କେଭାଡିଆ: ଜାମ୍ମୁ-କାଶ୍ମୀରରୁ ଧାରା ୩୭୦ ଉଚ୍ଛେଦ ଓ ଏହାକୁ ତିନି କେନ୍ଦ୍ରଶାସିତ ଅଞ୍ଚଳରେ ପରିବର୍ତ୍ତନ ନିଷ୍ପତ୍ତିର ସମସ୍ତ ଶ୍ରେୟ ସର୍ଦାର ବଲ୍ଲଭ ଭାଇ ପଟେଲଙ୍କୁ ଅର୍ପଣ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ଦେଶ ମିଶ୍ରଣ ସମ୍ପର୍କିତ ସର୍ଦାର ପଟେଲଙ୍କ ଆଦର୍ଶରେ ଅନୁପ୍ରାଣିତ ହୋଇ ତାଙ୍କ ସରକାର ଏହି ନିଷ୍ପତ୍ତି ନେଇଥିବା ମୋଦୀ କହିଛନ୍ତି। ଏହା ଦ୍ବାରା ବର୍ଷ ବର୍ଷ ଧରି ଦେଶର ଅଖଣ୍ଡତା ଓ ସୁରକ୍ଷା ପ୍ରତି ବିପଦ ହୋଇ ରହିଥିବା ଏକ ବଡ଼ ସମସ୍ୟାର ସମାଧାନ ରାସ୍ତା ବାହାରିପାରିଛି ଏବଂ ପଟେଲଙ୍କ ‘ଏକ ଭାରତ ଶ୍ରେଷ୍ଠ ଭାରତ’ ସ୍ବପ୍ନ ସାକାର ହୋଇଛି ବୋଲି ମୋଦୀ କହିଛନ୍ତି। ମଙ୍ଗଳବାର ମୋଦୀ ନିଜର ୬୯ତମ ଜୟନ୍ତୀ ପାଳନ ଅବସରରେ ଭଦୋଦରା ନିକଟ କେଭାଡ଼ିଆଠାରେ ଅନୁଷ୍ଠିତ ଏକ ବିଶାଳ ଜନସମାବେଶକୁ ଉଦବୋଧନ ଦେବା ବେଳେ ଦେଶର ପ୍ରଥମ ସ୍ବରାଷ୍ଟ୍ରମନ୍ତ୍ରୀ ସର୍ଦାର ପଟେଲଙ୍କୁ ପ୍ରଶଂସା କରିଛନ୍ତି। ୧୯୪୮ ସେପ୍ଟେମ୍ବର ୧୭ରେ ପଟେଲ ହାଇଦରାବାଦକୁ ଭାରତ ସହିତ ମିଶ୍ରଣ କରାଇଥିବା ସମ୍ପର୍କରେ ସେ ଚେତାଇ ଦେଇଥିଲେ। ଏହି ଅବସରରେ ତାଙ୍କ ସରକାର ଦେଶର ଦ୍ରୁତ ବିକାଶ ସହିତ ଅପୂର୍ବ ସଫଳତା ହାସଲ ପାଇଁ ନିଷ୍ଠାର ସହ କାର୍ଯ୍ୟ କରୁଥିବା ମୋଦୀ କହିଥିଲେ।
ଭଦୋଦରା ନିକଟ କେଭାଡିଆଠାରେ ଅବସ୍ଥିତ ସର୍ଦାର ସରୋବର ଡ୍ୟାମ୍ ନିକଟରେ ଏହି ସମାବେଶ ଅନୁଷ୍ଠିତ ହୋଇଥିଲା। ମୋଦୀ ସେଠାରେ ସର୍ଦାରଙ୍କ ‘ଷ୍ଟାଚ୍ୟୁ ଅଫ ୟୁନିଟି’ ପରିଦର୍ଶନ କରିବା ସହ ନର୍ମଦା ପୂଜନ କରିଥିଲେ। ଏଥିସହିତ ସେ ‘ନମାମି ନର୍ମଦା ମହୋତ୍ସବ’ର ଶୁଭାରମ୍ଭ କରିଥିଲେ। ପ୍ରାୟ ୩ହଜାର କୋଟି ଟଙ୍କା ବ୍ୟୟରେ ନିର୍ମିତ ଷ୍ଟାଚ୍ୟୁ ଅଫ ୟୁନିଟି ପ୍ରତି ପର୍ଯ୍ୟଟକଙ୍କ ଆକର୍ଷଣ ବଢ଼ୁଥିବା ଦର୍ଶାଇ ମୋଦୀ କହିଥିଲେ ଯେ ଆମେରିକାରେ ରହିଥିବା ୧୩୩ ବର୍ଷର ଷ୍ଟାଚ୍ୟୁ ଅଫ ଲିବର୍ଟିକୁ ଦୈନିକ ପ୍ରାୟ ୧୦ହଜାର ପର୍ଯ୍ୟଟକ ପରିଦର୍ଶନ କରୁଥିବାବେଳେ ମାତ୍ର ବର୍ଷକ ପୂର୍ବେ ପ୍ରତିଷ୍ଠିତ ଷ୍ଟାଚ୍ୟୁ ଅଫ ୟୁନିଟି ଦେଖିବା ପାଇଁ ଦୈନିକ ସାଢ଼େ ୮ହଜାର ପର୍ଯ୍ୟଟକ ଆସୁଛନ୍ତି।
ଜନ୍ମଦିନ ଅସରରେ ମୋଦୀ ଗୁଜରାତରେ ଏକାଧିକ କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ। ସୋମବାର ରାତିରେ ଗାନ୍ଧୀନଗରସ୍ଥିତ ରାଜଭନରେ ଅବସ୍ଥାନ କରିଥିବା ମୋଦୀ ସକାଳେ ମା’ ହୀରାବେନ୍ଙ୍କୁ ଭେଟି ତାଙ୍କର ଆଶୀର୍ବାଦ ନେଇଥିଲେ। ହୀରାବେନ୍ ଅହମ୍ମଦାବାଦର ରାଇସିନ୍ ଗ୍ରାମରେ ସାନ ପୁଅ ପଙ୍କଜ ମୋଦୀଙ୍କ ପାଖରେ ରହୁଛନ୍ତି। ମୋଦୀ ତାଙ୍କ ସହିତ ଭୋଜନ କରିଥିଲେ। ଏହି ଅବସରରେ ମୋଦୀଙ୍କ ନିର୍ବାଚନ ମଣ୍ଡଳୀ ବାରାଣସୀଠାରେ ତାଙ୍କର ଶୁଭ ମନାସୀ ଅରବିନ୍ଦ ସିଂହ ନାମକ ଜଣେ ପ୍ରଶଂସକ ସ୍ଥାନୀୟ ସଂକଟମୋଚନ ହନୁମାନ ମନ୍ଦିରରେ ୧କିଲୋ ୨୫ଗ୍ରାମ ଓଜନର ଏକ ମୁୁକୁଟ ସମର୍ପଣ କରିଥିଲେ। କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧୀଙ୍କ ସମେତ ବିଭିନ୍ନ ଦଳ ଓ ଦେଶବିଦେଶର ନେତା ମୋଦୀଙ୍କୁ ଜନ୍ମଦିନର ଶୁଭେଚ୍ଛା ଜଣାଇଛନ୍ତି।
