ନୂଆଦିଲ୍ଲୀ : ପାକିସ୍ତାନ ଅଧିକୃତ କ୍ଷେତ୍ର ଭିତରେ ପ୍ରବେଶ କରି ସର୍ଜିକାଲ ଷ୍ଟ୍ରାଇକ୍ ଅଭିଯାନକୁ ସଫଳ କରିବା ନିମନ୍ତେ ଭାରତୀୟ ସେନା ଏକ ଅଭିନବ ଉପାୟ ଅବଲମ୍ବନ କରିଥିଲା। ରାତିର ଅନ୍ଧକାର ମଧ୍ୟରେ ପାକିସ୍ତାନ ଅଧିକୃତ ମାଟିରେ ପାଦ ଦେବା ଯଦିଓ ଯବାନଙ୍କ ପାଇଁ ବିଶେଷ କଷ୍ଟକର ନ ଥିଲା ତଥାପି ସେଠାକାର କୁକୁରଙ୍କ ଆଘ୍ରାଣ ଶକ୍ତିରୁ ନିଜକୁ ଦୂରେଇ ରଖିବା ଥିଲା ଏକ ବୃହତ ଚ୍ୟାଲେଞ୍ଜ। ଏହି ସମସ୍ୟାର ସମାଧାନ ନିମନ୍ତେ ଯବାନମାନେ ଚିତାବାଘର ମୂତ୍ର ଓ ମଳ ବ୍ୟବହାର କରିଥିଲେ ବୋଲି ପୂର୍ବତନ କମାଣ୍ଡର ଲ୍ୟୁଟନାଣ୍ଟ ଜେନେରାଲ ରାଜେନ୍ଦ୍ର ନିମ୍ବୋରକାର ମଙ୍ଗଳବାର ପୁଣେଠାରେ ପ୍ରକାଶ କରିଛନ୍ତି। ସେ ଏକ ପୁରସ୍କାର ବିତରଣୀ ଉତ୍ସବରେ କହିଛନ୍ତି, ସର୍ଜିକାଲ ଷ୍ଟ୍ରାଇକରେ ଯିବା ବେଳେ ଗ୍ରାମାଞ୍ଚଳର ରାସ୍ତାରେ କୁକୁରମାନେ ଯବାନମାନେ ସେମାନଙ୍କୁ ଅନୁସରଣ କରି ଭୋକିବାର ଆଶଙ୍କା ଥିଲା। ମାତ୍ର ସାଥିରେ ଚିତାବାଘର ମୂଳ ଓ ମୂତ୍ର ନେଇ ଯାଇଥିବାରୁ କୁକୁରଗୁଡିକ କୌଣସି ଯବାନଙ୍କ ପାଖକୁ ଆସିବାକୁ ସାହସ କରି ନ ଥିଲେ। ୨୦୧୬ ସେପ୍ଟେମ୍ବରରେ ଭାରତୀୟ ସେନା ଭାରତ-ପାକିସ୍ତାନ ନିୟନ୍ତ୍ରଣ ରେଖା ଅତିକ୍ରମ କରି ପାକିସ୍ତାନ ଅଧିକୃତ କାଶ୍ମୀରରେ ଥିବା ଆତଙ୍କବାଦୀ ଶିବିରକୁ ଧ୍ୱଂସ କରିଥିଲା। ଉକ୍ତ ବର୍ଷ ସେପ୍ଟେମ୍ବର ୧୮ରେ ଉରିଠାରେ ଭାରତୀୟ ସେନା ଉପରେ ଆତଙ୍କବାଦୀ ଆକ୍ରମଣରେ ୧୯ ଯବାନ ସହିଦ ହେବା ପରେ ସର୍ଜିକାଲ ଷ୍ଟ୍ରାଇକ କରାଯାଇଥିଲା।
