲୋକପ୍ରିୟତା ସାଉଁଟିଛନ୍ତି। ଏବେ ସବୁଠି ତାପସୀଙ୍କ ବିବାହକୁ ନେଇ ଚର୍ଚ୍ଚା ହେଉଛି। ଆଲୋଚନା ହେଉଛି ଯେ ତାପସୀ ଖୁବଶୀଘ୍ର ବ୍ୟାଡମିଣ୍ଟନ ଖେଳାଳି ତଥା ଅଲିମ୍ପିକ ପଦକ ବିଜେତା ମାଥିଆସ ବୋଙ୍କୁ ବିବାହ କରିବେ। ୧୦ବର୍ଷ ହେଲାଣି ଉଭୟ ଭଲ ବନ୍ଧୁ ଭାବେ ଥିବା ବେଳେ ଦୁହେଁ ଶୀଘ୍ର ବିବାହ କରିବାକୁ ଯାଉଥିବା ଚର୍ଚ୍ଚା ହେଉଛି। ବର୍ତ୍ତମାନ ବିବାହ କରିବାକୁ ନେଇ ତାପସୀଙ୍କୁ ପ୍ରଶ୍ନ ପଚରାଯିବାରୁ ଏଥିରେ ସେ ରାଗି ଯାଇ ବିରକ୍ତି ପ୍ରକାଶ କରିଥିଲେ।
ଏକ ସାକ୍ଷାତକାର ସମୟରେ ତାପସୀ କହିଛନ୍ତି ‘ମୁଁ ମୋର ବ୍ୟକ୍ତିଗତ ଜୀବନ ବିଷୟରେ କୌଣସି ସ୍ପଷ୍ଟୀକରଣ ଦେଇନାହିଁ କିମ୍ବା କେବେବି ଦେବୀ ନାହିଁ’। ତେବେ ମାର୍ଚ୍ଚ ଶେଷ ସୁଦ୍ଧା ଦୁହେଁ ବିବାହ କରିବା ନେଇ ଖବର ସାମ୍ନାକୁ ଆସିଛି। ଉଦୟପୁରରେ ଶିଖ ଏବଂ ଖ୍ରୀଷ୍ଟିଆନ ରୀତିନୀତି ଅନୁସାରେ ତାପସୀ ଏବଂ ମାଥିଆସ ବିବାହ କରିପାରନ୍ତି। କିନ୍ତୁ ଏହି ବିବାହ ସମ୍ପର୍କରେ ଉଭୟ ମୁହଁ ଖୋଲିନାହାଁନ୍ତି।