କେନ୍ଦୁଝରଗଡ଼: ଡ୍ରିମ୍ସ ଇଭେଣ୍ଟ ପକ୍ଷରୁ କାଳୀପଡ଼ିଆରେ ସ୍ବଦେଶୀ ମେଳା ଉଦ୍ଘାଟିତ ହୋଇଛି। ମଙ୍ଗଳବାର ସନ୍ଧ୍ୟାରେ କେନ୍ଦୁଝରଗଡ଼ ପୌରପାଳିକାର ଉପାଧ୍ୟକ୍ଷ ବରଦା ପ୍ରସନ୍ନ ଦାସ ମୁଖ୍ୟ ଅତିଥି ଭାବେ ଯୋଗଦେଇ ଏହି ମହୋତ୍ସବକୁ ଉଦ୍ଘାଟନ କରିବା ଅବସରରେ ସହରବାସୀ ମେଳାର ମଜା ଉଠାଇବେ ବୋଲି ଆଶାବ୍ୟକ୍ତ କରିଛନ୍ତି। ଅନ୍ୟମାନଙ୍କ ମଧ୍ୟରେ ସମାଜସେବୀ ଧରିତ୍ରୀ ରାଉତ ଓ ମଳୟ ମହାପାତ୍ର, କେନ୍ଦୁଝରଗଡ଼ ପୌରପାଳିକା ୭ନଂ ୱାର୍ଡ କାଉନସିଲର ଅଭିନାଶ ମିଶ୍ର, ବାଲୁଙ୍କେଶ୍ୱର ମହେଶ ବିଜେ ଟ୍ରଷ୍ଟ ସଭାପତି ରାଜକିଶୋର ନନ୍ଦ ପ୍ରମୁଖ ସମ୍ମାନିତ ଅତିଥି ଭାବେ ଯୋଗଦେଇ ମହୋତ୍ସବର ସଫଳତା କାମନା କରିଥିଲେ। ଆୟୋଜକ ଡ୍ରିମ୍ସର ସମ୍ପାଦକ ଅମରେନ୍ଦ୍ର ସାହୁ, ପ୍ରମୋଦ କୁମାର ଓ ଚିତ୍ତରଞ୍ଜନ ବେହେରା ପ୍ରମୁଖ ମେଳା ଆୟୋଜନରେ ସହଯୋଗ କରିଆସୁଛନ୍ତି। ଜିଲା ତଥା ରାଜ୍ୟ ବାହାରର ବିଭିନ୍ନ ହସ୍ତକଳା ଓ ହସ୍ତଶିଳ୍ପ ସାମଗ୍ରୀ ୧୦୦ରୁ ଊର୍ଦ୍ଧ୍ବ ଷ୍ଟଲରେ ପ୍ରଦର୍ଶନ ସହ ବିକ୍ରି ଆରମ୍ଭ ହୋଇଛି। ସ୍ବଦେଶୀ ମେଳା ବା ଗ୍ରୀଷ୍ମ ମହୋତ୍ସବ ଆସନ୍ତା ୧୯ ତାରିଖ ପର୍ଯ୍ୟନ୍ତ ପ୍ରତ୍ୟହ ରାତି ୧୦ଟା ପର୍ଯ୍ୟନ୍ତ ଖୋଲା ରହିବ ବୋଲି ଆୟୋଜକ ଡ୍ରିମ୍ସ ସଂଯୋଜକ ସନ୍ତୋଷ କୁମାର ମହାପାତ୍ର ସୂଚନା ଦେଇଛନ୍ତି। ଏଥିସହ ସହରବାସୀ ଏହାର ମଜା ଉଠାଇବାକୁ ନିବେଦନ କରିଛନ୍ତି। ଏହି ମହୋତ୍ସବରେ ବିଭିନ୍ନ ସାମଗ୍ରୀର ଷ୍ଟଲ ସହ ଖାଦ୍ୟ ଷ୍ଟଲ ଓ ମୀନା ବଜାରର ମଜା ଉଠାଇବାକୁ ପ୍ରଥମ ସନ୍ଧ୍ୟାରୁ ଲୋକଙ୍କ ଭିଡ ପରିଲକ୍ଷିତ ହୋଇଛି।
Comments are closed.