‘ବିକଶିତ ଭାରତ ବିକିଶିତ ରେଳ’ ବିଷୟକୁ ନେଇ ପ୍ରତିଯୋଗୀତା ଅନୁଷ୍ଠିତ

ସମ୍ବଲପୁର : ଦେଶର ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ୨୦୪୭ ପର୍ଯ୍ୟନ୍ତ ଭାରତକୁ ଏକ ବିକଶିତ ରାଷ୍ଟ୍ର ରୂପେ ଗଢ଼ି ତୋଳିବାର କାର୍ଯ୍ୟକ୍ରମ ହାତକୁ ନେଇଛନ୍ତି । ଏହି କ୍ରମରେ ଦେଶର ବିକାଶରେ ଅନ୍ୟତମ ପ୍ରମୁଖ ଭୂମିକା ନିର୍ବାହ କରୁଥିବାରୁ ରେଳବାଇ ପାଇଁ ମଧ୍ୟ ଅନେକ କାର୍ଯ୍ୟକ୍ରମ କେନ୍ଦ୍ର ସରକାର ନେଇଛନ୍ତି । ଆଗାମୀ ୨୬ ତାରିଖରେ ପ୍ରଧାନମନ୍ତ୍ରୀ ମୋଦୀ ସାରା ଦେଶରେ ଅମୃତ ରେଳ ଷ୍ଟେସନ ଯୋଜନା ଅର୍ନ୍ତଗତ ୫୫୬ଟି ରେଳ ଷ୍ଟେସନ ଏବଂ ୧୫୦୦ଟି ଆରଓବି ଏବଂ ଆୟୁବି ଗୁଡିକର ଉଦଘାଟନ କରିବେ । ଏଥିପାଇଁ ରେଳବାଇ ପକ୍ଷରୁ ବିଭିନ୍ନ କାର୍ଯ୍ୟକ୍ରମ ଗୁଡିକ ହାତକୁ ନିଆଯାଇଛି । ଏହି କ୍ରମରେ ସମ୍ବଲପୁର ରେଳ ମଣ୍ଡଳରେ ଆଗାମୀ ୨୬ ତାରିଖରେ ପ୍ରଧାନମନ୍ତ୍ରୀ ଶ୍ରୀ ମୋଦୀ ୪ଟି ରେଳ ଷ୍ଟେସନର ପୁୁନଃ ବିକାଶ ଏବଂ ୭ଟି ଆରଓବି ଓ ଆୟୁବି ପ୍ରକଳ୍ପ ଗୁଡିକର ଉଦଘାଟନ କରିବେ । ଏଥିପାଇଁ ବୁଧବାର ସମ୍ବଲପୁର ମଣ୍ଡଳ ପକ୍ଷରୁ ବିଭିନ୍ନ ସ୍ଥାନରେ ରଚନା,ଚିତ୍ରାଙ୍କନ ଓ ବକୃତା ପ୍ରତିଯୋଗିତା ଆୟୋଜିତ ହୋଇଯାଇଛି । ଏହି ପ୍ରତିଯୋଗିତାରେ ‘୨୦୪୭ – ବିକଶିତ ଭାରତ ବିକଶିତ ରେଳ’ ବିଷୟବସ୍ତୁ ରଖାଯାଇଥିଲା ।

ମଣ୍ଡଳ ଅଧିନସ୍ଥ ୨୧ଟି ବିଦ୍ୟାଳୟ ଗୁଡିକରେ ଏହି ପ୍ରତିଯୋଗିତା ଗୁଡିକ ଆୟୋଜିତ ହୋଇଥିଲା । ମଣ୍ଡଳ ଅନ୍ତର୍ଗତ କଣ୍ଟାବାଞ୍ଜି, ମହାସମୁନ୍ଦ, ଟିଟିଲାଗଡ, କେସିଙ୍ଗା, ଝାରସୁଗୁଡା, ସମ୍ବଲପୁର, ବରଗଡ, ଯୁଯୁମୁରା ଆଦି ଅଂଚଳରେ ରହିଥିବା ବିଦ୍ୟାଳୟର ୪ ହଜାରରୁ ଉର୍ଦ୍ଧ ଛାତ୍ରଛାତ୍ରୀ ଅଂଶଗ୍ରହଣ କରିଥିଲେ । ସେଥି ମଧ୍ୟରୁ ୩୧୦ ଜଣ ଛାତ୍ରଛାତ୍ରୀ କୃତକାର୍ଯ୍ୟ ହୋଇଛନ୍ତି । ଏହି କୃତୀ ପ୍ରତିଯୋଗୀଙ୍କୁ ଆସନ୍ତା ୨୬ ତାରିଖରେ ଆୟୋଜିତ ହେବାକୁ ଥିବା କାର୍ଯ୍ୟକ୍ରମରେ ପୁରସ୍କୃତ କରାଯିବ ।