ସୁଆଣ୍ଡୋ: ପୁରୀ ଜିଲା ସାକ୍ଷୀଗୋପାଳ ସିଦ୍ଧ ବଳରାମ ପୀଠରେ ସତ୍ୟବାଦୀ କଳା ସଂସ୍କୃତି ସଂଘର ବାର୍ଷିକ ବୈଠକ ଅନୁଷ୍ଠିତ ହୋଇଯାଇଛି। ଏଥିରେ ଶୁଭ ସୁନ୍ଦର ଘଟୁଆରୀ ମୁଖ୍ୟଅତିଥି ଭାବେ ଯୋଗଦେଇ କହିଲେ ଶ୍ରୀଜଗନ୍ନାଥ ହେଉଛନ୍ତି ଦୁନିଆର ସର୍ବଶ୍ରେଷ୍ଠ କଳାକାର। ସେ ସମସ୍ତ ଶକ୍ତିର ଆଧାର। ତାଙ୍କ ଉପରେ ଭରଷା ରଖି ଆଗେଇ ଚାଲିଲେ କଳା ସଂସ୍କୃତି ସଂଘ କଳାକାରମାନଙ୍କର ସର୍ବବିଧ ବିକାଶ ହୋଇପାରିବ ବୋଲି ଆଲୋକପାତ କରିଥିଲେ। ପ୍ରଥମେ ଜଗନ୍ନାଥଙ୍କ ଫଟୋରେ ମାଲ୍ୟାର୍ପଣ ଧୂପ ପ୍ରଦୀପ ପ୍ରଜ୍ଜ୍ଵଳନ କରାଯାଇ ସଭାକାର୍ଯ୍ୟ ଆରମ୍ଭ ହୋଇଥିଲା। କଳାର ବିକାଶ ଓ କଳାକାରମାନଙ୍କୁ ସରକାର ସହାୟତା କରିବା ସମ୍ପର୍କରେ ଆଲୋଚନା କରାଯାଇଥିଲା। ସତ୍ୟବାଦୀବ୍ଲକ କଳା ସଂସ୍କୃତି ସଂଘ ଉପସଭାପତି ରମେଶ ଚନ୍ଦ୍ର ପଲେଇ ଅତିଥି ପରିଚୟ ଓ ସଂଯୋଜନା କରିଥିଲେ। ଭାଗବତ ଟୁଙ୍ଗୀ ସଂକୀର୍ତ୍ତନ ମଣ୍ଡଳୀ ପାଲା ଗୋଟିପୁଅ ନୃତ୍ୟ ଘୋଡାନାଚ ଦାସକାଠିଆ ଖଞ୍ଜଣି ଭଜନ, ମୃଦଙ୍ଗବାଦ୍ୟ ଜୋଡିଶଙ୍ଖ ଧୁଡୁକି ନାଚ କେନ୍ଦେରା ବାଦନ ସହିତ ଗ୍ରାମ୍ୟ ଲୋକକଳା କଳାକାରମାନଙ୍କୁ ଆନୁସଙ୍ଗିକ ଉପକରଣମାନ ସଂସ୍କୃତି ବିଭାଗ ତରଫରୁ ଯୋଗାଇ ଦିଆଯିବାକୁ ସଭାରେ ଦାବି କରାଯାଇ ବିଧାୟକଙ୍କୁ ଏକ ଦାବିପତ୍ର ଦିଆଯିବାକୁ ନିଷ୍ପତ୍ତି ଗ୍ରହଣ କରାଯାଇଛି। ଏଥିରେ ଲିଙ୍କରାଜ ଦଳେଇ, କୃଷ୍ଣଚନ୍ଦ୍ର ନାୟକ, ଭାବନ ମୁଦୁଲି, ଶ୍ୟାମସୁନ୍ଦର ଦଳାଇ, ହରିଶ୍ଚନ୍ଦ୍ର ସ୍ଵାଇଁ ପ୍ରମୁଖ ଆଲୋଚନାରେ ଅଂଶଗ୍ରହଣ କରିଥିଲେ। ଶତାଧିକ କଳାକାର ଉକ୍ତ ବୈଠକରେ ଉପସ୍ଥିତ ଥିବା ଦେଖିବାକୁ ମିଳିଥିଲା।
Comments are closed.