ନୂଆଦିଲ୍ଲୀ .- ନୂଆଦିଲ୍ଲୀରେ ଏକ ଅଜବ୍ ଘଟଣା ଘଟିଛି । ସାମାନ୍ୟ ଘଟଣା ପାଇଁ ଜଣେ ବ୍ୟକ୍ତିଙ୍କୁ ହତ୍ୟା କରାଯାଇଥିବା ବେଳେ ଆଉ ଜଣେ ଗୁରୁତର ହୋଇଛନ୍ତି । ଦିଲ୍ଲୀର ଉତ୍ତମ ନଗର ଅଞ୍ଚଳରେ ଏହି ଘଟଣା ଘଟିଛି । ରବିବାର ଭୋରରୁ ବିଜେନ୍ଦ୍ର ରାଣା ନାମକ ବ୍ୟକ୍ତି ନିଜର ଅଟୋରିକ୍ସାକୁ ପାର୍କିଂ ସ୍ଥାନକୁ ନେଉଥିଲେ । ଏତିକି ବେଳେ ତାଙ୍କ ପଡୋଶୀଙ୍କର କଳା ରଙ୍ଗର ଲାବ୍ରାଡର ପ୍ରଜାତିର କୁକୁର ସହ ସାମାନ୍ୟ ଧକ୍କା ହୋଇଯାଇଥିଲା । ତାଙ୍କ ପଡୋଶୀ ଅଙ୍କିତ , ପରାସ ଓ ଦେବ ସେହି ସ୍ଥାନକୁ ଆସିବା ସହ କୁକୁରକୁ କ୍ଷମା ମାଗିବା ପାଇଁ କହିଥିଲେ । ମାତ୍ର ବିଜେନ୍ଦ୍ର କୁକୁରକୁ କ୍ଷମା ମାଗିବା ପାଇଁ ମନା କରି ଦେବାରୁ ତାଙ୍କ ଛୁରି ଓ ପେଚ୍କଷ୍ରେ ଆକ୍ରମଣ କରିଥିଲେ ।
ତାଙ୍କ ଶରୀରର ୬ଟି ସ୍ଥାନରେ ଭୁଷି ଦେଇଥିଲେ । ବିଜେନ୍ଦ୍ରଙ୍କ ଚିତ୍କାର ଶୁଣି ତାଙ୍କ ବଡ ଭାଇ ସେହି ସ୍ଥାନକୁ ଆସିଥିବା ବେଳେ ତାଙ୍କୁ ୩ ଥର ଭୁଷି ଦେଇଥିଲେ । ଘଟଣାସ୍ଥଳରେ ବିଜେନ୍ଦ୍ରଙ୍କର ମୃତ୍ୟୁ ହୋଇଥିବାବେଳେ ସଙ୍କଟାପନ୍ନ ଅବସ୍ଥାରେ ତାଙ୍କ ବଡ ଭାଇଙ୍କୁ ଦୀନ୍ ଦୟାନ ଉପାଧ୍ୟାୟ ଡାକ୍ତରଖାନାରେ ଚିକିତ୍ସା ପାଇଁ ଭର୍ତ୍ତି କରାଯାଇଛି । ପୁଲିସ ଏହି ଘଟଣାର ତଦନ୍ତ ଆରମ୍ଭ କରିଛି । ମୁଖ୍ୟ ଅଭିଯୁକ୍ତ ଅଙ୍କିତ , ପରାସ ଓ ଦେବ ନାମକ ୩ ଜଣ ଯୁବକଙ୍କୁ ଗିରଫ କରିବାପାଇଁ ଉଦ୍ୟମ ଆରମ୍ଭ କରିଛି ।