ଜୟପୁର : ରାଜସ୍ଥାନରେ କନେଷ୍ଟବଳ ନିଯୁକ୍ତି ପରୀକ୍ଷାରେ କପି ରୋକିବ ପାଇଁ ରାଜ୍ୟ ବ୍ୟାପୀ ସକାଳ ୮ରୁ ସନ୍ଧ୍ୟା ୬ଟା (୧୦ ଘଣ୍ଟା) ପର୍ଯ୍ୟନ୍ତ ମୋବାଇଲ ଇଣ୍ଟରନେଟ୍ ସେବା ବନ୍ଦ ରଖାଯାଇଥିଲା। ରାଜ୍ୟର ୬୬୪ଟି କେନ୍ଦ୍ରରେ ପ୍ରାୟ ୧୫ ଲକ୍ଷ ଆଶାୟୀ ପରୀକ୍ଷା ଦେଇଛନ୍ତି। କପି ରୋକିବା ପାଇଁ ପରୀକ୍ଷାର୍ଥୀଙ୍କୁ ଫୁଲ ହାତ ସାର୍ଟ ଓହ୍ଲାଇବାକୁ କୁହାଯାଇଥିଲା। ବଲ୍ପେନ ବ୍ୟତୀତ ଅନ୍ୟ କୌଣସି ପେନ୍ ନେଇଯିବାକୁ ଅନୁମତି ଦିଆଯାଇନଥିଲା। ସେହିପରି କେନ୍ଦ୍ର ବାହେରେ ଜୋତା ଖୋଲିବାକୁ କୁହାଯାଇଥିଲା। କଡ଼ା ଯାଞ୍ଚ ପରେ ପରୀକ୍ଷାର୍ଥୀଙ୍କୁ କେନ୍ଦ୍ର ମଧ୍ୟକୁ ଯିବାକୁ ଦିଆଯାଇଥିଲା। ସାଦୁଲପୁରରେ ୩ ଜଣ ନକଲି ପରୀକ୍ଷାର୍ଥୀଙ୍କୁ ଗିରଫ କରାଯାଇଛି। ସେମାନେ ଅନ୍ୟ ପରୀକ୍ଷାର୍ଥୀଙ୍କ ପାଇଁ ପରୀକ୍ଷା ଦେବାକୁ ଆସିଥିବାବେଳେ ଧରାପଡିଛନ୍ତି। ଜୟପୁର ସହରରେ ୨୮ ହଜାରରୁ ଅଧିକ ପରୀକ୍ଷାର୍ଥୀ ପରୀକ୍ଷା ଦେଇଛନ୍ତି। କେତେକ କ୍ଷେତ୍ରରେ ପରୀକ୍ଷାର୍ଥୀଙ୍କ ସାର୍ଟ ହାତ କାଟି ଦିଆଯାଇଥିଲା। ବିକାନେରରେ ହୋଟେଲ, ଧର୍ମଶାଳା ଓ ଅନ୍ୟାନ୍ୟ ସ୍ଥାନରେ ଚଢଉ କରି ଯାଞ୍ଚ କରାଯାଇଛି ଓ ସନ୍ଦିଗ୍ଧଙ୍କ ଉପରେ କଡ଼ା ନଜର ରଖାଯାଇଛି। ରବିବାର ବି ଏହି ପରୀକ୍ଷା ଜାରି ରହିବ।
