ଭୁବନେଶ୍ଵର: ବଲିଉଡ ତଥା ଓଡ଼ିଆ କଣ୍ଠଶିଳ୍ପୀ ସୌରିନ ଭଟ୍ଟଙ୍କ ବିରୋଧରେ ଆସିଥିବା ଦୁଷ୍କର୍ମ ଅଭିଯୋଗକୁ ବିତିଲାଣି ୨ ବର୍ଷ। ପୁଲିସ ସୌରିନଙ୍କ ବିରୋଧରେ ଚାର୍ଜସିଟ ଦଖଲ କରି ସାରିଥିବାବେଳେ ଏଯାଏଁତାଙ୍କୁ ଗିରଫ କରିନାହିଁ। ଇତି ମଧ୍ୟରେ କଟକରେ ପାଞ୍ଚ ପାଞ୍ଚ ଜଣ ଡିସିପି ବଦଳି ସାରିଲେଣି, କିନ୍ତୁ ଧରାପଡ଼ିଲେନି ସୌରିନ। ଦୁଇ ବର୍ଷରେ କଟକ ସହରରେ ବଦଳିଲେଣି ପାଞ୍ଚ ପାଞ୍ଚ ଜଣ ଡିସିପି। ହେଲେ ଦୁଷ୍କର୍ମ ଅଭିଯୋଗରେ ଫେରାର କଣ୍ଠଶିଳ୍ପୀ ସୌରିନଙ୍କୁ ଗିରଫ କରିବାରେ ଫେଲ୍ କମିଶନରେଟ ପୁଲିସ।
ତେବେ ପ୍ରଶ୍ନ ଉଠୁଛି କାହିଁକି କଣ୍ଠଶିଳ୍ପୀ ସୌରିନଙ୍କୁ ଗିରଫ କରିନାହିଁ କମିଶନରେଟ ପୁଲିସ। ଏ ଘଟଣାରେ କୋର୍ଟରେ ଚାର୍ଜସିଟ ଦାଖଲ କରିବାପରେ ମଧ୍ୟ ଅଭିଯୁକ୍ତ ପାଖରେ ପହଞ୍ଚି ପାରିନାହିଁ ପୁଲିସ। ୨୦୨୩ ମସିହା ଜୁନ ୧୨ରେ ସୌରିନଙ୍କ ବିରୋଧରେ କଟକ ମହିଳା ଥାନାରେ ଅଭିଯୋଗ କରିଥିଲେ ଯୁବତୀ। ମାମଲା ରୁଜୁ କରି ତଦନ୍ତ ଆରମ୍ଭ କରିଥିଲା ପୁଲିସ। ୨୩ ଜୁନ, ୨୦୨୩ରେ ସୌରିନଙ୍କ କଲକାତା ଘରେ ଚଢାଉ କରିଥିଲା ପୁଲିସ।
ସୌରିନ ଘରେ ନଥାଇ ଫେରାର ଥିବାରୁ ପୁଲିସ ଫେରି ଆସିଥିଲା। କିନ୍ତୁ ଗିରଫଦାରୀକୁ ଏଡ଼ାଇବା ପାଇଁ ସୌରିନ ଆଗୁଆ ଜାମିନ ପାଇଁ ହାଇକୋର୍ଟରେ ନିବେଦନ କରିଥିଲେ। ୧୧ ସେପ୍ଟେମ୍ବର ୨୦୨୩ରେ ସୌରିନଙ୍କ ବିରୋଧରେ ଲୁକ୍ ଆଉଟ୍ ସର୍କୁଲାର ଜାରି ହୋଇଥିଲା। ସୌରିନଙ୍କ ୨ଟି ବ୍ୟାଙ୍କ ଆକାଉଣ୍ଟ ଫ୍ରିଜ୍ କରାଯାଇଥିଲା। ୫ ଅକ୍ଟୋବର ୨୦୨୩ରେ ଜାମିନ ବିହୀନ ଗିରଫ ପରଓ୍ବାନା ଜାରି ହୋଇଥିଲା।
