ବିଏସଏନଏଲ ୫ଜି ସିମ୍ – ଅନଲାଇନ୍ ବୁକ୍ କଲେ ୯୦ ମିନିଟରେ ହୋମ ଡେଲିଭରି

ଡେସ୍କ: ଏୟାରଟେଲ ନିକଟରେ ବ୍ଲିଙ୍କିଟ୍ ସହ ହାତ ମିଳାଇଛି। ଏବେ ଆପଣ ବ୍ଲିଙ୍କିଟ୍ ଜରିଆରେ ୧୦ ମିନିଟରେ ଘରେ ନୂଆ ଏୟାରଟେଲ୍ ସିମ୍ କାର୍ଡ ଅର୍ଡର କରିପାରିବେ। କିନ୍ତୁ ଏୟାରଟେଲ ଏକମାତ୍ର ନୁହେଁ ଯିଏ ଏହା କରିଛି। ବର୍ତ୍ତମାନ ବିଏସଏନଏଲ ୫ଜି ସିମ୍ କାର୍ଡ ମଧ୍ୟ ଅନଲାଇନ ବୁକିଂ ପାଇଁ ଉପଲବ୍ଧ। ବିଏସଏନଏଲ ଏହି ନୂଆ ସେବା ଆରମ୍ଭ କରିଛି, ଯେଉଁଥିରେ ଉପଭୋକ୍ତା ଅନଲାଇନରେ ୫ଜି ସିମ୍ ଅର୍ଡର କରିପାରିବେ।

ବିଏସଏନଏଲ୍ ସିମ୍ କାର୍ଡ ବୁକ୍ କରିବାର ୯୦ ମିନିଟ୍ ମଧ୍ୟରେ ଏହି ସିମ୍ କାର୍ଡ ଉପଭୋକ୍ତାଙ୍କ ପାଖରେ ପହଞ୍ଚିଯିବ। ଆପଣଙ୍କୁ କହିରଖୁଛୁ ଯେ ଭାରତ ସଞ୍ଚାର ନିଗମ ଲିମିଟେଡ (ବିଏସଏନଏଲ) ଦ୍ରୁତ ଗତିରେ ସାରା ଦେଶରେ ନିଜର ୪ଜି ନେଟୱାର୍କ ବିସ୍ତାର କରୁଛି। କେନ୍ଦ୍ରମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆଙ୍କ କହିବାନୁଯାୟୀ, ୨୦୨୬ ମାର୍ଚ୍ଚ ସୁଦ୍ଧା ୧ ଲକ୍ଷ ୪ଜି ଟାୱାର ସ୍ଥାପନ କରାଯିବ, ସେଥିମଧ୍ୟରୁ ଚଳିତ ବର୍ଷ ଅକ୍ଟୋବର ସୁଦ୍ଧା ୮୦ ହଜାର ଟାୱାର ସ୍ଥାପନ କରାଯିବ। ବର୍ତ୍ତମାନର ୪ଜି ଭିତ୍ତିଭୂମି ବ୍ୟବହାର କରି ୫ଜି ସେବାକୁ ସକ୍ଷମ କରିବା ଦିଗରେ ମଧ୍ୟ ସରକାର କାର୍ଯ୍ୟ କରୁଛନ୍ତି। ଅର୍ଥାତ୍ ବିଏସଏନଏଲ ଉପଭୋକ୍ତାମାନେ ଖୁବଶୀଘ୍ର ସାମାନ୍ୟ ଅପଗ୍ରେଡ୍ ସହ ଦ୍ରୁତ ଇଣ୍ଟରନେଟ୍ ସ୍ପିଡ୍ ଉପଭୋଗ କରିବାକୁ ସକ୍ଷମ ହେବେ।

ନିକଟରେ ଜିଓ, ଏୟାରଟେଲ ଏବଂ ଭିଆଇ ଭଳି ଘରୋଇ ଟେଲିକମ୍ କମ୍ପାନିଗୁଡ଼ିକର ଶୁଳ୍କ ବୃଦ୍ଧି ପରେ ଅନେକ ଉପଭୋକ୍ତା ବିଏସଏନଏଲ ଆଡ଼କୁ ମୁହାଁଉଛନ୍ତି। ଜୁଲାଇ ୨୦୨୪ରେ ବିଏସଏନଏଲ କେବଳ ଆନ୍ଧ୍ରପ୍ରଦେଶରେ ୨.୧୭ ଲକ୍ଷରୁ ଅଧିକ ନୂଆ ଗ୍ରାହକ ଯୋଡ଼ିଛି, ଯାହା କି ଏହି ରାଷ୍ଟ୍ରାୟତ୍ତ ଟେଲିକମ୍ କମ୍ପାନୀ ପାଇଁ ଏକ ବଡ଼ ଉପଲବ୍ଧି। ଚାହିଦା ବଢ଼ୁଥିବାରୁ ବିଏସଏନଏଲ କାର୍ଯ୍ୟାଳୟରେ ଭିଡ଼ ଜମିବା ସହ ଅନେକ ଗ୍ରାହକ ବ୍ୟକ୍ତିଗତ ଭାବେ ସିମ୍ କାର୍ଡ ପାଇପାରୁନାହାନ୍ତି। ଏହି ସମସ୍ୟାର ସମାଧାନ ପାଇଁ ବିଏସଏନଏଲ ଏକ ଅନଲାଇନ ସିମ୍ ଅର୍ଡର ସିଷ୍ଟମ ଲଞ୍ଚ କରିଛି, ଯେଉଁଥିରେ ଦ୍ରୁତ ଡେଲିଭରୀ ଏବଂ ସହଜ କେୱାଇସି ରହିଛି।

ଅନଲାଇନରେ କିପରି ଅର୍ଡର କରିବେ
ବିଏସଏନଏଲ ସିମ୍ କାର୍ଡ ଯଦି ଆପଣ ନୂଆ ବିଏସଏନଏଲ ୪ଜି କିମ୍ବା ୫ଜି ସିମ୍ ପାଇବାକୁ ଚାହୁଁଛନ୍ତି ତେବେ ଜାଣନ୍ତୁ କିପରି ଅନଲାଇନରେ ଅର୍ଡର କରିବେ:
୧. ୱେବସାଇଟକୁ ଯାଆନ୍ତୁ: https://prune.co.in/
୨. “Buy SIM Card” ଉପରେ କ୍ଲିକ୍ କରନ୍ତୁ ଏବଂ ଆପଣଙ୍କ ଦେଶ (ଭାରତ) ଚୟନ କରନ୍ତୁ।
୩. ଆପଣଙ୍କ ଅପରେଟର ଭାବରେ ବିଏସଏନଏଲ ଚୟନ କରନ୍ତୁ ଏବଂ ଆପଣଙ୍କ ପସନ୍ଦର FRC (ପ୍ରଥମ ରିଚାର୍ଜ କୁପନ୍) ପ୍ଲାନ୍ ଚୟନ କରନ୍ତୁ।
୪. ଓଟିପି ଦିଅନ୍ତୁ।
୫. ଏବେ ଆପଣଙ୍କ ଠିକଣା ଲେଖନ୍ତୁ ଏବଂ ସ୍କ୍ରିନରେ ଦିଆଯାଇଥିବା ନିର୍ଦ୍ଦେଶାବଳୀ ଅନୁସରଣ କରନ୍ତୁ।
୬. ଆପଣଙ୍କ ସିମ୍ ୯୦ ମିନିଟ୍ ମଧ୍ୟରେ ଆପଣଙ୍କ ଘରେ ପହଞ୍ଚିବ।