ନୂଆଦିଲ୍ଲୀ: ଦେଶରେ ୧୮ରୁ ୪୪ ବର୍ଷ ବୟସ୍କ ନାଗରିକଙ୍କ ପାଇଁ କେନ୍ଦ୍ର ସରକାରଙ୍କ ଦେୟଯୁକ୍ତ କୋଭିଡ ଟିକାକରଣ ନୀତିକୁ ସୁପ୍ରିମକୋର୍ଟ ବୁଧବାର ସମାଲୋଚନା କରିଛନ୍ତି। ମାନ୍ୟବର ସର୍ବୋଚ୍ଚ ଅଦାଲତ କହିଛନ୍ତି, ଏହି ବୟସ ବର୍ଗଙ୍କ ପାଇଁ କୋଭିଡ-୧୯ ଟିକାକରଣ ନୀତି ସଂପୂର୍ଣ୍ଣ ଭାବରେ ଏକଚାଟିଆ ଏବଂ ଅଯୁକ୍ତିଯୁକ୍ତ ହୋଇଛି। ସମଗ୍ର ଦେଶରେ ଟିକାର ମୂଲ୍ୟ ସମାନ ରଖାଯିବାକୁ ସର୍ବୋଚ୍ଚ ଅଦାଲତ କହିବାର କିଛିଦିନ ପରେ ଏହି ପ୍ରସଙ୍ଗରେ ସରକାରଙ୍କୁ ସମାଲୋଚନା କରିଛନ୍ତି। ସଂପ୍ରତି କେନ୍ଦ୍ର ସରକାରଙ୍କ ଟିକାକରଣ ନୀତିରେ ୪୫ ବର୍ଷ ଏବଂ ତାହାଠାରୁ ଅଧିକ ବୟସ ବର୍ଗଙ୍କୁ ମାଗଣା ଟିକା ପ୍ରଦାନ କରାଯାଉଥିବାବେଳେ ୧୮ରୁ ୪୪ ବର୍ଷ ବୟସ୍କଙ୍କ ପାଇଁ ତାହାକୁ ଦେୟଯୁକ୍ତ କରାଯାଇଛି।
କୋଭିଡ-୧୯ ମହାମାରୀର ଦ୍ୱିତୀୟ ଲହରରେ ଯୁବବର୍ଗ ଅଧିକ ପ୍ରଭାବିତ ହେଉଛନ୍ତି ଏବଂ ସେମାନଙ୍କ ମଧ୍ୟରୁ ଅନେକଙ୍କ ଅବସ୍ଥା ଜଟିଳ ହୋଇପଡୁଥିବା ସୁପ୍ରିମକୋର୍ଟ ଉଲ୍ଲେଖ କରିଥିଲେ। କେନ୍ଦ୍ର ବଜେଟରେ କୋଭିଡ ଟିକା ସଂଗ୍ରହ ପାଇଁ ବରାଦ କରାଯାଇଥିବା ୩୫,୦୦୦ କୋଟି ଟଙ୍କା କିଭଳି ଖର୍ଚ୍ଚ କରାଯାଉଛି ତାହା ସ୍ପଷ୍ଟ କରିବାକୁ ମାନ୍ୟବର ସର୍ବୋଚ୍ଚ ଅଦାଲତ କେନ୍ଦ୍ର ସରକାରଙ୍କୁ କହିଛନ୍ତି। ସେହି ଅର୍ଥକୁ ଦେଶର ୧୮ରୁ ୪୪ ବର୍ଷ ବୟସ୍କ ନାଗରିକଙ୍କ ଟିକାକରଣ ନିମନ୍ତେ କାହିଁକି ବ୍ୟବହାର କରାଯାଇପାରିବ ନାହିଁ, ତାହା ମଧ୍ୟ ସୁପ୍ରିମକୋର୍ଟ ଜାଣିବାକୁ ଚାହିଁଛନ୍ତି।
