ନୂଆଦିଲ୍ଲୀ: ପୁଲୱାମା ଆକ୍ରମଣ ପରେ ପାକିସ୍ତାନୀ ସେନାର ସାମ୍ବାଦିକ ସମ୍ମିଳନୀକୁ ପ୍ରସାରଣ କରି ଅଡୁଆରେ ପଡିଛନ୍ତି ଦୁଇଟି ଟେଲିଭିଜନ ଚ୍ୟାନେଲ। ଏ ନେଇ ସୂଚନା ଓ ପ୍ରସାରଣ ମନ୍ତ୍ରଣାଳୟ ପକ୍ଷରୁ ସମ୍ପୃକ୍ତ ୨ଟି ଚ୍ୟାନେଲକୁ କାରଣଦର୍ଶାଅ ନୋଟିସ ଜାରି କରାଯାଇଛି।
ସୂଚନା ମୁତାବକ, ଗତ ୨୨ ତାରିଖରେ ପାକିସ୍ତାନୀ ସେନା ମୁଖପାତ୍ର ପୁଲୱାମା ଆକ୍ରମଣ ସମ୍ପର୍କରେ ଏକ ସାମ୍ବାଦିକ ସମ୍ମିଳନୀ କରିଥିଲେ, ଯାହାକୁ ଏବିପି ନ୍ୟୁଜ ଏବଂ ତିରଙ୍ଗା ଟିଭି ଚ୍ୟାନେଲରେ ପ୍ରସାରଣ କରାଯାଇଥିଲା। କିନ୍ତୁ କେବୁଲ ଟେଲିଭିଜନ ନେଟୱର୍କ୍ସ ରେଗୁଲେଶନ ଆଇନ ୧୯୯୫ର ଦୁଇଟି କାର୍ଯ୍ୟକ୍ରମ ଆଚରଣ ବିଧି ଉଲ୍ଲଂଘନ କରୁଥିବାରୁ ମନ୍ତ୍ରଣାଳୟ ପକ୍ଷରୁ ଗତ ୨୩ ତାରିଖରେ ଉକ୍ତ ୨ଟି ଚ୍ୟାନେଲକୁ କାରଣଦର୍ଶାଅ ନୋଟିସ ଜାରି କରାଯାଇଛି। ଏ କ୍ଷେତ୍ରରେ କାହିଁକି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ନାହିଁ ବୋଲି ମନ୍ତ୍ରଣାଳୟ ପକ୍ଷରୁ ପ୍ରଶ୍ନ କରାଯାଇ ଆଗାମୀ ୭ ଦିନ ମଧ୍ୟରେ ଜବାବ ଦେବାକୁ କୁହାଯାଇଛି।
