ଅମ୍ବାଭୋନା: ବରଗଡ ଜିଲ୍ଲା ଅମ୍ବାଭୋନା ବ୍ଲକ ବାରପାହାଡ କୃଷକ ସଂଗଠନ ଆହ୍ବାନକ୍ରମେ ଫସଲ ବୀମା ପ୍ରଦାନ ଦାବିରେ ଶୁକ୍ରବାର ଭଟଲି ଓ ଅମ୍ବାଭୋନା ରାସ୍ତାକୁ ଅବରୋଧ କରିବା ସହ ସମ୍ବରଦରହା ରାସ୍ତା ଉପରେ ଶହ ଶହ ଚାଷୀ ବସି ରାସ୍ତାରୋକ ଆନ୍ଦୋଳନ କରିଛନ୍ତି। ରାସ୍ତା ଅବରୋଧ ଯୋଗୁଁ ଉଭୟ ପାର୍ଶ୍ବର ଶହ ଶହ ଯାନବାହାନ ଚଳାଚଳ ବନ୍ଦ ହୋଇ ରାସ୍ତାକଡରେ ଅଟକି ରହିଥିଲା। ଏହି ଆନ୍ଦୋଳନ ଯୋଗୁଁ ଦ୍ବାରୀ ଘଣ୍ଟେଶ୍ଵରୀ ବାଏପାସ ରାସ୍ତାରେ ବହୁ ଯାନବାହାନ ଘାଟି ଉପରେ ଅଟକି ରହିବାରୁ ଯାତ୍ରୀମାନେ ଅସୁବିଧାର ସମ୍ମୁଖୀନ ହୋଇଥିଲେ।
ସେହିପରି ବରଗଡରୁ ଛତିଶଗଡ ବସଚଳାଚଳ ବନ୍ଦ ଯୋଗୁଁ ଶହ ଶହ ଯାତ୍ରୀ ସମ୍ବରଦରହା ଓ ଅମ୍ବାଭୋନା ରାସ୍ତାରେ ଚାଲି ଚାଲି ଛତିଶଗଡ ସରିଆ, ବରମକେଲା ଯାଉଥିବା ଦେଖିବାକୁ ମିଲିଥିଲା। ଦୁଇ ଚକିଆ ବାଇକ ମଧ୍ୟ ଛାଡିନଥିଲେ ଏବଂ ଚାଷୀ ଆନ୍ଦୋଳନ ହେତୁ ସାଧାରଣ ଜନତା ଯାତୟତରେ ନାହିଁ ନଥିବା ଅସୁବିଧାର ସମ୍ମୁଖୀନ ହୋଇଥିଲେ। ଏହି ଆନ୍ଦୋଳନ ସଂପର୍କରେ ଖବର ପାଇ ବରଗଡ ଅତିରିକ୍ତ ଜିଲ୍ଲାପାଳ ଆରତି ଭୋଇ, ଅମ୍ବାଭୋନା ତହସିଲଦାର ସିତାରାମ ଭୋଇ ଆନ୍ଦୋଳନ ସ୍ଥଳରେ ପହଞ୍ଚି କୃଷକ ସଂଗଠନର କର୍ମକର୍ତ୍ତାଙ୍କ ସହିତ ଦୀର୍ଘ ସମୟ ଧରି ଆଲୋଚନା କରିବା ପରେ ପ୍ରଶାସନିକ ସ୍ତରରେ ୧୫ ଦିନ ପରେ ଫସଲ ବୀମା ସମସ୍ୟାର ତଦନ୍ତ କରି ସମାଧାନ କରାଯିବ ବୋଲି ପ୍ରତିଶୃତି ଦେଇଥିଲେ । ପରେ ରାସ୍ତା ଅବରୋଧ ହଟି ଆନ୍ଦୋଳନ ପ୍ରତ୍ୟାହୃତ ହୋଇଥିଲା। ବରଗଡ ଜିଲ୍ଲାପାଳଙ୍କ ଉଦ୍ଦେଶ୍ୟରେ ଏକ ଦାବିପତ୍ର ଅମ୍ବାଭୋନା ତହସିଲଦାରଙ୍କୁ ପ୍ରଦାନ କରିଥିଲେ। ବିଗତ ୨୦୨୧ରେ ଅମ୍ବାଭୋନା ବ୍ଲକ ମରୁଡିର ଉପଯୁକ୍ତ କ୍ଷୟକ୍ଷତି ଆକଳନ କରି ଫସଲ ବୀମା ପ୍ରଦାନ କରାଯିବାକୁ ଦାବି କରିଥିଲେ। ବୀମା କମ୍ପାନୀମାନଙ୍କ ବ୍ୟାପକ ଅବହେଳା ଯୋଗୁଁ ବହୁ ଚାଷୀ ଫସଲ ବୀମା ତାଲିକାରେ ବଞ୍ଚିତ ହୋଇଛନ୍ତି ବୋଲି ଚାଷୀଗଣ ଅଭିଯୋଗ କରିଥିଲେ।
