ରେଙ୍ଗାଲିକ୍ୟାମ୍ପ : ଅତାବିରା ବ୍ଲକ ଅନ୍ତର୍ଗତ ପାହାର ଶ୍ରିଗିଡ଼ା ପଞ୍ଚାୟତର ଲବାନଟିକ୍ରାଠାରେ ସାମାନ୍ୟ ଝଗଡାକୁ ନେଇ ଜଣେ ପୁଅ ତା ବାପାଙ୍କୁ ହତ୍ୟା କରିଥିବା ଘଟଣା ସାମ୍ନାକୁ ଆସିଛି । ମୃତକଙ୍କ ଜ୍ବାଇଁ ଅରୁଣ ଖଡିଆଙ୍କ ଲିଖିତ ଅଭିଯୋଗରୁ ଜଣାପଡିଛି ଯେ ମୃତ ବ୍ୟକ୍ତି ହେଉଛନ୍ତି ଜୀବର୍ଦ୍ଧନ ଖଡ଼ିଆ । ତାଙ୍କର ବଡ ଝିଅ ଦୀପାର ବାହାଘର ଗତ ୭ ତାରିଖରେ ହୋଇଥିଲା । ସେହି ବିବାହ ସମୟରେ ଲାଗିଥିବା ମଡୁଆକୁ ଖୋଲିଦେବା ପାଇଁ ଗତକାଲି ଅପରାହ୍ନ ପ୍ରାୟ ୩ ଟା ୩୦ ମିନିଟ ସମୟରେ ନିଜ ପୁଅ ସଞ୍ଜୀବ ଖଡ଼ିଆକୁ କହିଥିଲେ । ପୁଅ କିନ୍ତୁ ଖୋଲିବା ପାଇଁ ମନା କରିଦେଇଥିଲା । ଫଳରେ ଉଭୟଙ୍କ ମଧ୍ୟରେ କିଛି ପାଟିତୁଣ୍ଡ ହୋଇଥିଲା ।
ପରେ ରାତିରେ ଉଭୟ ମଦ ପିଇ ପୁଣି ପୂର୍ବ କଥାକୁ କେନ୍ଦ୍ର କରି ପରସ୍ପର ମଧ୍ୟରେ ଝଗଡା କରିଥିଲେ । ରାତି ପ୍ରାୟ ଗୋଟାଏରେ ପୁଅ ସଞ୍ଜୀବ ରାଗିଯାଇ ବାପାଙ୍କ ମୁଣ୍ଡରେ ଏକ ବାଡ଼ିରେ ପିଟିଦେବା ଫଳରେ ଘଟଣାସ୍ଥଳରେ ଜୀବର୍ଦ୍ଧନଙ୍କ ମୃତ୍ୟୁ ହୋଇଥିଲା । ଖବର ପାଇ ଅତାବିରା ଥାନା ଅଧିକାରୀ ସୁକୁମାର ତ୍ରିପାଠୀଙ୍କ ସହ ସମସ୍ତ ପୁଲିସ କର୍ମଚାରୀ ଘଟଣାସ୍ଥଳକୁ ପହଞ୍ଚି ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇଥିଲେ । ସଞ୍ଜୀବକୁ ଗିରଫ କରି ମାମଲା ରୁଜୁ କରି କୋର୍ଟ ଚାଲାଣ କରିଛି ପୁଲିସ ।
