ସ୍ମିତାରାଣୀ ମୃତ୍ୟୁ ମାମଲା; ମହିଳା କମିଶନ ଅଧ୍ୟକ୍ଷା ଓ ଏସପିଙ୍କ ବହିଷ୍କାର ଦାବି କଲେ ବିରୋଧୀ

ଭୁବନେଶ୍ୱର: ଯାଜପୁର ହରିଦାସପୁର ଭିଏଲଡବ୍ଲୁ ସ୍ମିତାରାଣୀ ବିଶ୍ୱାଳଙ୍କ ମୃତ୍ୟୁ ମାମଲାକୁ ନେଇ ରାଜନୀତି ଥମିବାର ନାମ  ନେଉ ନାହିଁ। ବିରୋଧୀ ଦଳର ନେତା ଓ ନେତ୍ରୀମାନେ ବାରମ୍ବାର ସ୍ମିତାରାଣୀଙ୍କ ପରିବାରକୁ ଭେଟିବା ସହ ନ୍ୟାୟ ଦାବି କରୁଛନ୍ତି। ଏଭଳି ପରିସ୍ଥିତିରେ ବିଜେପି ନେତା ପ୍ରଦୀପ୍ତ ନାୟକ ଏକ ସମ୍ବାଦିକ ସମ୍ମିଳନୀ କରି ମହିଳା କମିଶନ ଅଧ୍ୟକ୍ଷା ଓ ଯାଜପୁର ଏସପିଙ୍କ ବହିଷ୍କାର ଦାବି କରିଛନ୍ତି।

ସେ କହିଛନ୍ତି ଯେ, ସ୍ମିତାରାଣୀଙ୍କୁ ଷଡ଼ଯନ୍ତ୍ର କରି ହତ୍ୟା କରାଯାଇଥିବା ଜଣାପଡ଼ୁଛି। ମହିଳା କମିଶନ ଅଧ୍ୟକ୍ଷା ଘଟଣାସ୍ଥଳକୁ ଗଲେ କିନ୍ତୁ ମୃତକଙ୍କ ପରିବାରକୁ ଭେଟିଲେ ନାହିଁ। ପୁଲିସ ଅଭିଯୁକ୍ତର ବୟାନ ଆଧାରରେ ତଦନ୍ତ ସାରିଦେଲା। ଅଭିଯୁକ୍ତ ରୂପେଶ ଭଦ୍ର କଥାରେ ଏସପି ସ୍ମିତାଙ୍କ ଚରିତ୍ର ସଂହାର କରିଛନ୍ତି। ତେଣୁ ମହିଳା କମିଶନ ଅଧ୍ୟକ୍ଷା ଓ ଯାଜପୁର ଏସପିଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ନିଆଯାଇ ଉଭୟଙ୍କୁ ବହିଷ୍କାର କରାଯାଉ ବୋଲି ପ୍ରଦୀପ୍ତ ନାୟକ ଦାବି କରିଛନ୍ତି।

୨୦୧୮ ମସିହା ମାର୍ଚ୍ଚ ୨୭ରେ ରୂପେଶ ଭଦ୍ରଙ୍କ ରଙ୍ଗଶାଳାକୁ ଭଙ୍ଗାଯାଇଥିବା ଆରଆଇ ରିପୋର୍ଟ କରିଛନ୍ତି। କିନ୍ତୁ ଏଯାଏଁ ଭଙ୍ଗା ନଯାଇ କେମିତି ମିଛ ରିପୋର୍ଟ ହୋଇଛି, ତାହାର ତଦନ୍ତ ହେଉ। ସିବିଆଇ ତଦନ୍ତ ପାଇଁ ସୁପାରିଶ ନ ହେଲେ ବିଧାନସଭା ଅଚଳ ହେବ ବୋଲି ପ୍ରଦୀପ୍ତ ନାୟକ ଚେତାବନୀ ଦେଇଛନ୍ତି।