ରେଙ୍ଗାଲିକ୍ୟାମ୍ପ : ଅତାବିରା ୱାର୍ଡ ନଂ ୪ ରେ ସାଢେ଼ ଛଅ କୋଟି ଟଙ୍କା ବ୍ୟୟ ଅଟକଳରେ ନିର୍ମିତ ହେଉଛି ଏକ ଇଣ୍ଡୋର ଷ୍ଟାଡିୟମ୍। ସ୍ଥାନୀୟ ବିଧାୟିକା ଶ୍ରୀମତୀ ସ୍ନେହାଙ୍ଗିନୀ ଛୁରିଆଙ୍କ ପ୍ରସ୍ତାବ କ୍ରମେ ତଥା ରାଜ୍ୟ ସରକାରଙ୍କ ଅନୁଦାନ ରାଶିରେ ଏକ ଏକର ଜମିରେ ନିର୍ମାଣ ହେଉଛି ଏହି ଷ୍ଟାଡିୟମ। କିନ୍ତୁ ନିର୍ମାଣ କାର୍ଯ୍ୟ ଧିମେଇ ଯାଉଥିବା ଜାଣି ବରଗଡ଼ ଉପ ଜିଲ୍ଲାପାଳ ଶୁଭେନ୍ଦୁ ସାମଲ ସୋମବାର ଅଚାନକ ପରିଦର୍ଶନ କରିବା ପାଇଁ ଆସିଥିଲେ। ଚାରିଆଡ଼େ ବୁଲି ଦେଖି ସଂପୃକ୍ତ ଠିକାଦାରଙ୍କୁ ନିର୍ମାଣ କାର୍ଯ୍ୟରେ ବିଳମ୍ବର କାରଣ ପଚାରି ବୁଝିଥିଲେ। ବର୍ଷା ପାଣି ଜମିରହୁଥିବା ଯୋଗୁଁ କାମ କରିହେଉ ନଥିବା ଯୋଗୁଁ ବିଳମ୍ବ ହେଉଛି ବୋଲି ସଂପୃକ୍ତ ଠିକାଦାର ଉତ୍ତର ରଖିଥିଲେ। ଜମା ହୋଇଥିବା ପାଣିକୁ ନିଷ୍କାସନ କରିବାର ବିକଳ୍ପ ବ୍ୟବସ୍ଥା କରି ନିର୍ମାଣ କାର୍ଯ୍ୟକୁ ତ୍ୱରାନ୍ୱିତ କରିବା ପାଇଁ ଉପ ଜିଲ୍ଲାପାଳ ଶ୍ରୀ ସାମଲ ପରାମର୍ଶ ଦେଇଥିଲେ।
ଆରଏମସି ର ପ୍ରେକ୍ଷାଳୟ ପରି ନିମ୍ନ ମାନର କାମ ନହୋଇ କାମ ଉଚ୍ଚ ମାନର ହେବା ଆବଶ୍ୟକ ବୋଲି ସେ ଠିକାଦାରଙ୍କୁ ସତର୍କ କରି ଯାଇଛନ୍ତି । ଏହି ଷ୍ଟାଡିୟମ ଦ୍ବାରା ଅଞ୍ଚଳର କ୍ରୀଡାବିତ୍, ଖେଳ ପ୍ରେମୀ ମାନଙ୍କର ଅନେକ ଉପକାର ସାଧିତ ହୋଇପାରିବ। ଷ୍ଟାଡିୟମ୍ ଅଭାବରୁ ଅଞ୍ଚଳର ଖେଳାଳି ମାନେ ଅଭ୍ୟାସ କରିବାକୁ ତଥା ବ୍ୟାୟାମ ଆଦି କରିବାକୁ ବିଭିନ୍ନ ବେସରକାରୀ ଅନୁଷ୍ଠାନକୁ ଯିବା ପାଇଁ ବାଧ୍ୟ ହେଉଛନ୍ତି । ଏଥିପାଇଁ ଅନେକ ବେସରକାରୀ ବ୍ୟାୟାମଶାଳା ମୁଣ୍ଡ ଟେକିଲାଣି। ସମସ୍ତେ ଆଶା ବାନ୍ଧି ରହିଛନ୍ତି ଏହି ଇଣ୍ଡୋର୍ ଷ୍ଟାଡିୟମ୍ ଉପରେ। ତେଣୁ ଯେତେ ଶୀଘ୍ର ହେବ,ଏହି ଷ୍ଟାଡିୟମର କାମ ସମ୍ପୂର୍ଣ ହେବା ନିହାତି ଆବଶ୍ୟକ। ତେବେ ଦେଖାଯାଉ ଉପ ଜିଲ୍ଲାପାଳଙ୍କ ପରିଦର୍ଶନ ଏହି ଷ୍ଟାଡିୟମ୍ ନିର୍ମାଣ କାମକୁ କେତେ ତ୍ୱରାନ୍ୱିତ କରିପାରୁଛି । ଏହି ପରିଦର୍ଶନ ବେଳେ ଅତାବିରା ତହସିଲଦାର ସୌଭାଗ୍ୟ ବେହେରା, ସିଦ୍ଧାର୍ଥ ଶଙ୍କର ପଣ୍ଡା ଉପସ୍ଥିତ ଥିଲେ।
