ଗାଡ଼ି ପଛରେ ସାଙ୍ଗିଆ ଲେଖିବା ପଡ଼ିଲା ମହଙ୍ଗା: ସାକ୍ସେନା ଜୀଙ୍କ ନାମରେ ପୁଲିସ କାଟିଲା ଚାଲାଣ

ଗାଡ଼ି ପଛରେ ଅନେକ ନିଜ ନାଁ, ପିଲାଙ୍କ ନାଁ, ସାଙ୍ଗିଆ ଲେଖିଥାଆନ୍ତି । କେହିକେହି ନମ୍ବର ପ୍ଲେଟରେ ମଧ୍ୟ ବିଭିନ୍ନ ଲେଖା ଲେଖିଥାଆନ୍ତି । ଆଉ ଆପଣ ଯଦି ଏପରି କରିଛନ୍ତି ତେବେ ତୁରନ୍ତ ଏହାକୁ ହଟାଇ ଦିଅନ୍ତୁ । ଆସନ୍ତା ୧ ତାରିଖରୁ ଯାନବାହନ ପଛରେ ଜାତି, ସାଙ୍ଗିଆ ଆଦି ଲେଖିଥିଲେ ଚାଲାଣ କଟିବ । ଦେଶରେ ଏ ସଂକ୍ରାନ୍ତରେ ପ୍ରଥମ ଚାଲାଣ କଟିଛି ଉତ୍ତରପ୍ରଦେଶରେ । ନିଜ ଗାଡ଼ି ପଛରେ ସାକ୍ସେନା ଜୀ ଲେଖିଥିବା ଜଣେ ବ୍ୟକ୍ତିଙ୍କୁ ୫୦୦ ଟଙ୍କା ଜୋରିମାନା କରାଯାଇଛି । ଉତ୍ତରପ୍ରଦେଶ ପୁଲିସର ଏହି କାର୍ଯ୍ୟ ସୋସିଆଲ ମିଡ଼ିଆରେ ଭାଇରାଲ ହୋଇଛି।  ଅବଶ୍ୟ ଉତ୍ତରପ୍ରଦେଶ ସରକାର ପୂର୍ବରୁ କୌଣସି ଗାଡ଼ିରେ ଜାତି ବା ଧାର୍ମିକ ଷ୍ଟିକର ଲଗାଇବା ନେଇ ନିର୍ଦେଶନାମା ଜାରି କରିଛନ୍ତି ।

ପୁଲିସ କମିଶନର ଡ଼ି.କେ.ଠାକୁରଙ୍କ ସୂଚନା ଅନୁସାରେ ରାସ୍ତାରେ ଯାଞ୍ଚ ଚାଳିଥିବା ବେଳେ କାନପୁରରୁ ଆସୁଥିବା ଏକ ଭ୍ୟାନକୁ ପୁଲିସ ଏସଆଇ ଦୀପକ କୁମାର ଅଟକାଇଥିଲେ । କାରଣ ଥିଲା ଗାଡ଼ି ପଛରେ ସାକ୍ସେନା ଜୀ ବୋଲି ହିନ୍ଦିରେ ଲେଖାଯାଇଥିଲା। ଉତ୍ତରପ୍ରଦେଶ ସରକାରଙ୍କ ନିର୍ଦେଶକ୍ରମେ କୌଣସି ଗାଡ଼ିରେ ଜାତି କିମ୍ବା ଧର୍ମ ସଂକ୍ରାନ୍ତ କୌଣସି ଶବ୍ଦ ରହିବ ନାହିଁ । ମାତ୍ର ଏହି ଗାଡ଼ି ମାଲିକ ତାହାର ଉଲ୍ଲଙ୍ଘନ କରିଥିବାରୁ ତାଙ୍କର ଚାଲାଣ କଟିଥିଲା । ଏହା ସହ ତୁରନ୍ତ ଗାଡ଼ି ପଛରେ ଥିବା ଲେଖା ମଧ୍ୟ ହଟାଇବାକୁ ନିର୍ଦେଶ ଦିଆଯାଇଥିଲା ।